21. ሳዓቢ ባዓባ ሳዓቢ ዪ ሳይሳቓብጎ ክ ኬዔዛቓክ ጉሜርና

ኣኪ ብሬዜን ሳዓቢ ባዓባ ሳዓቢ ዪም ሳይሳቓብናም ኦይትንትካን ጶቕሽቴ ብሬና ሳዓቢ ዪም ሳይሳቓብት ጉሜርና ኣዳምዴኬ ሄዋንዴክ ሃዓዴ፤ ሳዓቢ ጉንስንት ማታም ግእዳብ ሄዋኔት ካዓሥግራንክ ኣዼርድምሽ ጉሜርናም ኬዔዜ፤ ሄዋኔታም ጌሽሻቓብን ጉንስን ሴጣን ሃዓቔ፤ ጉሜርና ሳዓቢ ዪም ሳይሳቓብን ሴጣናም ማቕንቴኮት ሺችዴ ጋይንትዬ።

ክጎክ ፔጬዜናሜድ ኤዔድንት ሱሴና ሙዳ ኣንጄት ኬ ቴይይቴምሽ ሳዓቢ ኣብራምጎክ ጉሜርናም ኬዔዜ፤ ኮዖና ኣንጄትና ኦስ ብሬዜን ሳዓብዳንክ ሳዓርሳቓብን ሃዓድንክ ቦዖድምዴ፤ ኖዖ ፔጬዜን ዶዖቕዴድ ኤዔድንት ሱሳ ማዓሣቔድን ኬ ዻቕቴምሽ ማዓስዴ።

ኦስ ብሬዜን ሙሴምሻብ ኣብ ማዓትካን ዬይዳኬታም ኬዔዝዳባም ይ ዻዓስስድምሽ ሳዓቢ ሙሴካን ጉሜርናም ኬዔዛቔ፤ ኮዖና ካፕስዮ ሃዓዳብን ሳዓቢ ዪም ሳይሳቓብንጎክ ኬዔዜርሳቓክ ኣብ ጉሜርን ሃዓቔ።

ካዓሥንግራንክ ዎላቓብን ሳዓብት ኤዔድንዜን ባዓቢ ማዓሦ ሌፒ ሴጽካን ክ ባዓምድምሽ ሳዓቢ ባዓብስን ዳዊትካን ጉሜርናም ኬዔዛቔ፤ ኮዖኔሬ ሳዓቢ ዪም ሳይሳቓብን ዳዊት ካዓሥንግራንክ ዎላቓብን ማዓዴ ጋይንትዬ።

ሳዓቢ ክላ ጫዓቓ ይ ኣርድምሽ ማዓትካን ዬይዳኬታም ኬዔዝዳብን ኤርማስጎክ ጉሜርናም ኬዔዛቔ፤ ኮዖና ጫዓቔና ሳዓቢ ሲና ባሌንዜን እስራኤል ኤዔድን ኪክን ክ ኣርዛቓክ ጫዓቔንምሽ ዳክዬ፤ ክላ ጫዓቓ ኣርትንክ ሳዓብት ካርቴና ኤዔድንት ቡዑዴግር ክልክዴ፤ኤዔድኔሬ ይንት ማቴክ ሳዓባም ኤስዴኬ ኤዔድንክቴሬ ማዓዴኬ ሳዓቤሬ ዳቔልስንኬታም ኔጋኔ ኬዔን ጋዓዴ ሳዓቢ ዪም ሳይሳቓብኔሬ ክላ ጫዓቔናም ካንክ ዬዴ።

ታዓሬ ሳዓብት ማዓትካን ዬይዳኬታም ኬዔዝዴድን ሳዓቢ ዪም ሳዓሳቓብስን ማዓትካን ዬይዳኬታም ኬዔዝዳብ፥ ኤዔድናም ሳዓቢ ኪክን ቔዔሽምሽዳብን፥ ኮይኔሬ ባዓቢ ማዓዴ ጋይሴኬ፤ ማዓትካን ዬይዳኬታም ኬዔዝዳቤሬ ማዓዴ።

እስራኤል ኤዔድንት ኤዔድናም ሳዓቢ ኪክን ቔዔሽምሽዴድን ይንት ዳቔልስንጎክ ይዜን ዣእዳክ ቓእስንኬት ኦዖላይሲ ኤዔድን ካርግር ሳዓብካን ጪልሽት እሜናም ታዓዴኬ ኣልካ ኤዔድናም ሳዓቢ ኪክን ቔዔሽምሽዴድን ኤዔድንካን ሳዓብዳ ምክሴኬ፤ ሳዓቢ ዪም ሳይሳቓብን ዶዖፔን ጪልሽት እማ ማዓስሶ ይ ምታም ሳዓብካን እምዳብ ዶዖፔናምባብ ኤዔድናም ሳዓቢ ኪክን ቔዔሽምሽዴድንት ጌሥዳብን ማዓዴ።

ባዓብስን ባዓምንዜይንት ጌሥዳብኬ ኤዔድንዜን ቤዔርዳብክ ኤዔዴ፤ ሳዓቢ ዪም ሳይሳቓብን ኣዓካስይንት ዳዊት ባዓሚ ካርንዜን ዶዖቕዳብ ዶዖፔናምባብ ባዓቢ ማዓዴ፤ ፔጫ ሙዴዜን ሌፒ ሴጽካን ጌሥዴ፤ ኮይኔሬ ሙዳ ሴጽካን ኡዝሜክ ቤዔርንትክ ዶዖፔንኣኬታም ዜዔዝዴ።

ሳዓብት ማዓትካን ዬይዳኬታም ኬዔዝዴድን ሳዓቢ ዪም ሳይሳቓብንጎክ ኣብንዳ ቤድሚ ሬያም ኬዔስቴኬ፤ ማዓትካን ዬይዳኬታም ኬዔዝዳብን ምልካስ ሳዓቢ ዪም ሳይሳቓብን ሃዓድካኬት ብሬዜን ጋእሼባብ ማዓትካን ዬይዳዳኬታም ኬዔዝዳብን ሃዓድምሽ ብሬዜን ኬዔስቴ፤ ሳዓቢ ዪም ሳይሳቓብን ዎላቕ ሙናኣክዳንክ ክ ኣዼርድምሽ ማዓትካን ዬይዳኬታም ኬዔዝዳብን እሳስ ኬዔዛቔ፤ ማዓትካን ዬይዳኬታም ኬዔዝዳብን ምካስ ሳዓቢ ዪም ሳይሳቓብን ቤቴሌም ካትሜንግር ኣዼርዴ ጋይሳቔ።

ማዓትካን ዬይዳኬታም ኬዔዝዳብን እሳስ ሳዓቢ ዪም ሳይሳቓብን ጋልሌግር ዶዖቕዴ፤ ቡዑዴይንት ኣይሳቔድ ኤዔድናም ዛፕስስዴ፥ ኮይኔሬ ዎእሽትዮ ዪም ቴይራቔድናም ባዛ ካይሳ ዉትንትናም፥ ዻኬርታ ኤዔድንካን ቡልምንትናም ኬዔዝዴ፤ ታዓሬ ኮይን ሳዓቢ ዪም ሳይሳቓብን ሃዤርታ ኤዔድናምኬ ኤስርንቲ ሼድንቲ ኬዔዝንቲ ሙክንቲ ዪን ማዓታዬድናም ክ ሃልሽሽድምሽ ማዓትካን ዬይዳኬታም ኬዔዛቔ።

ታዓሬ ማዓትካን ዬይዳኬታም ኬዔዝዳብን እሳስ ሳዓቢ ዪም ሳይሳቓብን ሃሬሬ ዜንክት ዳክዳይክ ኪም ይዤርድምሽ ኬዔዛቔ፤ ኣቤድ ማዓትካን ዬይዳኬታም ኬዔዝዴድን ሳዓቢ ዪም ሳይሳቓብናም ዴይስዴድን ኬዔና ኣብሌንክትዜን እጣ ኬ ዣቕድምሽኬ ኤዔዴኔክት ኪም ጋርድምሽክ ብሬዜን ኬዔዛቔ፤ ማዓትካን ዬይዳኬታም ኬዔዝዳብን ዜክራስ ሳዓቢ ዪም ሳይሳቓብስናም ኪም ኤሳይቴ ጋዓዳብን ቦንዴኬ ታማ ብሪ ኪን ካሼርድምሽ ኬዔስቴ።

ኣልካ ማዓትካን ዬይዳኬታም ኬዔዝዳብስን ሳዓቢ ዪም ሳይሳቓብንት ዴእንጎካን ኬዔስቴ፤ እሳስ ኤዔድና ሳዓቢ ዪም ሳይሳቓብንዜን ኬ ትጽምድምሽ ዜንክቴሬ ኬ ላጽድምሽ ኪም ኬ ግእድምሼሬ ኬዔስቴ፤ ሬይ ሃሬሬ ቱንትሚ ዎዖናቕባብ ክ ማዓድንኬሴሬ ኪም እክክዴኬ ጋእሼንዳ ሴዔቕርኬ ካልርክ ዴእዴ።

ታዓሬ ማዓትካን ዬይዳኬታም ኬዔዝዴድና ሳዓቢ ዪም ሳይሳቓብን ዳቔልስንት ዳክባብ ዶዖፔናምባብ ማዓዴ ጋይሳቔኬ፤ ኣቤድ ኤዔድንት ዳቔልስንት ቓእስናም ቴይንትክ ኖዖት ሞልትግር ላቕምናም ታዓዴ፤ ኮዖጎክ ሳዓቢ ዪም ሳይሳቓብናም ካሌርስንትና ሳዓብት ጶቕሺ ሃዓቔ።

ሳዓቢ ዪም ሳይሳቓብን ዴእድምሽኬ ሳዓቢ ታዓሬ ኪም ዻዓስድምሽክ ማዓትካን ዬይዳኬታም ኬዔዝዴድና ብሬዜን ኬዔስቴኬ፤ ሳዓቢ ባዓባ ሳዓቢ ዪም ሳይሳቓብንት ዴእንኬ ዻዓምንትንጎክ ዳቔልሲ ኤዔድናም ዻቕሽካን ጶቕሽይንታም ቦዖሥንትክ ክላ ጫዓቔናም ዬዴ።

ሳዓቢ ማዓትካን ዬይዳኬታም ኬዔዝዴድንካን ሳዓቢ ዪም ሳይሳቓብንጎክ ቤድሚ ሬያም ኬዔን ኬዔስቴ፤ ዳይንኬሬ ሳዓቢ ዪም ሳይሳቓብን ኬዔና ማዓትካን ዬይዳኬታም ኬዔዝዴድንት ሴጼንግር ሃዓትክዬ ኬዔና ኬዔስቴንግራንክ ማቕንቴስን ኬዔዛኬት ኦይዲ ሜቶ ቦንንት ቡዑር ኡዝማ ይንት ሴጼንግር ሳዓቢ ባዓባ ሳዓቢ ዪም ሳይሳቓብናም ፔጬዜን ኦይዴ።