13. ሳዓቢ እስራኤል ኪክን ክ ኣርዛቓክ ጫዓቔና

ሳዓቢ እስራኤል ኤዔድናም ኖቓ ጼዔርን ዜይምንዴጎክ ኬዔም ይ ኤንሣኬት ቡዑር ፔጫ ጉርንግር ሲና ጋዓርዳብ ባሌስንዳ ኬዔም ዣእሼ፤ ኮዖኔሬ ሙሳ ኣትዳክ ትርሼናም ክ ሼጃቓክ ባሌስኔ፤ ኤዔድና ባሌስንት ጎይር ኣብላ ኤይንታም ቶሼኬ።

ሳዓቢ «ኢን ዬ ኤዔእድንኬ ጫዓቓእስታም ዬ ጶይድንክ ቦንችምቴንዳ ዻዓልማ ሃዓሜንት ባዓብት ኤዔድናም ሳዓቢ ኪክን ቔዔሽምሽዴድ ኮይኔሬ ጪሊ ኤዔድ ኢን ማዓዴቴ» ጋይሶ ሙሴንኬ እስራኤል ኤዔድኔንክ ኬዔዜ።

ኤዔድና ማንፔስጎክ ዶዖቕንትይንታም ኬ ኡስሳኬት ማኬን ሴጽት ቡዑር ሳዓቢ ጉዑግንኬ ጳልቕንትክ ጩቤክ ኡፕሲ ጫዓጭክ ኤስምድንዳ ፓራ ሲና ባሌንዜን ሃቼ፤ ባሌንዜን ክ ኤፕቴምሽ ዪን ኬዔዜርሳቓብ ሙሳ ዬኬክ ሃዓቔ።

ኮዖዛንኬሬ ሳዓቢ ጫዓቓ ኣርድንትክ ኮይን ኬዔን ጋይሴ፤ «እታ ግብጽግራንክ ኤዔዴን ፕክሽዴድ ዬ ዳይክ ዬዔም ዻቕሻቓብ ሳዓብስዬንት ሙዴናም ማዓስዳብቴ፤ ኣቤድን ጾይስናም ሃይ ምክስኬቴ።

ጾይስናም ሃይ ኣክሽካ ኬዔም ሃይ ምክስካ፤ ሃራካኔ ጋዓርስንክ እታ ሙዴናም ማዓስዳብ ኒቕምዳብ ሳዓብቴ፤ ናዓምእስታም ጉሪ ሃይ ኤዔልካ ሃዉሽ ሴጽእስታም ሃ ጪልሽቴምሽ ጶቕሽካ ኮዖኔሬ ዎዖንሃታም ሙዳ ላዓ ሴጽግር ዎዖንካ ሃራካኔ ጋዓርስንክ ታፕሲ ሴጽና ሃ ሃዉሽድንዴትኬ ኢም ሃ ጶቕሽድንዳ ሴጼ።

ሃባባምኬ ሃንዴታምክ ቦንችካ፥ ሃይ ዴይስካ፥ ሃይ ቤዔልምካ፥ ሃይ ዲብካ፥ ሃይ ታውካ፥ ሃ ቤዔልሥስንት ማዓም፥ ኤዬንክታም፥ ዋይ ክት ማዓሣቕንዳ ሃምናሜሬ ሬይ ሃይ ኡቕምካ።»

ኮዖዛንኬሬ ሳዓቢ ኬዔና ታማ ካርቴናም ሴይኒ ቓስቴን ላዓታላትዜን ክልክቶ ሙሴን እምሴ፤ ሳዓቢ ኣቤሬ ካንክ ኬ ኤንሥምድንዳ ኣቤድ ቤድሚ ካርቴናም ኬዔን ኬዔዜ፤ ኤዔድና ኬዔና ካርቴናም ኬ ቦዖሥክንክ ዳይንክ ሳዓቢ ኬዜን ጋጋዓምዴ።

ታዓሬ ሳዓቢ እስራኤል ኤዔድና ኬ ዎዖንቴምሽ ይ ዝግዳክ ኣብላ ኤይንጎክ ኬዔን ኬዔዜ፤ ኮዖኔሬ ሳዓቢ ኪክን ማሽሜርዳክ ኣብላ ኤይኔ ኮዖም ጋዓርዴ፤ ጋእሻ እቤርሼርድንዳ ኣብሌክ ቓስቴንክ ካሼርሻቕንዳ ጎፓኮት ሃዓቔ፤ ሳዓቢ ዋዓር ክ ሃዓድንካን እቤርሽቴን ኣብሌንት ቡዑርጎክ ዶዖቕዳክ ጎፔንግር ኣርዳብን ኤዔድናም ሳዓቢ ኪክን ቔዔሽምሽዳብን ዬሌክ ሃዓቔ።

ኤዔድኔሬ ሙዳ ሳዓቢ ኬዔን ኬዔዛቓክ ካርቴናም ቦዖሥንትካን ሳዓባም ዬሌክ ምክስንትካን ኮይኔሬ ክካን ፓዓሽምቴድ ኤዔድክት ማዓትንትካን ኤዔድምሴኬ፤ ዳይንኬሬ ሳዓቤን ኤዔእንትካን ጫዓቓ ይ ኣርዛቓኬት ቶክሚ ሴጽት ቡዑር ጋእሼንዳ ዳቔልሲ ዎዖንሴኬ።

ሙሳ ቤድሚ ሴጽካን ሲና ባሌንት ማቴዜን ማዓሦ ሳዓቢ ኪክን ኬዔዝምዜን ሃዓቔ፤ ኤዔድና ክ ማዓቴቴንክ ዬካ ኪም ጶይንቲ ኬዔም ይሽሼ፤ ካንካን ኣሮንዳ ዋርቒ ታዓዴኮ ጾይሲ ኬዔን ክ ኣክሻን ኪን ኬዔዜኬ።

ኣሮኔሬ ዋዓኪ ኦዖቴምሽ ዋርቕንት ጾይስናም ኬዔን ኣክሼ፤ ኤዔድኔሬ ይ ናሽምሽ ጾይስናም ምክስ ዬዜኬ ጪልሽት እሜሬ ኮዖን እምሴኬ፤ ዳቔልስንኬትጎክ ሳዓቢ ጋእሻ ኬዔም ጋዓምሶ ኬዔም ካይስካኔሬ ጶቕሼ፤ ዳይንኬሬ ሙሳ ኬካን ምክሴ፥ ሳዓቤሬ ምክስንክታም ኤሴርሴ ኬዔሜሬ ካይስክዬ።

ሙሳ ባሌንዛንክ ክ ሃችድንኬ ጾይስናሜሬ ይ ሼጃኬንክ ጋእሻ ጋዓምሴትዳቦ ታማ ሳዓብት ካርቴን ክልኬርሳቓ ሴይንናም ኣይሴ።

ኮዖዛንኬሬ ሙሳ ጾይስናም ዴይስትዮ ሊቕሴ ኖቔት ዜኔሬ ኮዖም ኮፕሴ፤ ኖቔናሜሬ ኤዔድናም ዎእሼ፤ ሳዓቤሬ ኤዔድንዜን ክ ጋዓምስንካን ኤድሚ ኤዔድና ዴእሴኬ።

ሙሳ ኣልክምሲ ባሌንት ዜን ኤብንትክ ሳዓቢ ኤዔድኔን ኔጋኔ ክ ጋዓቴምሽ ምክሴ፤ ሳዓቤሬ ሙሴት ምክስናም ኤሴርንትክ ኔጋኔ ኬዔን ጋይሴ፤ ሙሳ ኣይሳቓኬት ኦዖላሲ ክላ ሴይናም ኣክሽቶ ታማ ሳዓብት ካርቴናም ክልክሴ።

1. ኮዖዛንኬሬ ሳዓቢ እስራኤል ኤዔድናም ሲና ባሌንዛንክ ጉሜር ፔጭን ካናኣንግር ኬዔም ኤንሤ።