14. እስራኤል ኤዔድን ፔጫ ጉርንግር ጎዖትምሴኬ

ሳዓቢ ኬ ኪክን ይ ኣርዛቓክ ጫዓቔንት ካርቴንካን ኬ ኤዔእቴምሽ እስራኤል ኤዔድንካን ይ ኬዔዛኬት ቡዑር ሲና ጋዓርዳክ ባሌንዛንክ ካዬ፤ ሳዓቢ ሲና ባሌንዛንክ ጉሜር ፔጭን ካናኣንግር ኬዔም ኤንሥንቲ ዬዜ፤ ሊሌኔሬ ብሬዜኬት ካናኣን ፔጭግር ካዬ፤ ኬቴሬ ራቕክ ካዬኬ።

ሳዓቢ ጉሜር ፔጭናም ካዓሥንኬቴን ይ እምድምሽ ኣብራምካን፥ ይሳቕካንኬ ያይቖብካንክ ጉሜር ካዔስታ ሃዓቔ፤ ዳይንኬሬ ታ ፔጬን ኮዖግር ቤድሚ ኤዔድ ዶዖቕዳቔኬ፤ ኬቴሬ ካናኣን ኤዔድኔ ኬዔም ጋዓርዳቔ፤ ካናኣን ኤዔድን ሳዓባም ምክሳዬኬ ዋይ ኪን ኤዔኣዬኬ፤ ታዉዴድ ጾይስናም ምክሴኬ ቤድሚ ሬያሜሬ ዎዖንዳቔ።

ሳዓቢ እስራኤል ኤዔድንካን ኮይን ኬዔን ጋይሴ፤ «ጉሜር ፔጭንግር ዶዖቕዴድ ካናኣን ኤዔድናም ሙዳ ካይስኬቴ፤ ኬ ኪክን ላቕምክ ሃይ ዶዖቕኬቴ ኬዔም ሃይ ቴይኬቴ፤ ጾይስንኬታሜሬ ሙዳ ካይስኬቴ፤ እካን ዬ ኤዔእክንካን እ ኦዖላይስ ጾይስንኬታም ምክስዴቴ።»

እስራኤል ኤዔድና ካናኣን ፔጬንት ዎስሌንዜን ኬ ዣእዳኬንክ ሙሳ ኬ ሙዴንዳንክ ኣዽርንት ታሜኬ ቓስቴንንግራንክ እዜ፤ ካዬኮ ፔጭቴንና ሃስናማ ኮ ዳይንኬሬ ኬ ጭርሽቴምሽ ጶቕሺ ኬዔን ኬዔዜ፤ ኤዔድን ኬዔና ዛሜዴኮ ዋይ ላንቕሜዴኮ ሼድንትካን ካናኣን ኤዔድናም ሼድንት ኬዔም ዝክስዳቔ።

ታሜኬ ቓስቴን ኤዔድና ካናኣንግር ኦይዲ ታም ሴጻ ሙክንትክ ሼጅዮ ማዓቶ ሃዓዴኬ፤ ፔጬና ጋእሻ ኤዔቕሜንዴ እስኔሬ ጋእሻ ዋዓር ኡዑሽቴ!» ጋይሴኮ ኤዔድኔን ኬዔዜኬ፤ ታሜና ጭርሽንካን ካያቔድን ዳይንክ «ካትሜና ጋእሻ ዛምንዴ ኤዔድኔሬ ሮዖትሜዴኬ ኬዔም ዳዓሚ ዎ ዶብድንክ ዶዖፔን ዎዖም ሺችዴኬ ዎዖም ዴዴይስዴኬ!» ጋይሴኬ።

ሳዓኔሬ ኣቤድ ቓስቴን ጭርሽንካን ካያቔድን ካሌብኬ እያስክ ካናኣን ኤዔድን ሮዖትሜድኬ ዛሜድክ ማዓትንትኔኬት ዶዖፔኔ፤ ዳይንኬሬ ዎታ ኬዔም ሽሺችዶቴ! ሳዓቢ ዎካን ኬዔም ዳዓሚ ዶዶብዴ!» ጋይሴኬ።

ኤዔድና ዳይንክ ካሌብዴኬ እያስዴክ ኤሴርኬኬ፤ ሙሳምኬ ኣሮናምክ ጋዓምሴኮ ኮዖ ዳቕልንዳ ፔጬንግር ሃራካኔ ዎዖም ታዓዴ? ዳዓምግር ዎ ዴእዳኬቴን ማዓኔዎንቴኬ ይንሢ ዎንቴክ ኤዔዴን ፕክሽዴድ ኬ ማዓዳኬቴን ግብጽግር ዎ ዶዖቕዳቕንክ ላቕሚ ሃዓቔ» ጋይሴኬ፤ ኤዔድኔሬ ግብጽግር ዪም ኤንሥዴድ ጋላ ኤንሥዴዳም እድካን ዝግዜኬ።

ሳዓቢ ጋእሻ ጋዓምሴትዳቦ ሳዓቢ ኪክን ማሽሜርዳክ ኣብላ ኤይንዳ ሃዓዴ፤ ኮይኔሬ ጋይሴ፤ «ዬታ ኢን ዬ ኤዔእክንካን ኤዔድን ሙዳ ፔጫ ጉርንግር ቱንትምክ ጎዖትምዴኬ፤ እያስኬ ካሌብክ ካይሳ ቦንዳ ቦንይንት ማዓሣቓብኬ ኮዖዛንክ ጋዓጽ ቦንይንት ማዓሣቓብ ሙዳ ኮግር ዴእዴኮንምሺ ሃስንዳይንኬሬ ጉሜር ፔጭንግር ኣርዳዬኬ።

ኤዔድና ኮዖም ይ ኤሴርታኬንክ ዳቔልስይንትጎክ ኣቴርሴኬ፤ ዳዓሚ ዶቤርዳክ ዚጌይንታም ቴዬኮ ካናኣን ኤዔድንዳ ዳዓሚ ዶብምካን ካዬኬ፤ ሙሳ ሳዓቢ ኬ ኪክን ይ ማዓትክንካን ኬ ካያይምሽ ኬዔን ጶቕሽሼ፤ ዳይንኬሬ ክራ ኤሴርኬኬ።

ሳዓቢ ኬ ኪክን ዳዓሚ ዶቤርዳኬግር ካያቕዬ፤ ካንካን ኬዔም ሺቼርቴ ቤድሚ ኤዔዳሜሬ ዴይሴርሴ፤ ኮዖዛንክ እስራኤል ኤዔድና ካናኣን ማዓቴኮ ፔጫ ጉርንግር ኦይዲ ታም ቦንካን ኦስ ኦንክ ጋዓዶ ዶዖቕሴኬ።

እስራኤል ኤዔድና ኦይዲ ታም ቦንካን ፔጫ ጉርንግር ሳዓቢ ኬዔም እሥሴ፤ ርኬግራንክ ማና ጋዓርዳክ ባልሻም ኬዔን እምሴ፤ ታዓሬ ዋዓሬ ኬ እሥቴምሽ ሞሬንግርኬት ኮኬናም ኬዔን ኦይሤ፤ ኮዖ ሴጽንግር ሳዓቢ ኣብሌንኬትኬ ኮጴንኬትክ ማቓይምሽ ማዓስሴ።

ሳዓቢ ሪርሽድንዳ ጎዖግክ ኖቓሜሴሬ ሴይኒ ላዓልግራንክ ኬዔን ዉሥሴ፤ ኮዖና ሙዳ ማዓድንኬሬ እስራኤል ኤዔድና ሳዓብዜንኬ ሙሴዜንክ ምዽራሮ ጉንድምዳቔኬ፤ ዳይንኬሬ ሳዓቢ ኣብራምካን፥ ይሳቕካንኬ ያይቖብካን ይ ኬዔዛቓክ ጉሜርና ታዓሬ ይዜን ቡዑድ እዜርቴንዳ ሃዓቔ።

ኤዔድና ኖቓ ይራ ዳካኬንክ ሴጻ ኣብንክ ሳዓቢ ሙሴካን «ሴይኒ ላዓልንካን ኬዔስካ ዋዓራንክ ኖቓ ዉትዴ» ኪን ጋይሴ፤ ዳይንኬሬ ሙሳ ሴይንንቴን ኬዔዝንትን ኦዖላይሲ ጉፔክ ቓስቴን ካርክ ክ ዋጽንካን ኤዔድን ሙዴት ብሬዜን ሳዓባም ቶክስሴ፤ ኤዔድን ሙዳ ዎጭቴምሽ ሴይኒ ላዓልንግራንክ ኖቓ ዉታቕሴ፤ ዳይንኬሬ ሳዓቢ ሙሴዜን ጋዓምሴትዳቦ «ጉሜር ፔጭቴንንግር ኣርዳያዬ» ኪን ጋይሴ።

እስራኤል ኤዔድና ኦይዲ ታም ቦንካን ፔጫ ጉርንግር ጉሪ ኡንግንትክ ኬ ጎዖትምሳኬት ቡዑር ሳዓብካን ኤዔኣቔድን ሙዳ ዴእሴኬ፤ ኮዖዛኬሬ ሳዓቢ ኤዔድናም ኣልክምሲ ጉሜር ፔጭንት ዎስሌዜን ኬዔም ኤንሤ፤ ሙሳ ጋልቴርታ ክ ማዓሥንካን ኤዔድናም ኤንሥንትክ ኪም ክ ኬልሽቴምሽ ሳዓቢ እያሳም እድዜ፤ ታዓሬ ሳዓቢ ሴጻ ዎላቕ ሙሴምሻብ ኣብ ማዓካን ዬይዳኬታም ኬዔዝዳብ ይ ኦይድምሽ ሙሴካን ጉሜርናም ኪን ኬዔዜ።

ኮዖዛንኬሬ ሳዓቢ ጉሜር ፔጭናም ክ ሼድቴምሽ ባሌት ማቴዜን ክ ኤፕቴምሽ ሙሴካን ኬዔዜ፤ ሙሴሬ ጉሜር ፔጭናም ሼጄ፤ ዳይንኬሬ ሳዓቢ ዋዓር ክ ኣርቴምሽ ኪን ኤዔእክዬ፤ ኮዖዛንኬሬ ሙሳ ዴእሴ፤ እስራኤል ኤዔድኔሬ ክካን ማኬን ታም ሴጽ ኤዔፕክ ኣቴርሴኬ፤ እያስ ክሌባብ ኬት ኤንሥዳብ ማዓሤ፤ እያስ ሳዓብዜን ቡዑድ እዝዳብኬ ኤዔእዳብክ ክ ሃዓቕንካን ላቕምክ ኤንሥዳብ ሃዓቔ።