20. ዎእሽቲ ቴይኬ ዎእሽትዮ ቴዬቴግራንክ ማዓትንቲ

እስራኤልት ባዓምንኬ ይሁዴት ባዓምንክ ሳዓብዜን ዳቔልሲ ዎዖንሴኬ፤ ሳዓቢ ኬ ኪክን ሲና ባሌንዜን ክ ኣርዛቓክ ጫዓቔናም ጋርሼኬ፤ ሳዓቢ ይራ ኬ ማዓቴምሽኬ ኣልካ ኪም ኬ ምክስቴምሽ ኬዔን ጶቕሽሽካን ማዓትካን ዬይዳኬታም ኬዔዝዴድናም ኬራ ኦይሤ፤ ኬታ ዳይንክ ኪን ኤዔኣዮቴ ጋይሴኬ።

ካንካን ሳዓቢ ኬዔም ይዥዴድን ኬ ሺችቴምሽ ኤዔእንትክ ቓስቴንን ባዓብናሜሬ ቓእሴ፤ ዛምክ ዳቕላይሳክ ኣሶር ፔጭንት ባዓብስና እስራኤልት ባዓምናም ካይሴ ሬይ ሜይዳክ ሙዳም ይንክ ቴዬ፤ ፔጬንግራንኬሬ ጋዓጽናም ካይሴ።

ኣሶር ኤዔድና ኤንሥዴድናም፥ ዎድምቴድናም፥ ኮይኔሬ ጉዑሼድናም ሙዳ ሱጼትዳቦ ኣሶርግር ኬዔም ቴይ ካዬ፤ ዪም ዴይሳራቔድና ጋእሻ ቓምእ ሃዓቔድ እስራኤል ኤዔድን ዬሌክ እስራኤልግር ኔጌኬ።

ኮዖዛንኬሬ ኣሶር ኤዔድና እስራኤልት ባዓምና ይ ዳያክ ራቕንዜን ኬ ዶዖቕቴምሽ ኣብዛሜዳም ታዓዴኬ፤ ኣብዛሜድኔሬ ኮፕምቴድ ካትሜናም ኣልክምሲ እክሴኮ ዋዓር ኔግንትክ ዶዖቕዳቔድ እስራኤል ኤዔድናም ቴይሴኬ ኣብዛሜድናም ቴያቔድ እስራኤል ኤዔድንት ካዓሥንግራንክ ሳምራ ኤዔድን ኬዔም ጋዓርዳቔ።

እስራኤልት ባዓምንግራሜድ ኤዔድና ሳዓብዜን ቡዑድ ኬ እዝካኬትጎኬ ክካን ኬ ኤዔእካኬትጎክ ሃስን ኬዔም ክ ቓእሳቕንኬሬ ይሁዴት ባዓምንግራሜድን ካናኣን ኤዔድንት ጾይስናምኬ ኣብናሜሬ ምክሴኬ፤ ሳዓቢ ኬዔም ጶቕሽሻቕምሽ ማዓትካን ዬይዳኬታም ኬዔዝዴድናም ኦይሤ፤ ኬታ ዳይንክ ኤስራዮቴ ጋይሴኬ።

ኣሶር ኤዔድና እስራኤልት ባዓምናም ኬ ካይሳቓክ ዎላቕ ማቶ ቦንት ቡዑር ይሁዳ ፔጭንት ባዓምናም ኬ ዶብቴምሽ ሳዓቢ ባብሎን ኤዔድናም ታዓዴ፤ ባብሎን ዛምንዳ ባዓምንት ዶዖቕድንዳ ሃዓቔ፤ ይሁዴት ባዓብስን ናቡኬዴናጾርት ፕክሽዳብ ማዓትንትካንኬ ቦንክ ቦንክ ቤድሚ ሶሊ ኪን ካሽንትካን ኤዔድምሴ።

ዳይንኬሬ ቶክሚ ቦንት ቡዑር ይሁዴት ባዓብስን ባብሎንካን ኤዔእክዬ፤ ካንካን ባብሎን ኤዔድና ማዓቲ ሃዓድዮ ይሁዴት ባዓምንግራሜድናም ዳዓሚ ዶብዜኬ፤ ዬሩሳሌምት ካትሜናሜሬ ዬዜኬ፤ ጪሊ ኤዬናሜሬ ካይሴኬ ኮይኔሬ ካትሜንቴኬ ጪሊ ኤዬንቴክ ሬይ ዶዖቕድንዳ ሙዳም ቴዬኬ።

ይሁዴት ባዓብስን ዪን ክ ኤዔእክንካን ናቡኬዴናጾር ኪም ቓእስካን ክት ዳዓሚ ዶብዴድን ይሁዴት ባዓብስንት ኣንግ ይንሥናም ብሬዜክት ዴይሴርሴ ክቴሬ ኣዓፕናም ዢልሼርሼ፤ ኮዖት ቡዑር ባብሎን ፔጭግር ዻክር ኤይግር ክ ዴእቴምሽ ባዓብስናም ቴዬኬ።

ናቡኬዴናጾርኬ ክት ዳዓሚ ዶብዴድንክ ዎዖኒ ሃዓምግር ኬ ዎዖንቴምሽ ጋእሻ ቓምኤርሳቔድናም ዬሌክ ጋርንትክ ይሁዴት ባዓምንግራሜድ ኤዔድናም ሙዳ ባብሎንግር ዎእሽትዮ ቴዬኬ፤ ሳዓብት ኤዔድና ጉሜር ፔጭናም ኬ ጋርቴምሽ ማዓሴርሳቕንዳ ሴጽን ኮዖም ዎእሽትዮ ኮዖም ቴይ ጋዓርዴ።

ሃስንዳይንኬሬ ሳዓቢ ዎእሽትዮ ቴይንትክ ኤዔድናም ዳቔልስንኬትጎክ ኬዔም ይ ቓእስድንኬሬ ኬዔማምኬ ጉሜርይንት ኬዔስትናም ዋልክዬ፤ ሳዓቢ ኤዔድናም ጶይንትናምኬ ይንት ማዓትካን ዬይዳኬታም ኬዔዝዴድንጎክ ኬዔም ኬዔስስንትናም ጋርክዬ፤ ቦን ታብዜት ቡዑር ጉሜርሽዳክ ፔጬንግር ኣልክምሲ ኬ ማዓድምሽ ኬዔዜ።

ቦን ታብዜንት ቡዑር ፓርስ ፔጭንት ባዓብስን ባብሎናም ሺችሼ፤ ካንካን ፓርስት ባዓምንት ጌሥና ባብሎንት ባዓምንት ጌሥንግር ማዓሤ፤ ታ እስራኤል ኤዔድና ኣይሁድ ኬዔም ጋዓርዴ ጋዓጽኔኬት ኡክናይንታም ሙዳ ባብሎንግር ጋርሻቔዴኬ፤ ጋእሻ ጋልቴርሳቔድ ቶክሚ ኣይሁድ ኤዔድና ዬሌክ ኣይሁድ ፔጭናም ጶሼኬ።

ፓርስት ባዓብስንት ጌሥና ዛምንዳ ዳይንኬሬ ይ ዬዛቔድንካን ኣቴርዳብ ሃዓቔ፤ ቒሮስ ፓርስ ኤዔድንት ባዓቢ ክ ማዓሣኬት ቶክሚ ሴጽት ቡዑር ኣይሁድግር ማዓትንትካን ዝግዳብ ሃይዬሬ ኣይሁድ ፓርስ ፔጭናም ጋርሽዮ ይሁዴግር ማዓትንቲ ኪን ማዓድምሽ ኬዔዜ፤ ጪሊ ኤይናም ኣልክምሲ እኬርቴምሽ ሶሊት ኬልሺ ኔክዳይክ እሜርሴ! ካንካን ዎእሽትዮ ቴይርክ ዶዖቔርሳቓክ ታብዛ ታም ቦንንት ቡዑር ቶክሜድ ኣይሁድ ኤዔድንት ካሽምና ኣይሁድ ፔጭግር ዶዖቕዳክ ዬሩሳሌም ካሜንግር ማዓቴኬ።

ኤዔድና ዬሩሳሌምግር ይ ዣእሻኬንክ ጪሊ ኤዬናምኬ ካትሜንት ሼዔጌክ ዶዖቕዳክ ጉርዴናምክ ኣልክምሲ ክልሴኬ፤ ሃስን ዳይንኬሬ ታዓክ ዬካ ኣቤድ ኤዔድን ሾላ ቴቼርቴድ ኬ ዳይንኬሴ ኣልክምሲ ጉሜር ፔጭንግር ዶዖቕሴኮ ጪሊ ኤዬንግር ምክሴኬ።