12. እስራኤል ኤዔድና ግብጽግራንክ ዉትንትኬት

እስራኤል ኤዔድን ግብጽግራንክ ኬ ዉታቕስንካን ጋእሻ ኬዔም ጉሜርሼ ታ ኮዛንክ ኦስ ኤዔዴን ፕክሽዴድ ዳኬኬ፤ ጉሜር ዶዖቕዳክ ፔጬንግርንት ሙክንትዜን ሃዓቔኬ፤ ግብጽ ኤዔድና እስራኤል ዋርቕኬ ዱንዳምክ ኣቤድ ዴዔጽምንዳ ሬይ ኔክዳይክ ኬ ጎይሳቔድ ሬይ ሃሬናሜሬ ኬዔን እምሴኬ ግብጽግራንክ ኬ ዉትድክ ኣቤድ ኤዔድን ሳዓብዜን ቡዑድ እዞ ኤዔድን ኪክን ካዬኬ።

ሳዓቢ ብሬዜኬት ሙክድንዳ ሮዖርክ ሊላ ሶይትክ ኖዖክ ኬዔም ኤንሤ፤ ሳዓቢ ሙዳ ሴጽ ኬ ኪክን ክ ሃዓቕንካን ኬ ሙክዳኬንክ ኬዔም ኤንሤ፤ ዬይንት ኬዔም ዝክስድንዳ ሬይ ዳይንክ ራቕክቴክ ሙክንት ዬሌክ ሃዓቔ።

ቶክሚ ሴጽት ቡዑር ፓርኦንኬ ኤዔድንክቴክ ጶቕሽይንታም ኦዖክሴኮ እስራኤል ኤዔድናም ኣልክምሲ ይንት ፕክሽዴድ ኬዔም ማዓስካን ዝግዜኬ፤ ሳዓቢ ይንቲ ዬሌክ ዶዖፔናምባብ ሳዓቢ ማዓትንክታም ኤዔድን ሼድቴምሽ ኮይኔሬ ኖዖ ኮይን ዶዖቕዳብ ፓርኦንዛንኬ ጾይስንዛንክ ጋዓጺ ዛምባብ ክ ማዓድምሽ ኬ ኤስቴምሽ ፓርኦንት ጶቕሽናም ጋእሻዛፕሴ።

ካንካን ፓርኦንኬ ክት ዳዓሚ ዶብዴድንክ ኣልክምሲ ይንት ፔክሽዴድ ኬዔም ማዓስንትካን እስራኤል ኤዔድናም ኣልሴኬ እስራኤል ኤዔድኔሬ ግብጽ ኤዔድንት ዳዓሚ ዶብዴድን ሃዓድክ ይ ሼጃኬንክ ፓርኦንት ዳዓሚ ዶብዴድንኬ ዜይሚ ኖቓ ጼዔርንት ሞልትግር ይ ቔዔንምስምሽ ኤስቴኬ፤ ጋእሻ ይ ጳሽንካን «ግብጽግራንክ ሃራካና ዎዖም ዉሥሴ? ዴእንቶንቴ!» ጋይሶኡዑግምሴኬ።

ሙሳ እስራኤል ኤዔድኔንካን «ሃይ ጳሽኬቴ ክና ሳዓቢ ዬካን ዳዓምዴ ዬዔም ዻዻቕሽዴ፤» ጋይሶ ኬዔን ኬዔዜ፤ ኮዖዛንኬሬ ሳዓቢ ኖቓ ጼዔርንዳ ኬ ሙክቴምሽ ኤዔድንካን ኬዔስካ ጋይሶ ሙሴን ኬዔዜ፤ ኮዖዛንኬሬ ሳዓቢ ግብጽ ኤዔድና እስራኤል ኤዔድናም ኬ ሼታክምሽ ሊሌናም እስራኤልቴኬ ግብጽቴክ ሞልትግር ማዓስሴ።

__ኮዖዛንክሳዓቢብሬዜኬትሞሶሶምሽዎእሳቓኬሊሌናምእስሬልቴኬግብፅኤዴንትዎክዜንማዓስሴ፤ካንካንግብፅኤድናኬዔምሼድንካንኬዔንማዓትክዬ።__

ሳዓቢ ሙሴን ጼዔርንዜን ኣዓንይት ክ ኣፕቴምሽኬ ኖቔናሜሬ ክ ካሽቴምሽክ ኬዔዜ፤ ኮዖዛንኬሬ ሳዓቢ ኖቔንት ሞልትክ ሙኬርድንዳ ጎዖጊ ማዓትቴምሽ ኖቔናም ዦጋ ምዝዜንኬ ብቴዜንክ ኮ ሃችቴምሽ ኮዖም ማዓስሴ።

እስራኤል ኤዔድና ኖቔና ምዝዜንኬቴኬ ብቴዜንኬቴክ ዶቻ ኬዔን ማዓሥክ ፔጫ ዎቼክ ሙክቶ ቓዓሌኬ።

ኮዖዛንኬሬ ሳዓቢ ግብጽ ኤዔድና እስራኤል ኤዔድን ኬራንክ ዻቖ ካይንትንኬታም ኬ ሼድቴምሽ ሊሌናም ጎዖግንዛንክ ዻዓስሴ፤ ግብጽ ኤዔድኔሬ ቡዑርኬት ማዓሦ ኬዔም ኣልካን ጶቕሼኬ።

ካንካን ኖቓ ጼዔርንግርጎክ ራቕኬቴክ ሙክሴኬ ዳይንኬሬ ሳዓቢ ግብጽ ኤዔድና ኬ ካሌርቴምሽኬ ሴሬጌላ ጋዓርዳክ ዚጌንኬቴሬ ዻክምቴምሽ ማዓስሴ፤ «ሃስኬቴ ሳዓቢ እስራኤል ኤዔድንካን ዳዓምዜን ዳዬ!» ጋይሶ ኡዑግምሴኬ።

እስራኤል ኤዔድና ኖቓ ጼዔርናም ላቕምክ ኬ ቓዓልታኬት ቡዑር ሳዓቢ ኣልክምሲ ኣዓንይንታም ኖቔንዜን ክ ኦይታን ሙሴን ኬዔዜ፤ ኖዖሬ ክ ኤዔእስንካን ኖቔና ግብጽ ኤዔድንት ዳዓሚ ዶብዴድንዜን ማዓቲ ብሬይምሽ ማዓሤ፤ ግብጽ ኤዔድንት ዳዓሚ ዶብዴድን ሙዳ ኣቕዝምሴኬ።

እስራኤል ኤዔድና ግብጽ ኤዔድን ኬ ዴእሳኬታም ይ ሼጃኬንክ ሳዓብዜንኬ ሙሴዜንክ ቡዑድ እዜኬ፤ ሙሴሬ ሳዓብት ማዓትካን ዬይዳኬታም ኬዔዝዳብ ማዓትንትንክታም ዶዖፕሴኬ።

ኣልኬሬ እስራኤል ኤዔድና ሳዓቢ ዴእግራንኬ ኤዔድካን ፕክሽንትግራንክ ክ ዻቕሽንካን ጋእሻ ጉሜርሴኬ፤ ታ ሳዓብካን ፕክሽንትካን ባዛ ይዜን ዳኬድ ማዓቴኬ፤ እስራኤል ኤዔድና ሳዓቢ ግብጽ ኤዔድንት ዳዓሚ ዶብዴድት ኣዓንግራንክ ኬዔም ክ ዻቕሽንካን ክላ ዻቕንትንጎካን ቦንችካንኬ ሳዓባሜሬ ጎዖፕሽንትካን ቤድሚ ዬሥናም ዬሥሴኬ።

ሳዓቢ ሃስን ግብጽ ኤዔድናም ኬ ሺችቴምሽ ክ ማዓስሳቓኬታምኬ ኤዔዴን ፕክሽንትግራንክ ክ ዻቕሻቕምሽክ ጶቕሽንትክ ቦንክ ቦንክ ፓስጋ ጋዓርዳክ ሳዓቢ ሴጽናም ኬ ቦንችቴምሽ እስራኤል ኤዔድኔን ኬዔዜ፤ ላቕምቴባብ ቖሊ ዬርድ ቴቼኮ ጫዓርሚ ዋዓርንት ዳክንዳ ቕጻ ኪክን እሥንትክ ጉሜርኬቴ።