15. ጉሜር ፔጭና

ማቕንቴዜን እስራኤል ኤዔድና ጉሜር ፔጭን ካናኣግር ኬ ኣርድንዳ ሴጻ ዣእሼ፤ እያስ ዛምክ ጉርዴርሳቓክ ካናኣንት ካትሜን እያርኬዳ ቓስቴን ጭርሽዴድ ኤዔዳም ኦይሤ፤ ኮዖ ካትሜንግር ጭርሽዴድናም ኣዓቻቕንዳ ቡዑሬሬ ሃስትዮ ኬ ዻቕቴምሽ ኬዔም ኬልሻቕንዳ ሬኣብ ዪም ጋዓርድንዳ ማዓ ጎዖሊ ዶዖቕዳቔ፤ ናዓሬ ሳዓብዜን ቡዑድ ኮ እዝንካን ኮዖም ዎዖንሳቔ፤ ጭርሽዴድን እስራኤል ኤዔድና እያርካም ኬ ካይስዳኬንክ ሬኣባምኬ ኤዔር ኤዔድንኮታምክ ኬዔም ዻቕሽንትካን ጫዓቓ ኮዖን ኣርዜኬ።

እስራኤል ኤዔድና ጉሜር ፔጭንግር ኣርድካን ዮርዳኖስ ኖቔናም ቓዓልንት ኬዔም ዝክስዳቔ፤ ሳዓቢ «ብሬዜን ኤዔድናም ሳዓቢ ኪክን ቔዔሽምሽዴድን ቓዓልቴምሽ ማዓስካ» ጋይሶ እያሴን ኬዔዜ፤ ኤዔድናም ሳዓቢ ኪክን ቔዔሽምሽዴድን ዮርዳኖስ ኖቔንግር ኣርድንቲ ኬ ዬዛኬንክ እስራኤል ኤዔድና ፔጫ ዎቼክ ኬ ቓዓልቴምሽ ፔጎክ ዶዖቕዳክ ኖቔና ሃችንትይንታም ጋርሼ።

ኤዔድና ዮርዳኖስ ኖቔናም ኬ ቓዓልታኬት ቡዑር ሳዓቢ ዛምኣክ እያርኬት ካትሜናም ሃስን ዳዓሚ ይ ዶብድምሽ እያስካን ኬዔዜ፤ ኤዔድኔሬ ሳዓብካን ኤዔእሴኬ፤ ዳዓሚ ዶብዴድንኬ ኤዔድናም ሳዓቢ ኪክን ቔዔሽምሽዴድንክ ሳዓቢ ኬዔን ኬዔዛቕምሽ ሴጼክ ሴጼክ ላዓ ሴጽካን እያርኬት ካትሜናም ሽራ ኡንግዜኬ፤

ኮዖዛንኬሬ ታፕሲ ሴጽንክ እስራኤል ኤዔድና ታብዛ ካርክ ካትሜናም ሽርትዮ ኡንግዜኬ፤ ማቕንቴዜን ካትሜናም ሽራሮ ኬ ኡንግድክ ዳዓሚ ዶብዴድና ኡዑግምሴኬ፥ ኤዔድናም ሳዓቢ ኪክን ቔዔሽምሽዴድኔሬ ፓራይንታም ፑግዜ ቔዔሽምሽዴድኔሬ ፓራይንታም ፑግዜኬ።

ኮዖዛንኬሬ እያርኬት ሼዔጌክ ዶዖቕዳክ ሴይኒ ኬዔልቴና ቡኬልሴ፤ ሳዓቢ ኬዔዝምሽ እስራኤል ኤዔድና ካሜንግር ዶዖቕዳክ ሬይ ሙዳም ካይሴኬ፤ እስራኤል ኤዔድንት ኤዔዳ ማዓሣቔድን ሬኣብኬ ኤዔር ኤዔድንኮታምክ ዬሌክ ዻቕሼኬ፤ ካናኣንግር ዶዖቕዴድ ኣቤድ ኤዔድና እስራኤል ኤዔድን እያርካም ኬ ካይስምሽ ይ ኤሴርታኬንክ ዪሜሬ ዳዓሚ ኬ ዶብድምሽ ጶቕሽንትክ ጳሼኬ።

ሳዓቢ ካናኣንግር ዶዖቕዴድ ኤዔድ ሃይኬስ ኤዔድንት ሱሴን ኪክን ላቕምክ ዶዖቕንትካን ኬ ኤዔድማን እስራኤል ኤዔድን ኬዔን ኬዔስታ ሃዓቔኬ፤ ዳይንኬሬ ጋባኦን ዪም ጋዓርዴድ ኤዔድና ካናኣን ኤዔድንት ሱሳ ማዓዴድንግራንክ ዎላቔና ኬራንክ ፔጋ ማዓድንዳ ካርግራንክ ሃዓዳቔድ ማዓትንትይንታም እያስካን ታዉሴኮ ኬዔዜኬ፤ ክ ኪክኔሬ ላቕምክ ኤዔድምካን እያሳም ጎይሴኬ፤ ጋባኦን ኤዔድና ሃብራንክ ኬ ማዓድንኬሬ እያስኬ እስራኤል ኤዔድና ሳዓባም ጎይሳቔኬ፤ ካንካን እያስ ኬ ኪክን ላቕምክ ዶዖቕንትካን ኤዔድምሴ።

ጋባኦን ኤዔድና ኬዔም ጌሽሽምሽ ኬ ኤስታክ ሴጽንክ እስራኤል ኤዔድና ምዽርሴኬ፤ ዳይንኬሬ ሳዓብት ብሬዜን ኬ ኣርዛቓክ ጫዓቓኬት ሃዓቕንካን ኬ ኪክን ይ ኣርዛቓክ ጫዓቔናም ሃጴ ጋይሶ ሴጻ ኣብንዴትክ ካናኣንግር ሃዓቔድ ኣብ ኤዔድንት ሱሴንት ባዓብና ኣሞራ ኤዔድና ጋባኦን ኤዔድን እስራኤል ኤዔድን ኪክን ላቕምክ ዶዖቕንትካን ኤዔድምንትንኬታም ኤሴርሴኬ፤ ካንካን ዳዓሚ ዶብዴድይንታም ሱጼኮ ጋባኦን ኤዔድናም ዳዓሚ ዶብዜኬ፤ ጋባኦን ኤዔድና ኬልሺ ሃዓፕንትካን ጎይስንትክ እያስዳ ጋዓና ኦይሤኬ።

ካንካን እያስ እስራኤልት ዳዓሚ ዶብዴድናም ሱእቴትዳቦ ጋባኦንግር ዣእካን ሶይትናም ሙዳ ሙክድዮ ጌሤ፤ ዣማ ጌልቲ ኬ ጶቕሽክዳይክ ኣሞራ ኤዔድንት ዳዓሚ ዶብዴድናም ዶብዜኬ።

ኮዖ ሴጽንክ ሳዓቢ እስራኤል ኤዔድንካን ዳዓሚ ዶብዜ፤ ኣሞራ ኤዔድናም ሪርሽንትክ ኣዚ ሴይንምሽ ጋእሼዳም ሃችንትክ ኣሞራ ኤዔድንግራንክ ቤድሚ ኤዔዳም ዴይሴ።

ኣልክምሲ ሳዓቢ እስራኤል ኤዔድን ኣሞራ ኤዔድናም ማቕንታ ኬ ሺችቴምሽ ማዓስንትካን ሃይናም ርኬዜን ካሪ ዎላቕዜን ኮ ሃጵቴምሽ ማዓስሴ፤ ኮዖ ሴጽንክ ሳዓቢ እስራኤል ኤዔድን ጋእሼንዴክ ኬ ሺችቴምሽ ማዓስሴ።

ሳዓቢ ኬዔና ዳዓሚ ዶብዴድናም ይ ሺችሻኬት ቡዑር ቤድሚ ካናኣን ኤዔድን እስራኤላም ዳዓሚ ዶብንትካን ኪክዜን ሱዽምሴኬ እያስኬ ኣቤድን እስራኤል ኤዔድንክ ዳዓሚ ዶብዞ ኬዔም ሺችሼኬ።

ዳዓምን ኮዖት ቡዑር ሳዓቢ ጋላ ጋሌድ ማታ ሱስንቴን ጉሜር ፔጭንግራንክ ዻዓልማ ሃዓምን ዣእዳኬታም ኬዔን ካሼ፤ ኮዖዛንክ ሳዓቢ እስራኤል ይንት ዎሴሌን ሙዴክ ላቕምክ ኮ ዶዖቕቴምሽ ማዓስሴ።

እያስ ጋልቴርሳኬንክ እስራኤል ኤዔድናም ሙዳ ዎላቕዜን ኤዔልሴ፤ ኮዖዛንኬሬ እያስ ሳዓቢ ሲና ባሌንዜን እስራኤል ኤዔድን ኪክን ክ ኣርዛቓክ ጫዓቔንካን ኬ ኤዔእቴምሽ ኤዔድንዳንክ ኔጋይንዳ ማዓትንትናም ኬዔን ጶቕሽሼ፤ ኤዔድኔሬ ሳዓቤን ኤዔእዴድ ማዓሥዮ ዶዖቕንትካንኬ ካርቴናሜሬ ጶይንትካን ጫዓቓ ኣርዜኬ።