49. Kitungan A’tabme Sanibdei Biran

Bo Pisirdian Marin, bo danggardin adong Kitungan A’on kudte gamle oblingetin. Anin bo danggardi boijan dakuli, bindo Marid Janggardan amangban yirre do anin Pangguronetin. Anin bo ongger onan kudle do Jisu gamle timyimleji. Ansaring, Jisun bagun ati Kitungan do Mandra.

Jisun ateng rubmangda baran lumle anindaman Kitung gamle appingbaetin. Anin da’an alaninka hanlin do kudsalih dan abringnaetin. Anin ateng bimbim maranji absamangetin and ateng mandranji amang saring kulman amdungle gongetin. Anin karahidan saring abyarmengetin, do monloi rutipon do bagu sanna ayon batti 5000 ajar mandranji adong gaganan ateng tiyetinji.

Jisun janang bo surda hanang mar dakuli. Itinti akuddubban ati anin hanangan tiyetin kun ati rojol gamle oblingetin. Itinti ati anin alumbin asan oblingetin anti ati mandranji alumbin sanaisai itin asan Gamlen den Anin A’on Kitungan na. Manan, anin hanangan tietin do ambin yanti gamle atimyimdamtin etigoi toi toi sing mar nam adong timyim bin sanaisai.

Anin janang hanangan tiyetin do Ambin iti janang ati, ordi bittidam bin janang saring Kitungan adong ateng timyimbin Sanaisai.

Jisun gametin do ordar lingan iti janang janaban hangtabin apanardu Kitungan a’rajam ling adakubin kuddub saring bangsa. Arajam lingan aganbin asan Kitungan dongbin pintubin saring rabrab binti.

Jisun gametin do dajinganti mandranji anin adong jateji. Kitungan kan a’mandraji adong rabrabte. Deli janang, biggarda maranji anin adong ad-jaeji. Anin janang gametin do kun a’mandraji bangsa solan ambrij. Itin asan gamlenden aninji Jisun abmele bangsa anoblingan amdangtenji do Kitungan aninji adong rabrabte. Deli janang, biggarda maranji tanggore lingan a’soldan ambrij. Kitungan abirnan bo ba’ayan ambrij uanti ati tanggore ban galuli do appadabed. Kan a’mandraji Jisun abmele ad-ja’eji. Aninji anin a’rajam lingan aganbin assateji.

Jisun oblingetin do Kitungan pintu maranji adong boi boi timyimte. Anin aninji adong tabmalle a’on daman abmebin asan itsumte.

Jisun janang donglen oblingetin do Kitungan pintun assanggimte. Itin asan Gamlen den Adam do Aban pintu lumleji do a’onanji janang pintu lumteji. Ordar lingan kuddub mandranji pintu lumteji do Kitungan saring sanggai dakuji. Bar kuddub mandranji Kitungan assanggim marji.

Bindo Kitungan kan ambrij ordar lingan kuddub mandranji adong timyimte: Anin a’mitum onan tiyle yanti gamle butinti Jisun amang dirtin Kitungan aninji adong panadradan adti-e. Do dirna maranji anin ampra tordong ayam dakutinji.

Aman pitun alumlen asan karahidan ahangbin tungna. Kitungan dongbin padrabbin ati sakkai badih, bindo pintulen asan Jisun panadradan pangetin. Anlen asan Kitungan Jisun adong arrakadang lingan kabhidle padradetin.

Jisun anggaja pintun adlumed. Delijanang Pintulen apsele anin panadradan do danuka kanalkal karahidan jaetin. Kan ambrij, Pintunamji do ordar lingan kubddub mandranji apintu apangbin asan anin na rojol kanuban deli. Jisun anindaman Kitungan amang kubdamnetin, yanti gamle butinti amang lingan dirtin, Kitungan aninji apintunji, barantongih dagi apintu janang tabmadte.

Bogad aman ateng bangsa baran lumle janang den, kan batti Kitungan dongnam adnab-rabrabbe. Anin batti bo gardi mar adebin asan amandaman itidja lumle adraptie. Anti apanardu, anin Kitungan A’on, aman asan arakadang lingan kahidli, do Kitungan anin adong karahidan saring abdietin gamle dirna. Bogad aman kan ati dirrin nan den, Kitungan Pintunam tabmadte.

kuddub mandranji butinti Jisun amang dirtin do a’Gamanganji gamle jateji Kitungan aninji adong rabrabte. Bindo butinti anin amangan ad-dirneji Kitungan aninji adong ad-rabrabe’e. Aman gamang mar ordi banagi mar, ongger mar ordi insalo mar, talaiba mar ordi danggarda mar, ordi uan aman dakuten. Kitungan dongbin timyimte do anin ambin ampra gardinabin asan dongbin Jisun amangban a’dirna gamle a’itsuman daku.

Amangban dirnabin do tabubdan hangbin asan Jisun dongbin gudingte. Jisun Messian, do Kitungan a’on gamle ambin adirtin po? Aman pintu mar do pintunam asan aman Kitungan a’panadradan hangbin tungna daku gamle dirtin po? Jisun pintu nam apangbin asan arakadang lingan kahidli gamle dirtin po?“

Bogad ambin Jisun amang dirrinan den do anin alumetin ati apingbalen den, aman Jisun asanandung mar na! Sonuman lunggud rajam lingan okij abhanale adraptibin. Nami Kitungan dongbin panalidan arajam lingan abhanabin tin. Abmang pintun alumlen ambrij Kitungan dogbin pintu adlumbin asan ranptin tiybintin. Anin dongbin bo tabme dane mandrengnan tiybintin.

Bogad ambin Jisun asanandung marji den, Jisun alumetin abara asan Kitungan pitun bin tabmadetin. Nami, Kitungan dongbin assanggim maran ir-gij labi osantan bo tuya gardi maran gamle jabintin.

Bogad aman Kitungan a’gardi den do Gamang Jisun a’buanta den, Jisun a’hangamtin ati aman maniebin asan itsumte. Aman Jisun asanandung mar delam janang den, Sonuman dongnam pintu lingan agablubin asan tungjingamtin. Bindo Kitungan itinti oblingte anti ati ditordong anin lumte. Anin kun ati gamte do bogad aman pintu nam pingbalen den, anin tabmadamtin. Anin pitun assanggim ling sanunabin asan ranaptin tiyamtin.

Kitungan dongbin garbiranbin do abirnan kinolbin asan oblingte. Anin janang sinpur bin asan dongnam do biggarda sanandung maranji adong oblingte. Itinti anin aman apsele lumetin anti biggarda maran adong oblingbin deti. Bogad aman kan a’kuddubban ati lumlenden, anin bo raddu gardin detam.