17. ሳዓቢ ዳዊት ኪክን ክ ኣርዛቓክ ጫዓቔና

ሳኦል እስራኤል ኤዔድንት ብሬዜናምባብ ባዓብስን ሃዓቔ፤ ኖዖሬ ኤዔድን ዝግግዳቕምሽ ሮዖትምባብኬ ቤራይካምባብ ሃዓቔ፤ ሳኦል እስራኤል ኤዔድናም ክ ጌሥዳክ ብሬዜናሜድ ቶክሚ ቦንንግር ላቕምባብ ባዓቢ ሃዓቔ፤ ኮዖት ቡዑር ዳይንክ ሳዓብካን ኤዔኣያብ ዳቕላይሳብ ኤዔድ ማዓሤ፤ ካንካን ሳዓቢ ሴጻ ዎላቕ ሳኦልት ካርግር ባዓቢ ማዓዳብ ጋሌባብ ኤዔዳም እዜ።

ሳዓቢ ሳኦልት ቡዑር ባዓቢ ክ ማዓቴምሽ ዳዊት ጋዓርዳብ እስራኤልት ኣግሊ ይንሣም እዜ፤ ዳዊት ቤትሌም ጋዓርድንዳ ካትሜንግር ዶዖቕዳብ ቖሊ ግሽዳብ ሃዓቔ፤ ዳዊት ጋላ ጋሌንዳ ሴጼግር ባዓቤንት ቖልናም ክ ጶይድክ ቖልናም እሥዴድ ዞብኬ ድብ ጋዓርዴድ ዴብናም ዴይስታ ሃዓቔ፤ ዳዊት ሳዓብዜን ቡዑድ እዝዳብኬ ክካን ኤዔእዳብ ዋዬባብ ኡዝሜክ ዎዖንዳብ ሃዓቔ።

ዳዊት ዴዔጽምባብ ዳዓሚ ዶብዳብኬ ኤንሥዳብክ ማዓሤ፤ ዳዊት ኣኪ ኣግልምክ ይ ዶዖቕዳኬንክ ጎልያድ ጋዓርዳብ ጋእሼባብ ኤዔሥን ኪክን ዳዓሚ ዶብምሴ፤ ጎልያድ ዳዓሚ ዶብሚ ኤስቴባብ ጋእሻ ዛምባብ ኮይኔሬ ሮዖትምኔክት ላዓ ኣዓኒ ሃዓቔ፤ ዳይንኬሬ ሳዓቢ ጎልያዳም ዴይሶ እስራኤል ኤዔድናም ክ ዻቕሽቴምሽ ዳዊታም ኬልሼ፤ ኮዖት ቡዑር ዳዊት ኤዔድንት ብሬዜን ኪም ስሌርቴምሽ ማዓዴድ እስራኤልንት ይዥዴድንዜን ቤድሚ ሺችድባብ ማዓሤ።

ሳኦል ኤዔድና ዳዊታም ኬ ናሻኬትጎክ ክዜን ኒቕምሴ፤ ሳኦል ቤድሚ ሴጽካን ዳዊታም ዴይስካን ዝግዜ ካንካን ዳዊት ሳኦልዳንክ ዛቕሴ፤ ሴጻ ዎላቕ ሳኦል ዳዊታም ዴይስካን ዝጋሮ ሃዓቔ፤ ሳኦል ዳዊት ክራንክ ክ ዛቕዳክ ዎሬንግር ካዬ፤ ዳይንኬሬ ሳኦል ኪም ሼትክዬ፤ ዳዊቴሬ ሳኦልዳ ኡሣ ሃዓዶ ኪም ዴይስንቲ ኪን ማዓዳቔ፤ ዳዓኖንምሺ ኪም ዴይስክዬ፤ ዳዊት ባዓቢ ማዓትንትካን ኪም ዴይሳቕዬ ሳኦል ኤስቴምሽ ኣብሌንክቴት ዋጽራም ቴችትዮ ቴዬ።

ማቕንቴዜኔሬ ሳኦል ዳዓምግር ዴእሴ፤ ዳዊቴሬ እስራኤል ኤዔድንት ባዓቢ ማዓሤ፤ ዳዊት ላቕምባብ ባዓቢ ሃዓቔ፤ ኤዔድኔሬ ኪም ናሼኬ ሳዓቤሬ ዳዊታም ኣንጄ፤ ኪን ኡስቴምሼሬ ማዓስሴ፤ ዳዊት ቤድሚ ዳዓሚ ዶብምሴ፤ እስራኤል ኤዔድንት ይዥዴድናም ክ ሺችቴምሼሬ ሳዓቢ ኪም ኬልሼ፤ ዳዊት ዬሩሳሌማም ሺችቶ ዋዓር ይ ዶዖቕድንዳ ካትማ ኮዖም ማዓስሴ፤ ዳዊት ባዓምዳክ ቦንንግር እስራኤል ኤዔድና ዛሜድኬ ዎድምቴድክ ማዓሤኬ።

ዳዊት እስራኤል ኤዔድን ሙዴካን ሳዓባም ኬ ምክስድንዴትኬ ክካን ጪልሽት እማ ኬ ታዓድንዳ ጪሊ ኤያም እክንትካን ዝግዜ፤ ኤዔድና ኦይዲ ማቶ ቦንንግር ሙሳ እክሳቓክ ሳዓቢ ኪክን ማሽሜርዳክ ኣብላ ኤዬንግር ሳዓባም ምክስንትኬ ጪልሽት እማ ኪን ታዓዳቔ።

ዳይንኬሬ ሳዓቢ ጋዓና ኬዔዜካን ማዓትካን ዬይዳኬታም ኬዔዝዳብን ናታናም ዳዊትዳ ኦይሤ፤ «ሃዓና ዳዓሚ ዶብዳቓብ ኤዔድ ሃ ማዓሥንካን ኮዖ ጪሊ ኤዬናም ኢን እካያዬ» ይንሥስሃንት ኮዖም እክክዴ፤ ዳይንኬሬ ጋእሻ ሃዓም ኣንጅድቴ፤ ሃንት ካዓሥንግራንክ ዎላቓብን ኤዔድእስትዜን ባዓቢ ማዓሦ ሌፒ ሴጽካን ጌሥዴ!» ሌፒ ሴጽካን ክ ጌሥዳክ ሃክባብ ዳዊት ካዓሥንግራንክ ሳዓቢ ዪም ሳይሳቓብኔ፤ ሳዓቢ ዪም ሳይሳቓብስን ፔጬዜናሜድ ኤዔድንት ዳቔልስንኬትግራንክ ኬዔም ዻቕሽዳብን ሳዓብት እዴርቴባብስኔ።

ዳዊት ኬዔና ኬዔዜናም ይ ኤሴርታኬንክ ኮዖ ጋእሼንዳ ቦንችምኬ ቤድሚ ኣንጄትክ ኪን እምንትካን ጫዓቓ ኪን ክ ኣርዛቕንካን ሳዓና ሳዓባም ጎዖፕሼ ኪም ሳእሴ፤ ዳዊት ኬዔና ሬይናም ሃይንት ክ ዬይድኬሬ ኤሳቕዬ፤ ዳዓኖንምሺ ዶዖፔንካን ማዓሥንክ እስራኤል ኤዔድና ሳዓቢ ሳይሳቓብስን ሃዓድክንዴት ብሬዜን ሮዖትምንዳ ቦንካን ሃሬስንግር ዎላቕ ሺ ቦናም ጶይንት ኬዔም ዝክስዳቔ።

ዳዊት ኡዝማ ቤዔርንትኬ ቡዑድ እዜርቴባብ ማዓትንትክ ቤድሚ ቦንካን ጌሥሳቔ፤ ሳዓቤሬ ኪም ኣንጄ፤ ዳዓኖንምሺ ማቕንታ ቦንይንትግር ሳዓብት ብሬዜን ጋእሼንዳ ዳቔልሲ ዎዖንሴ።

ሴጻ ዎላቕ ዳዊት ዳዓሚ ዶብዴድን ሙዳ ኤዔርንታንክ ካዬኮ ዳዓሚ ኬ ዶብዳኬንክ ኖዖ ባዓሚ ኤያይንቴት ማዓል ዶዖቕሶ ዎላቕ ላቕማይስንዳ ማዓ ዜናይንታም ኮ ሼርድክ ኮዖም ሼጄ፤ ናዓምንኮቴሬ ቤርሳቤ ሃዓቔ።

ዳዊት ኣዓፕይንታም ኦስ ኮዛንክ ማዓስንትን ኦዖላይሲ ክራ ኮዖም ታዓዴርቴምሽ ኤዔድ ኦይሤ፤ ኮ ኪክኔሬ ራዓሤ ኤዔርኮት ማዓስቶ ኮዖም ኦይሤ፤ ቶክሚ ሴጽት ቡዑር ቤርሳባ «ሲርትቴ» ጋይሶ ዳዊትዳ ኬዔዛ ኦይሤ።

ኦርዮ ዪም ጋዓርዳብ ቤርሳቤት ክእስ ዳዊት እዴርቴድ ዳዓሚ ዶብዴድንግራንክ ዎላቓብን ሃዓቔ፤ ዳዊት ኦሮናም ዳዓምንግራንክ ማዓስትዮ ኤዔልስሴትዳቦ ማይንት ኪክን ክ ራዓታን ኪን ኬዔዜ፤ ዳይንኬሬ ኦርዮ ኔጋቔድ ዳዓሚ ዶብዴድን ዳዓምግር ኬ ዳይክ ኤዔርእስት ካያይቴ ጋይሴ፤ ካንካን ዳዊት ኦሮን ዳዓምንግር ማዓትዮ ክ ካይቴምሽኬ ኪም ዴይሴርቴምሽ ይዥምዴድን ጋእሻ ኬ ዛብዳኬትዜን ኪም ዬሥትዮ ዳዓምን ዶፕስዳብንቴን ኬዔዜርሴ።

ኦሮናም ዴይሴርሳኬት ቡዑር ዳዊት ቤርሳባም ማይንት ማዓስሶ ኮዖም ቴይሴ፤ ቡዑር ናዓ ዳዊቴን ኣንግ ይንሢ ኪን ኣጼ፤ ሳዓቢ ዳዊት ዎዖንሳቓክ ሬይንጎክ ጋእሻ ጋዓምሴ፤ ዳቔልስኔክት ሃስን ዳቔልድንዳ ኮ ማዓሥምሽ ዳዊካን ክ ኬዔስቴምሽ ማዓትካን ዬይዳኬታም ኬዔዝዳብን ናታናም ክራ ኦይሤ፤ ዳዊት ዳቔልስይንታም ቡዑጼ ሳዓቤሬ ኔጋኔ ኪን ጋይሴ፤ ዳዊት ኔጋቓክ ቦንይንትግር ካልምስድንዳ ሴጼግሬሴ ሳዓብቴንክ ሙክንትክ ኪን ኤዔእሴ።

ዳይንኬሬ ዳዊት ዎዖንሳቓክ ዳቔልስንካን ቓእሲ ማዓሥክ ይንሥስን ዴእሴ፤ ታዓሬ ኔጋቓክ ቦንይንትግር ዳዊት ኤዔር ኤዔድንግር ዳዓሚ ሃዓቔ፤ ዳዊት ዛምኔሬ ጋእሻ ላንቕሴ፤ ዳዊት ሳዓብዜን ቡዑድ ክ እስክንኬሴሬ ሳዓቢ ታዓሬ ጉሜር ኬዔስትንካን ይዜን ቡዑድ እዜርቴባብ ሃዓቔ፤ ቡዑር ዳዊትኬ ቤርሳቤክ ኣብ ኣንግ ይንሢ ኣጼኬ ናዓምንክታሜሬ ሶሎምን ጋይሶ ዎጄኬ።