16. ባዛ ካይሳ ዶዖቕንትናም ታዓሥዴድን

እያስ ዴእሳኬት ቡዑር እስራኤል ኤዔድና ሳዓቤን ኤዔእኬኬ ኔጋቔድ ካናኣን ኤዔድናም ሞልትግርንታንክ ኬዔም ዉሣቔኬ ዋይ ሳዓብት ካርቴናም ጶያቔኬ፤ ኤዔድንቴኔሬ ዶዖፔናምባብ ሳዓቢ ማዓሣቓብናም ምክስንትዛንክ ጋዓጽ ካናኣን ኤዔድንት ጾይስናም ምክስንቲ ዬዛቔኬ፤ እስራኤል ኤዔድንት ባዓብኬት ዳክ ሃዓቔ፤ ካንካን ኤዔድ ሙዳ ኡዝማ ካምሶ ዪን ሃዓፔርሳቓክ ሙዳም ዎዖንዳቔ።

እስራኤል ኤዔድና ሳዓብካን ይ ኤዔኣያኬትክ ዜን ዛብንትንኬትክ ሳዓቢ ኬዔም ይዥዴድን ካሌርስቴምሽ ማዓስሴ፤ ኬዔና ኬዔም ይዣዴድኔሬ እስራኤል ኤዔድንት ዚጌናም ሙዳ ዲብዜኬ፤ ኬት ዶዖቕዳኬታም ሙዳ ካይሴኬ፤ ቤድሚ ኤዔድናም ዴይሴኬ፤ እስራኤል ኤዔድና ሳዓብካን ኤዔኣ ጋርንትይንትኬ ኬዔም ይዥዴድንት ሃይልስንክ ቤድሚ ቦንካን ይ ዶዖቕሳኬት ቡዑር ሳዓብዳ ማዓቴኬ ሳዓባሜሬ ኬዔም ይዥዴድንዳንክ ክ ዻቕሽቴምሽ ኪም ጎይሴኬ።

ኮዖዛንኬሬ ሳዓቢ ኬዔም ይዥዴድንዳንክ ባዛ ካይሳ ኬዔም ዉሥዳባም ኦይሤ ፔጭቴንዜኔሬ ላቕምናም ታዓዴ፤ ዳይንኬሬ ኤዔድና ሳዓባም ኣልካ ዋልሴኬ፤ ጾይስናሜሬ ምክስ ዬዜኬ፤ ኮይን ማዓሥንካን ሳዓቢ ኡሣ ኬራ ዶዖቕዴድ ኬዔም ይዥዴድን ምዳም ኤዔድናም ኬዜን ዻዓስሴ ኬዔም ሺችሼኬ።

ምዳም ኤዔድና እስራኤል ኤዔድንት እስናም ሙዳ ቦን ታብዜካን ቴዬኬ፤ እስራኤል ኤዔድና ጋእሻ ጳሽታ ሃዓቔኬ፤ ፔጬት ምልእግርኬ ፔጬት ቖዖፔግርክ ዛቕሴኮ ኬ ሃዓቕንካን ምዳም ኤዔድና ኬዔም ሃዓፕካን ኬዔን ማዓትክዬ፤ ማቕንቴዜኔሬ ኬዔም ክ ዻቕሽቴምሽ ሳዓብዳ ኡዑግምሴኬ።

ሴጻ ዎላቕ ጌዶን ጋዓራብ እስራኤል ኤዔድ ምዳም ኤዔድን እስንይንታም ኬ ቴያይምሽ ዛቕስዮ እስን ግእዳቔ፤ ሳዓቢ ርኬግራንክ ዎዖንይንትካን ክ ኦይዳብን ጌዶንዳ ሃዓድዮ ኮይን ኪን ጋይሴ፤ «ሃዓና ዛምክ ዳዓሚ ዶብዳብ ኤዔሥኖ ሳዓቢ ሃ ኪክኔ፤ ካያዮ እስራኤል ኤዔድናም ምዳም ኤዔድንዳንክ ኬዔም ዻቕሽካ።»

ጌዶንት ባዓቤን ጾይሳም ምክሴርድንዳ እማ ክሪ ኡስቴክት ሃዓቔ፤ ሳዓቤሬ ጌዶኔን ካርን ኮዖም ክ ኮፕቴምሽ ኪን ኬዔዜ፤ ዳይንኬሬ ጌዶን ኤዔድንካን ይ ጳሽንካን ሃክስቴንክ ዬካ ጶይሴ፤ ኮዖዛንኬሬ እማ ካርናም ኮፕሴ ኮ ሊቕስቴንክ ዬካ ኣይስትዮ ኮዖም ካይሴ ሼዔጌሬሬ ሳዓብካን ክላ ጪልሽት እማ ካሪ ኡስሴ ሳዓቤን ጪልሽት እማም ኣሤ።

ሼናክንኮቴክ ዣማ ኤዔድና ኤዔድ ዎላቕባብ እማ ካርንኬታም ኮፕሳቕምሽ ሼጄኮ ጋእሻ ምዼርሴኬ፤ ጌዶናም ዴይስካን ጌዶንት ኤዔር ካዬኬ፤ ዳይንኬሬ ጌዶንት ባዓቤን «ሃራካኔ ሳዓብስዬንታም ኬልሽካን ዝግዴ? ኖዖ ሳዓቢ ይ ማዓሥንክ ይማትካን ክ ዳርማኔ!» ኬዔን ጋይሴ፤ ኮዖሜሬ ክ ጋይስንካን ኤዔድና ጌዶናም ዴይስኬኬ።

ምዳም ኤዔድና እስራኤል ኤዔድናም ቡርንትካን ኣልክምሲ ሃዓዴኬ፤ ፓይዴንኬቴሬ ጋእሻ ሃዓቕንካን ሃይዬሬ ኬዔም ፓይድካን ኪን ማዓታይ ሃዓቔ፤ ጌዶኔሬ ምዳም ኤዔድናም ዳዓሚ ዶብካንትካን እስራኤል ኤዔድናም ኤዔልሴ፤ ሳዓቢ ክጎክ እስራኤል ኤዔድናም ክ ዻቕሽድንዳ ማዓሥንክ ዶዖፕስንትካን ቓስቴን ሬይ ጴዔጳም ሳዓብዳንክ ጎይሴ።

ብሬን ጴዔጵና ኣብላ ፔጬዜን ፓቾ ዣሜት ዳዓዤና ኣብሌንት ዜን ዬሌክ ኮ ማዓታኔ ፔጭንዜን ኮ ማዓታይምሽ ጎይሴ፤ ሳዓቢ ኮይምሽ ዎዖንሴ፤ ኣልክምስንክ ሶይቲ ጌዶን ሳዓባም ኮይን ጋይሶ ጎይሴ፤ «ፔጬና ዣሜንት ዳዓዤንክ ኮ ልምጫኔ ኣብሌና ዳይንክ ዎቻ ኮ ማዓታኔ» ጋይሴ፤ ሳዓቤሬ ኮዖም ዎዖንሴ፤ ኬዔና ቓስቴን ጴዔጵና ሳዓቢ ኪክ ማዓሦ እስራኤል ኤዔድናም ምዳም ኤዔድንዳንክ ክ ዻቕሽድምሽ ንቓዓሽ ኪን ማዓሣቕንዴ።

ቦንዴኬ ታማ ቓስቴን ሺ ዳዓሚ ዶብዴድና ጌዶንዳ ሃዓዴኬ፤ ዳይንኬሬ ሳዓቢ ፓይዴኔኬት ቤድምዬ ኪን ጋይሴ፤ ካንካን ጌዶን ዳዓሚ ዶብካን ጳሻቔድን ቦንዴኬ ቓስቴን ሺ ዳዓሚ ዶብዴድናም ኤዔርኬት ኬዔም ማዓስሴ፤ ሳዓቢ ጌዶኔን ታዓሬ ዳዓሚ ዶብዴድንት ፓይዴና ቤድምዬ ኪን ጋይሴ፤ ኮዖካን ጌዶን ማኬን ማቶ ዳዓሚ ዶብዴዳም ኔክሾ ኣቤድናም ኤዔርኬት ኬዔም ኦይሤ።

ኮዖ ሶይትንክ ሳዓቢ ጌዶኔን «ምዳም ኤዔድንት ዳዓሚ ዶብዴድንዳ ሃችካ ኬ ጋዓዳኬታሜሬ ሃ ኤሴርድንክ ዎላቔሴ ኬካን ሃይ ጳሽካ» ኪን ጋይሴ፤ ካንካን ጌዶን ሶይትን ኮዖክ ምዳም ኤዔድንት ዳዓሚ ዶብዴድን ዳያኬትግር ሃቼ ምዳምት ዳዓሚ ዶብዴድንግራንክ ዎላቕባብ ቤዔልሥሴን ሃዓሜትይንቴክ «ጌዶንት ዳዓሚ ዶብዴድና ምዳምት ዳዓሚ ዶብዴድናም ክ ሺችድክ» ይ ሼጃቕንዴታም ክ ኬዔዝድክ ኤሴርሴ፤ ጌዶን ኮዖም ይ ኤሴርታኬንክ ሳዓቤን ጉምፔርሴ።

ኮዖዛንክ ጌዶን ይንት ዳዓሚ ዶብዴድንዳ ማዓቶ ሙዴንቴን ቖሽሜት ብልድሪ፥ ቲሌኬ ኩዑሼክ ኬዔን እምሴ፤ ምዳም ኤዔድንት ዳዓሚ ዶብዴድን ራዓታ ኬ ዳይክ ኬ ሃዉሻቓ ዳዓሚ ካርናም ቔዔንሴኬ፤ ጌዶንት ማኬን ማቶ ዳዓሚ ዶብዴድና ቲሌንግርንት ኩዑሻም ቴይታ ሃዓቔኬ፤ ምዳምት ዳዓሚ ዶብዴድና ዳይንክ ኩዑሼንት ሻዓክምናም ሼድንት ኬዔን ማዓታቕዬ።

ኮዖዛንኬሬ ጌዶንት ዳዓሚ ዶብዴድና ሙዳ ካሪ ዎላቔክ ቲሌይንታም ግእሴኬ ሳዓና ኩዑሼንት ሻዓክምና ብልድይንታም ፑጋሬኮ «ሳዓብቴኬ ጌዶንት ዳዓሚ ዶብዴድኔ» ጋዓሮ ኡዑግምሴኬ።

ሳዓቤሬ ምዳም ኤዔድንት ዳዓሚ ዶብዴድንዜን ሬይ ካይቴምሽ ማዓስሴ፤ ኪክ ኪካሜሬ ዴይሴኬ፤ ሳዓኔሬ ኤዔርንት ዶዖቕዴድ እስራኤል ኤዔድና ኪካም ኤዔልትዮ ምዳም ኤዔድንት ዳዓሚ ዶብዴድናም ዳይንትክ ኬልሽማሮ ቤድሚ ኤዔድናም ዴይሴኬ፤ ኔጋቔድናሜሬ እስራኤልት ፔጬንግራንክ ኬዔም ዳይሴኬ፤ ኮዖ ሴጽንክ ዎላቕ ማቶኬ ቦንዳ ሺ ምዳምት ዳዓሚ ዶብዴድን ዴእሴኬ፤ ሳዓቤሬ እስራኤል ኤዔድናም ዻቕሼ።

ኤዔድኔሬ ጌዶናም ባዓብንት ክ ማዓቴምሽ ኪም ዝግዜኬ፤ ጌዶን ዳይንክ ኮዖም ኬ ዬይቴምሽ ኬዔን ኤዔእክዬ፤ ዳይንኬሬ ኬታ ሙዴና ምዳም ኤዔድንዳንክ ይ ቴያቓክ ዎርቕት ሼክምናም ኬ ታዓድቴምሽ ጎይሴ፤ ኤዔድኔሬ ጌዶኔን ቤድሚ ዎርቕናም ኪን እምሴኬ።

ጌዶኔሬ ዎርቕናም ዬልክስቶ ኤዔድናም ሳዓቢ ኪክን ቔዔሽምሽዳብንት ቖቤርዳክ ጋላኣክ ኣብሌንምሽ ማዓስሶ ኮዖም ኣክሼ፤ ዳዓኖንምሺ ኤዔድና ኣብሌናም ጾይስምሽ ኮዖም ምክስንት ዬዜኬ ኮዖዛንክ ዻዓምሳቕንዳ ሳዓቢ ኬዔም ይዥዴድን ሺችቴምሽ ማዓስንትክ ኬዔም ቓእሴ፤ ማቕንቴዜኔሬ ኤዔድና ኣልካ ሳዓቢ ኬዔም ዻቕሽቴምሽ ጎይሴኬ ሳዓቢ ኬዔም ዻቕሽዳብ ኣብባባም ኬዔን ኦይሤ።

ኮይናሜትጎክ ቤድሚ ካርክ ዎዖንምሴ፤ እስራኤል ኤዔድና ዳቕልሲ ዎዖንዴኬ ሳዓቤሬ ኬዔም ቓቓእስዴ፤ ኣልክምሴሬ ሳዓብዳ ማዓዴኬ ሳዓቤሬ ኬዔም ዻቕሽካን ኬዔም ኬልሽዳባም ኦይዴ፤ ቤድሚ ቦንካን ሳዓቢ እስራኤል ኤዔድናም ዻቕሽካን ቤድሚ ካልሪ ካይሳ ኬ ዶዖቕቴምሽ ኬዔም ማዓስዴዳም ኬዔን ኦይቴ።

ማቕንቴዜኔሬ ኤዔድና ኣቤድን ሳዓባም ኤሳዬድንት ዶዖቕድምሽ ባዓቢ ኬዔን ባዓምሴርቴምሽ ሳዓባም ጎይሴኬ፤ ዳዓሚ ሴጽክ ዪም ኤንሥዳብ ዛምባብ ባዓብኬት ዶዖቕቴምሽ ዝግዜኬ፤ ሳዓቢ ዳይንክ ኮዖ ጎይስንኬታም ናሽክዬ፤ ዳይንኬሬ ኬ ዝግዛቕምሽ ባዓቢ ኬዔን ባዓምሴ።