24. ዋንስ ዬሱሳም ሽእሽምሽ

ዜክራስቴኬ ኤልሳቤጥት ይንሥስን ዋንስ ጋጵሶ ማዓትካን ዬይዳኬታም ኬዔዝዳብ ማዓሤ፤ ፔጫ ጉርንግር ዶዖቕዳቔ፤ ዳዉላግራማ ኣንጽ ባእቴት ኩርኬ ኤይክክ እሥዳቔ ግሜልት ጉፕቴግራንክ ኣክሼርሻቕንዳ ኣብላ ቖቤርዳቔ።

ቤድሚ ኤዔድ ዋንስዳ ኤስርካን ፔጫ ጉርንግር ክራ ሃዓዴኬ፤ ኖዖሬ «ሳዓብት ባዓምና ዬራ ኡሥታ ማዓሥንካን ሳዓብዳ ማዓትኬቴ» ጋይንትክ ኬዔም ሳንሴ።

ኤዔድና ዋንስት ኬዔዜናም ይ ኤሴርሳኬንክ ቤድሚ ኤዔድና ዳቔልስይንታም ቡዑጼኬ፤ ዋንሴሬ ኬዔም ሽእሼ፥ ቤድሚ ቡዑድ እዝንትናም ኤንሥዳቔድ ታዓሬ ዋንስዳ ሽእርካን ሃዓዴኬ፤ ዳይንኬሬ ሳዓብዳ ማዓትኬኬ ዳቔልስይንታሜሬ ቡዑጽኬኬ።

ዋንስ ቡዑድ እዝንትናም ኤንሥዴድንቴን ኮይን ጋይሴ፤ «ዬታ ኤዔድ ዴይስድንዳ ጉንኖ! ኔጋኔ ጋይንትን ቴዬቶ ዬ ዎዖንዳኬታም ኦዖክኬቴ፤ ላቕምንዳ ኣዓፒ ኡዑሻይንዳ ሃዓቓ ሙዳም ፓክትዮ ኖዖግር ኮዖም ዣቔርዴ፤» ዋንስ ጋዓቶ «ጎዖግሃንታም ኡስዳብ ጋዓና እስታም ኬዔዝዳብናም ብሬዜሃንት ኦይድቴ» ጋይንትክ ኬ ኬዔዝዳቓኬታም ቦዖሥሴ።

ኣይሁድ ኤዔድን ባግና ሳዓቢ ዪም ሳይሳቓብን ማዓትንትንክታም ጎይሴኬ፤ ዋንስ ዳይንክ ኮይን ጋይሴ፤ «እታ ሳዓቢ ዪም ሳይሳቓብን ዳክቴ ዳይንኬሬ እስት ቡዑር ሃዓዳብ ኤዔድ ዶዖቔ፤ ቖጴንክቴት ዻዓክናም ቡልንቲ ኢን ማዓታያብ ጋእሻ ዴዔጽምባቤ።»

ቓስትምሲ ሴጽንክ ዬሱስ ዋንስዳ ሽእርካን ሃዓዴ፤ ዋንሴሬ ኪም ይ ሼጃኬንክ «ሼትኬቴ! ዬዔኔቶ ፔጬዜናሜድንት ዳቔልስናም ኔክሽዳብን ሳዓብት ቖልስኔ» ጋይሴ።

ዋንስ ዬሱሴን «እታ ሃዓም ሽእሽንትካን ኢን ማዓዳብ ዳክቴ፤ ኮዖ ኦዖላይሲ ሃዓና ኢም ሽእሽንቲ ሃዓን ማዓዶንምሺ» ኪን ጋይሴ፤ ዬሱስ ዳይንክ «ዬይንት ማዓዳክ ሬይና ኡዝሜንዳ ኮ ማዓሥንካን ሃዓና ኢም ሽእሽንቲ ሃዓን ማዓዴ» ጋይሴ፤ ካንካን ዬሱስ ሃስን ዳቔልስንት ዳክባብ ክ ማዓድንኬሬ ዋንስ ኪም ሽእሼ።

ዬሱስ ይ ሽኤርሻኬት ቡዑር ኖቔንግራንክ ክ ዉታቕስምሽ ሳዓብት ማንፔስ ዎሎሌት ካምስክ ሃዓፕርንትክ ዬሱስት ዜን ሃቾ ዶዖቕሴ፤ ኮዖ ሴጽንክ ሳዓብት ኡፕሲ ርኬግራንክ «ሃዓም እ ናሽዳብን ይንሥስእስት ሃዓናዬ ሃንክ ጋእሻ ጉሜርድቴ» ጋይሶ ኬዔዜ።

ሳዓቢ ዋንሴን «ማንፔስ ጪሊ ሃችንትክ ሃ ሽእሽዳብ ኤዔሥንት ዜን ሃዉሽዴ፤ ኤዔሥኔሬ ሳዓብት ይንሥዬ» ጋይሶ ኪን ኬዔስታ ሃዓቔ፤ ሳዓቢ ዎላቕባብ ዬሌክ ዶዖቕዴ፤ ዳይንኬሬ ዋንስ ዬሱሳም ክ ሽእሽዳኬንክ ሳዓቢ ባዓቤን ኬዔዝድክ ኤሴርሴ፤ ሳዓቢ ይንሥስናሜሬ ሼጄ፤ ኖዖሬ ዬሱሴ፤ ኮይኔሬ ማንፔስ ጪልናሜሬ ሼጄ።