11. ፓስጋ ጋዓርዳክ ሳዓቢ ሴጽና

እስራኤል ኤዔድናም ክ ጋርክንክ ኤዔድቴኬ ቖልሜቴክ ካንክ ቶይዲ ሙዳ ዴይሴርድምሽ ሳዓቢ ፓርኦኔን ዛምክ ጶቕሽሼ፤ ፓርኦን ኮዖም ይ ኤሴርታኬንክ ታዓሬ ዶዖፕስንትኬ ሳዓብካን ኤዔኣይቴ ጋይሴ።

ሳዓቢ ይዜን ቡዑድ እዝዴድንት ኤዔድ ሃንባብቴሬ ቶይዲ ኣንግና ሙዳም ዻቕሽንትት ጎዖጊ ኡስሴ፤ ኤዔር ኤዔድ ሙዴና ላቕምቴባብ ቖሊ ዬርድ እድትዮ ቴቼ።

ሳዓቢ እስራኤል ኤዔድንካን ቖሊ ዬርድንት ዞምእናም ኤዬይንቴት ፑልቴዜን ኬ ሳዓቴምሽ ዋዓናሜሬ ኣሥትዮ ጫዓርሚ ዋዓርንት ዳክንዳ ቕጼክ ሳዓና ኬ እሥቴምሽ ኬዔን ኬዔዜ፤ ይ እሥምሼሬ ግብጽግራንክ ዉትንትካን ኬ ኡስምቴምሽ ኬዔዜ።

እስራኤል ኤዔድና ሳዓቢ ዪን ኬዔዛቕምሽ ኬ ዬይቴምሽ ኬዔዜርሳቓኬታም ሙዳ ቦዖሥሴኬ ሶይቲ ካዓስሜዜን ሳዓቢ ግብጽግር ዶዖቕዳክ ፔጫ ሙዴግር ኣንግ ቶይዲ ሙዴናም ዴይሴ።

እስራኤል ኤዔድንት ኤዬን ሙዴት ፑልቴንት ዜን ዞምእ ሳዓታ ሃዓቔኬ፤ ካንካን ሳዓቢ ኤዬንት ማቴክ ካዬ፤ ኤዬንግር ዶዖቕዴድ ኤዔድ ሙዳ ዻቔ፤ እስራኤል ኤዔድና ቖልስንት ዞምእንጎክ ዴእግራንክ ዻቔኬ።

ግብጽ ኤዔድን ዳይንክ ሳዓብዜን ቡዑድ እስኬኬ፤ ኬዔስቴንክታሜሬ ቦዖሣቔኬ፤ ካንካን ሳዓቢ ኤዬንዜኬታንክ ጎብዝዮ ካያቕዬ፤ ሳዓቢ ግብጽ ኤዔድንት ቶይዲ ኣንግ ይንሢ ሙዳም ዴይሴ፤

ዻክሪ ኤዔር ዶዖቕዴድ ቶይድዛንክ ዬዞ ፓርኦንት ቶይዲ ካንካ ግብጽ ኤዔድንት ቶይዲ ኣንግ ይንሢ ሙዴና ዴእሴ፤ ጋእሻ ኣትርይትዛንክ ዻዓምሳቕንዳ ግብጽግር ሃዓቔድ ቤድሚ ኤዔድና ኤዔፕክ ኡዑግምዳቔኬ።

ኮዖ ሶይትንክ ፓርኦን ሙሳምኬ ኣሮናምክ ኤዔልቶ፤ «እስራኤል ኤዔድናም ኤንሥቴቶ ታ ኮዜን ሳዓና ካይኬቴ!» ኬዔን ጋይሴ።