22. ዋንስት ኣዽርና

ብርስዮ ሳዓቢ ይንት ዎዖንንካን ይ ኦይዴድንኬ ማዓትካን ዬይዳኬታም ኬዔዝዴድንጎክ ኤዔድንካን ኬዔስታ ሃዓቔ፤ ዳይንኬሬ ኬካን ኬዔዝራቓክ ኦይዲ ማቶ ቦንና ማቕሴኬ፤ ጶቕሼርክዳይክ ዎላቕ ሳዓቢ ርኬግራንክ ዎዖንይንትካን ክ ኦይዳብን ዜክራስ ዪም ጋዓርዳብን ጋልሥን ኤዔድናም ሳዓቢ ኪክን ቔዔሽምሽዳብንዳ ሳዓብዳንክ ጋዓና ኬዔዛ ዪም ኦይቴርስክ ሃዓዴ፤ ዜክራስኬ ኬዔንን ኤልሳቤጥክ ሳዓብካን ጳሽዴድ ኤዔድ ሃዓቔኬ፤ ዳይንኬሬ ናዓ ይንሢ ኣዻቕንዳ ሃዓቔ።

ሳዓቢ ርኬንግራንክ ዎዖንይንትካን ክ ኦይዳብን ዜክራሴን ኮይን ጋይሴ፤ «ማይሃንት ኣንግ ይንሥ ሃዓን ኣጽቴሬ፤ ናዓምክታም ዋንስ ጋይሳዮ ዎጅታዬ ኖዖ ማንፔስ ጪልና ኪክ ጾዖጽዴ ኤዔድናሜሬ ሳዓቢ ዪም ሳይሳቓብንካን ኬዔም ኡስዴ!» ዜክራስ ዳይንክ «ማይን እስት ኬ እንክ ይንሢ ኣዽንትካን ጋእሻ ጋልቴርቶቴ! ኮዖና ማዓድምሽ ሃስኒ ኤስዴ?» ጋይሶ ኪም ጎይሴ።

ሳዓቢ ዎዖንይንትካን ርኬግራንክ ክ ኦይዳብን ዜክራስካን ኮይን ጋይሴ፤ «ክላ ኬዔዜናም ዬዔን እ ኬዔስቴምሽ ሳዓቢ ኢም ኦይሣቔ፤ እ ኬዔዝዳኬታም ሃ ዶዖፕስክንካን ይንሥስን ኣዼርስቴንክ ዬካ ኣልቕንት ሃዓን ማዓታዬ፤» ሳዓና ዜክራስ ኬዔዝንቲ ኪም ባሼ፤ ኮዖት ቡዑር ሳዓብት ርክርግራንክ ዎዖንይንትካን ክ ኦይዳብን ዜክራስዳንክ ፓዓሽምሼ፤ ዜክራሴሬ ኤዔርንት ማዓቴ ማይንክቴሬ ሲርቴ።

ኤልሳቤጥ ኣርፒ ላዓት ሲርማ ኮ ዳያኬንክ ኮዖና ሳዓቢ ርኬግራንክ ዎዖንይንትካን ክ ኦይዳብን ጶቕሼርክዳይክ ናዓምንኮት ማራም ዪም ጋዓርዳክ ኤልሳቤጥት ሱሴቴንካን ሃዓፔርሴ፤ ናዓሬ ሙናካማ ይ ሃዓቕንካን ዬሶፕ ጋዓርዳብ ኤዔሥን ኮዖም ሶዖርታ ሃዓቔ፤ ሳዓብት ኦይቴርዳብስኔሬ «ሃዓና ስሲርዳዬ ኣንግ ይንሤሬ ኣዻዻዬ ናዓምንክታሜሬ ዬሱስ ኪም ጋዓዳዬ፤ ኖዖሬ ባዓብስን ሳዓብት ይንሥዬ ሌፒ ሴጽካኔሬ ጌሥዳብ ማዓዴ» ጋይሴ።

ማራም «እታ ኣንግ እይንክ ዣእሺ ኤሳይንዳ ሙናካማ እ ማዓሥንካን ኮና ሃስኖክ ማዓዴ?» ጋይስዮ ማዓስሴ፤ ኦይቴርባብስኔሬ ኮይን ጋይንትክ ኮዖን ፕእስትዮ ኬዔዜ፤ «ማንፔስ ጪልና ሃዜን ሃዓዳዴ ባዓቢ ሳዓብት ዛምኔሬ ሃዜን ሽሽፕሽዴ፤ ካንካን ይንሥስን ጪልባብ ሳዓብት ይንሢ ማዓዴ፤» ማራሜሬ ዶዖፕሴ፤ ኦይቴርቴባብስን ጋይሳቓታሜሬ ኢን ማዓታኔ ጋይሴ።

ኦይቴርቴባብስን ማራምካን ይ ኬዔዛኬት ቡዑር ሳዓና ይ ካይንክ ኤልሳቤጣም ሼጄ፤ ኤልሳቤጤሬ ማራምት ኣልቕሽናም ኮ ኤሴርታኬንክ ኤልሳቤጥት ይንሥስን ኮዖርግርኮት ጎብዜ፤ ማዓኔና ሳዓቢ ይካን ዎዖንሳቓክ ሬይንጎክ ኪክን ኬ ጉሜርድክ ማራም ኤልሳቤጥት ኤዔር ኣርፒ ማኬንካን ይ ዶዖቕሳኬት ቡዑር ኤዔርንት ናዓ ማዓቴ።

ኤልሳቤጥ ኣንግ ይንሥይንታም ይ ኣጻኬት ቡዑር ዜክራስኬ ኤልሳቤጥክ ኦይቴርቴባብስን ኬዔን ኬዔዛቕምሽ ይንሥስንት ናዓሚ ዋንስ ጋይሶ ዎጄኬ፤ ኮዖ ሴጽንክ ሳዓቢ ዜክራስዳ ኣልክምሲ ክ ኣልቕቴምሽ ማዓስሴ፤ ዜክራስ ኮይን ጋይሴ፤ «ኤዔድይንታም ክ ጶቕሽንካን ሳዓቢ ክ ጎዖፕሽማኔ! ሃዓኔሬ ይንሥእስቶ፤ ዳቔልስንኬትካን ኔጋኔ ጋይንቲ ሃስን ኬ ሃዓፕድኬሬ ኤዔድንካን ኬዔዝዳብ ባዓብስን ሳዓብት ማዓትካን ዬይዳኬታም ኬዔዝዳብ ሃዓም ጋዓርዴ።