23. ዬሱስት ኣዽርና

ማራም ዬሶፕ ጋዓርዳብ ጪልባብ ኤዔዴን ኮዖም ኩጵሴርስክ ሃዓቔ፤ ኮዖም ኩጵሳቓብስን ዬሶፕ ማራም ሲዒርማ ኔግንትንኮት ይ ኤሴርሳኬትክ ይንሥስን ክሬይ ክ ማዓትካኬታም ኤስቴ፤ ማራማም ኦዖሽንሽካን ዚጋቕዬ ካንካን ጫሜ ጋይሶ ኮዖም ጋርካን ጶቕሼ፤ ኮይን ክዬእካኬት ብሬዜን ሳዓብት ኦይቴርቴባብስን ሃዓዴትዳቦ ሃዓሜትክ ኪን ኬዔዜ።

ኦይቴርቴባብስን ኮይን ጋይሴ፤ «ዬሶፖ ማራማም ማዓሃንት ኮዖም ማዓስሶ ቴይንትካን ሃይ ጳሽካ፤ ኮዖርግርኮት ዶዖቕዳብን ማንፔስ ጪልዳንኬ፤ ኣንግ ይንሢ ኣጽቴሬ ናዓምንክታሜሬ ዬሱስ ጋይሶ ዎጅታዬ (ቡልኔሬ <ሌፒ ሴጽካን ዻቕሽዳብ>) ጋይንትዬ፤ ሃራካኔ ጋዓርስንክ ኤዔድይንታም ዳቔልስንክትግራንክ ኬዔም ዻዻቔሽዴ

ካንካን ዬሶፕ ማራማም ማይንትምሽ ማዓስሶ ኤዔርንት ኮዖም ቴዮ ካዬ፤ ዳይንኬሬ ኮ ኣጽቴንክ ዬካ ኮ ኪክን ራዓትክዬ።

ኣዽማ ሴጽንኮት ዣእሽምሽ ሮማ ፔጭንት ባዓብስን ኤዔድ ሙዳ ፓይድርካን ይንት ኣዓካ ፔጭንት ካትሜንግር ካይቴምሽ ኬዔዜ፤ ዬሶፕኬ ማራምክ ይ ዶዖቕዳክ ናዝሬታንክ ቤቴሌምግር ጎዖጊ ፔግማ ሙክሴኬ፤ ሃራካኔ ጋዓርስንክ ቤቴሌም ካትሜና ኣዼርሳቓብንት ኣዓኬና ዳዊት ሃዓቕንካኔ።

ቤቴሌምግር ኬ ዣእሻኬንክ ኬ ሃዉሽድንዳ ካሪ ዳኪ ሃዓቔ፤ ኬ ሃዓፕታቓክ ካርና ዋዓክት ካሌግር ሃዓቔ፤ ይንሥስን ኣዼርሳኬንክ ኬ ራዓሥድንዳ ካሪ ዳክንካን እንዴን ዋዓክንት እሥሚ ጎንግር ኪም ራዓሥሴ፤ ናዓምንክታሜሬ ዬሱሴ ጋይሴኬ።

ሶይትን ኮዖክ ኬራ ሼዔጌር ዶዖቕዳክ ዛክንዜን ቖልምንት ግሽዴድ ሃዓቔኬ፤ ጶቕሼርክዳይክ ሳዓብት ኦይቴርቴባብስን ሻዓክድክ ሼጄኬ ኬቴሬ ጳሼኬ፤ ኦይቴርቴባብስኔሬ «ሃይ ጳሽኬቴ ሃራካኔ ጋዓርስንክ ዬካን ክላ ኬዔዛ እስት ዶዖቕዴ፤ ሳዓብት ሳዓርቴባብስን ባዓባ ቤቴሌምግር ኣዼርቴ!» ጋይሴ።

«ካዬቶ ይንሥስናም ዝኬቴ ኣብሌክ ቕጭቶ ዋዓክት ጎዖንጌግር ራዓሥታ ኪም ሃዓዴቴ፤» ጶቕሼርክዳይክ ሳዓቢ ርኬግራንክ ዎዖንይንትካን ክ ኦይዴድን ቤድሚ ሃዓቔ፤ ሳዓባሜሬ ጎዖፕሻሬኮ ቦንችሚ ሳዓብካን ርኬግር ማዓታኔ ላቕምኔሬ ፔጭዜን ኤዔድንካን ማዓታኔ!» ጋይሴኬ።

ግሽሜን ግሽዳቔድን ዬሱስ ዳያክ ካርንግር ዣእሼኮ ኦይቴርቴባብስን ዪን ጋይሳቓኬታም ዋዓክንት ጎንጌንግር ራዓሥታ ኪም ሃዓፕሴኬ፤ ጋእሼሬ ጉሜርሴኬ ማራሜሬ ጉሜርሴ ቖልማ ግሽዴድና ይ ኤሴርሳቓኬ ይ ሼጃቓክ ሙዴካን ሳዓባም ጎዖፕሻሮ ቖልሜይንት ዳያኬዳ ካዬኬ።

ቶክሚ ሴጽት ቡዑር ሃይት ዉትንቴጎክ ፔጋ ፔጭግራሜድ ሩዑርሜድን ርኬግር ኤናንክ ዱሴርክንዳ ማንካ ሼጄኬ፤ ክሌባብ ኣይሁድ ኤዔድንት ባዓብስስን ኣዼርስምሽ ኤስምስድንዳ ማዓትንትናም ኤስቴኬ፤ ካንካን ባዓብስን ኮዖባባም ሼድንካን ፔጋንክ ሙክሴኮ ቤቴሌምግር ሃዓዴኮ ዬሱስኬ ኪም ኣጼድንክ ኬ ሃዓቓክ ኤዬናም ሃዓፕቴኬ።

ሩዑርሜድኔሬ ዬሱሳም እንዴን ኪክን ይ ሼጃኬንክ ጉምፔርስዮ ኪም ጎዖፕሼኬ፤ ዬሱስካኔሬ ጋጵምንዳ እማ እምሴኬ ኮዖዛንኬሬ ፔጬግርንት ካዬኬ።