18. ካሽምቴንዳ ባዓብና

ቤድሚ ቦንት ቡዑር ዳዊት ዴእሴ፤ ይንሥንክት ሶሎምን እስራኤል ኤዔድንዜን ባዓምሴ፤ ሳዓቢ ኪን ኮይን ኬዔዜ ጋዓጽ ሃራ ክ ዝግድንኬሬ ኪም ጎይሴ፤ ሶሎምን ሩዑርማም ክ ምክሳኬንክ ፔጬት ዜን ጋእሻ ሩዑርምባብ ኤዔድ ኪም ማዓስሴ፤ ሶሎምን ቤድሚ ሬያም ኤስንትክ ጋእሻ ሩዑርምክ ቤዔርዳብ ማዓሤ፤ ኣልክምሴሬ ሳዓቢ ጋእሻ ዎድምቴባብ ኪም ማዓስሴ።

ሶሎምን ዬሩሳሌምግር ባዓቤን ዳዊት ጶቕሻቓኬታምኬ ኤያ እክንትካን ዝክስዴድ ሱዼርሳቔድንክ ጪሊ ኤዬናም እክሴ፤ ታ ኤዔድና ሳዓቢ ኪክን ማሽሜርዳክ ኣብላ ኤይን ኦዖላይስ ጪሊ ኤዬንግር ሳዓባም ምክሴኬ፤ ጪልሽት እሜሬ ኪን ታዓዴኬ፤ ሳዓቢ ሃዓድዮ ጪሊ ኤዬንግር ሃዓፔርሴ፤ ዋዓሬሬ ኤዔድን ኪክን ማዓሤ።

ዳይንኬሬ ሶሎምን ፔጫ ኣብግራሜድ ማዓኔናም ናሼ፤ ዎላቕ ሺ ማዓዴድ ቤድሚ ማዓናም ቴይንትክ ሳዓብካን ኤዔእክዬ ኬዔና ማዓኔንግራንክ ቤድምና ኤዔድ ሃዓምዛንክ ሃዓዳቔኬ ይንት ጾይስናም ታዓዴኮ ኬዔም ምክስንት ዬዜኬ፤ ሶሎምን ይ ጋልቴርሳኬንክ ኖዖ ታዓሬ ኬት ጾይስናም ምክሴ።

ሳዓቢ ሶሎምንዜን ጋዓምሴ ኖዖ ቡዑድ ክ እስካኬትጎክ ኪም ቓእስምሽ ሶሎምን ክ ዴእሳኬት ቡዑር እስራኤልት ኤዔድናም ቓስቴን ካርዜን ባዓቢ ኬ ማዓድምሽ ኬዔዜ።

ሶሎምን ክ ዴእሳኬት ቡዑር ይንሥስንክት ሮብኣም ባዓምሴ፤ ሮብኣም ጋዴባብ ሃዓቔ፤ እስራኤል ኤዔድና ሙዳ ባዓምንክታም ዶዖፕስስካን ሱዽምስዮ ሃዓዴኬ፤ ሶሎምን ቤድሚ ጋእሼንዳ ዎዖኒ ኬዔም ክ ዎዖንስምሽኬ ጊሬሬ ኬዔም ክ ካሽሽምሽ ሮብኣምካን ኣትርይንታም ኬዔዜኬ።

ሮብኣም ጋድርምክ ኮይን ኬዔን ጋይሴ፤ «እባብ ሶሎምን ጋእሼንዳ ዎዖኒ ዎዖም ዎዖንስቴ ጋይሴቶ ጶቕሽቴቴ፤ ዳይንኬርሬ እታ ክዛንክ ጋዓጺ ጋእሼንዳ ዎዖኒ ዬዔም ዎዖንስድቴ ክዛንክ ጋዓጽቶ ዬዔም ቓእስድቴ.»

ታሜና እስራኤል ኤዔድንት ማታ ሱስና ሮብኣምዜን ኣቕልምሴኬ፤ ቓስቴን ማታ ሱስን ዬሌክ ክካን ቡዑድ እዜርቴድ ማዓሤኮ ክራ ሙክዳቔኬ፤ ኬዔና ቓስቴን ማታ ሱስና ይሁዴት ባዓቢ ማዓሤኬ።

ሮብኣምዜን ዳቕልምሳቔድን ታማ እስራኤል ኤዔድንት ማታ ሱስና ኢሮብኣም ጋዓርዳብ ኤዔሥናም ባዓብንት ማዓስሶ ኪም ባዓምሴኬ፤ ኬዔስጎክ ዶዖቕዳክ ፔጬንግር ባዓምይንታም ዎይሴኬ፤ እስራኤልት ኤዔድንት ባዓምኔ ኬዔም ጋዓርዳቔ።

ኢሮብኣም ሳዓቤን ኤዔኣይቴ ጋይንትክ ኤዔድና ዳቔልሲ ኬ ዎዖንቴምሽ ኬዔም ማዓስሴ፤ ይሁዴት ባዓምንግር ዶዖቕዳክ ጪሊ ኤዬንግር ሳዓባም ምክስንትን ኦዖላይሲ ኤዔድን ምክስቴምሽ ቓስቴን ጾይስናም ኬዔን ኣክሼ።

ይሁዴቴኬ እስራኤል ኤዔድንት ይዥዴድኬት ማዓሤኮ ቤድሚ ሴጽካን ኪክ ኪካም ዳዓሚ ዶብምሴኬ።

ክላኣክ እስራኤልት ባዓምንዜን ባዓብና ሙዳ ዳቕሌድ ሃዓቔኬ፤ ኬዔና ባዓብንግራንክ ቤድምና ኬት ካርንዜን ባዓምካን ዝግዴድን ኣብን እስራኤል ኤዔድናም ዴይሴርሴ።

ባዓብን ሙዴንኬ ቤዴድን እስራኤል ኤዔድንት ባዓብንክ ጾይስናም ምክሴኬ፤ ጾይስናም ምክስንትኔኬት ቤድሚ ሴጽካን ጪልምንት ዳክንዳ ቤዔልምኬ ይንሥይንታም ጪልሽት እሜምሽ ማዓስሶ ኣሥዳቔኬ።

ይሁዴት ባዓምንግር ዳዊት ካዓሥና ሃዓቔኬ፤ ኬዔና ባዓብንግራንክ ዋይንና ባዓብና ዳቕላይሴድ ሃዓቔኬ ጾይስናሜሬ ምክስዳቔኬ፤ ባንግ ባዓብና ይንሥይንታም ካንክ ጾይስንካን ቴችዳቔኬ፤ ታዓሬ ቤድሜድና ይሁዳ ኤዔድና ሳዓቤን ኤዔእንት ጋርሼኬ ኣቤድ ጾይስንሜሬ ምክሴኬ።