5. Janijib Onan

Abram do sara galji mihnum atiki Kinan disaban aduleji, do kun ayaman sikoija aninji pasidjan adhanggeji. Saran Abram ado’ng gametin, “do nami hen talaiba boi delih itin asan gamlenden tidne buantiboihen Hagar daku, do amangan saring hen apsele pasojan tiyih.”

Kansaring Abram Hagor amang yeiretin. Bar Hagor aboi onger sijan hangetin, do Abram pasijan adong Ishmael gamle tihyumle. Bindo Saran Hagor adong ardermadetin. Anganti Ishmael mihgel boi mihnum deli, bar okij Kitungan Abraam adong gametin.

Kitungan gametin, “Hen Ranapati Kitungan hen aman ampora sibdeibirtam.” Anti saring Abram labolingan turkudubnetin. Kitungan janag Abram ado’ng gametin, “Aman kuddub jatinji a’ua detam. Hen aman do teganamji ado’ng Kinan dissan dabneitai do tada ayam a’Kitungan detai. Aman singlingnam kuddub ongeranji ado’ng gadredeba.”

Insalonam, Sara, aboi ongeronan kudte¬-anin janibjib o’nan deti. Do Ahiman Isakon gamle tiyhuma. Hen anin batte sibdeihbirtai, do anin bo surda jatin deti. Bar Ishmael janang suda jattin abmedtai.” Bindo Isako batte sanibdeibiran deti. Kun saring Kitungan Abram Ahinman Abraam gamle bandaetin, Agaramgaman, “ateng mandranji a’ua.” Kitungan Sarai janang ahiman Sara gamle bandaetin agaramgaman “Rani.”

Anti addina Abraam asi’nglingan Kuddub ongeronanji ado’ng gadrerdebetin. bo mihum ambrij atiki, anganti Abram 100 mihum deli do saran 90 mihnum deli, Saran abram aonan kudetin. Yanti gamle Kitungan aninji ado’ng oppungeteji, Aninji Isako gamle tiyhumleji.

Angati Isakon danggarda dakuli, Kitungan Abram adernan tungjingle gijetin, “Miytub onam Isakon adong urunga do hen apsele kabhidle kuba.” Bar okkij Abram kitungan abernan manietin. Anin aonan adong akubbin asan oskaietin.

Abraham do Isako kanub darkunaba ayiranji adnang, Isako a’uan adong oaletin, o’uang kanubban asan angalan daku, bindo murkundardan uan daku? Abraham jalangle gamdted, “e-on kanuban asan Kitungan murkundarda tiytiylangtin.

Anganti aninji kanub darakunaban arduleji, Abraham adangardaonan Isako adong gijetin do kanub arangalingan abludluddetin. A’onan akubten ayamlingan Kitungan gametin, “ringna! Pasijan adong abasudadong! Nami hen galam do aman donghen bantongle Itinasan gamlenden aman mihtub o’nam donghen atiybin asan addang danged.

Abraham runkudiban amanengban aboi a’on murkundardan gijetin. Isakon apanardu Kitungan kanuban kubin asan a’on murkundarda oskaietin. Abraham manoihan batte a’on murkundarda kanuban kubetin.

Kunsaring Kitungan Abraham ado’ng gamete, “itin asan gamlenden aman akudduban ati donghen tiybin asan itsumle, mihtub o’anam janang, hen jibjiblin absitatai. Aman odleng o’namji rianglingan atuituijanji saring janang ateng ganirsaiyan de-etiji. Itin asan gamlenden aman birnahen manile, aman sing birindanmji sanle ordaran akudub parjanji adong apsitatai.