4. Abraam batti Kitungan Asanibdaih Biran

Roblodan ateng mihnum atiki, ordarlingan bar okij mandranji barijleji, Aninji Kitungan asangimle pintun lumleji bar aninji aninjidaman asangimle pintun lumleji. Itin asan gamlenden Kitungan abanaih biran ambrij aninji odarlingan ganirsaiyan irdalabi, aninji aboi langlangan birenji do aninji rukuan rukulin gardan sabjaleji.

Aninji kinsamaranji dakuleji, yangamle Kitungan abanaibiran batti mandrengna abhnanbin deti antati aninji abmaniedji. Aniji ruangan ajabten atading sing gubin asan susulinji. Kitungan kun gijetin do bogad kan mandranji aboiyan baralinanjiden pintun lumteji.

Antin saring Kitungan bigada bigada langlangan sabjaetin, do ordaran mandran ganirsayan deli. ayingan agarda sabjalaji antin ati babila gardan gamle tanihiman deli, anti a-garamgaman,“jugadamdam.”

Bo sua miahnum atiki, Kitungan Abraam gamle ahimar adong apongentin. Kitungan anin ado’ng gametin, Aman disanam do birindam adong omdrenga do ayingan adisa hen absuitam tihti yeira. Hen aman do’ngnam absitatam do aman ado’ng surda tegan abmetai. Ahim’nam Ganugudagi abmetai. Aman ayingan amandran absitatam, hen anin adong absitatai do aman ayingan amandra angtam hen dam anin adong angtai. Aman sanle ordarlingan kuddub tegan adong absitatai.

Do Abraam kitungan abirna manieten. Anin ainsalon, Sara do akuddub buantanji do anin akuddub janabanji pangle Kitungan abgijjetin adisa kinan disaban yeirre.

Anganti Abram Kinan disaban aduetin, Kitungan gametin, “kuddub manengban gija. Hen kan akuddub desan aman a-dong tiytam. Do tordong ayam teganamji daneteji. Antatiki kan a-desalingan Abram basule.”

Kuddub saring lanangka Kitungan apsele bo buya maran Melchisedak gamle dakuli. Bo dinna, Abraam sanukutalingan adakulin atiki, Abram do Malchisedak mailinji. Malchisedak Abraam adong absitale gametin, “kuddub saring lanankadam Kitungan butinti ordaran do riangan adanemar absita’amti.” Ansaring Abraam sanulingan saring dainan ahanglen akuddub janaban agalji tanub Malchisedak adong tiyetin.

Ateng mihnum sikoija Abram do Saran akkudoneji. Kitungan Abram adong jib jiblin gamentin, Aman aboi ongger o’nan a kudte do ateganji riangan a-tuitui ambri deteji. Abram Kitungan a-janibjib beran dernetin. Kitungan Abraam adong roitadmar gamle appingbaetin. Itin asan gamlenden Abram Kitungan ajibjib birlingan dirnetin.

Kitungan Abram batte sibdaih birnetin. Kralogi, sanibdei biran bagu mandranji abara asan ganabribiran. Bindo kan tidne ati, Abram akaldumlin adnang Kitungan jibjib birnetin, anin kitungan abirnan amdanggetin. Kitungan gametin, “Hen mangnam saring onger o’nan tiytam. Hen teganamji ado’ng Kinan disan tiytai.” Bindo kun ayam sikoja ongger onan adhanged.