50. Jisun A’dayarna

2000 mihnum ambrij deli ordarlinga yar yar maneng mandranji Jisun Messian abmele bangsan anoblingan amdangle yirataiji. Ranukun marangti. Ordaran atanakud adnang Jisun dayartai gamle jibjibnetin. Anin nami sikoija inrang dayarai deli janang den, anin ajanibjib biran ambrij lumte.

Anlen Jisun a dayarna a omditabin ayam, Kitungan donglen manaridan do mananin a mandrengnan abhanabin itsumte. Anin donglen arajaman apsele bigarda maranji adong oblingbin asan itsumte. Anganti Jisun kan ordara lingan dakunetin, anin gametin, “Hanangna marhenji mandranji adong ordar lingan kuddub manengban Kitungan a rajaman abmele bangsa anob lingan oblingteji, ansaring tanakudan ayam yiratai.”

Ateng ompu maranji namintan sikoija Jisun abmele inrang amdangeji. Anin ruangban inrang dayarren abmang, anin a hanangna maranji adong butinti bangsa anoblingan inrang amdangeji aninji adong oblingba gamle oblingetin. Anin gametin, “Yirba d kuddub jatinji ordi ompu maranji amang lingan hanangna maranji iabmeba!” Bar janruman gu’ri gadgaddan ayam deli!”

Jisun janang gametin, “Bo buantan anin gamangan saring surda tid. Sanai sai dagi kan ordar lingan amandraji donghen assanggimlinji, do aninji hen asan do’ng bin janang abasudateji do tuabteji, kan ordar lingan ambin ateng kanal kalan ahangte, bindo raddu deba, itin asan gamlenden duihn Suman butinti ordaran abhanate anin adong hen abladnalai. Bogad ambin tanakud sikoija barij dirna lingan adakulinan den, seletin Kitungan dongbin rabrabte!”

Ordaran a tanakudan ayam lingan itin deti anti ati aggadlambin asan Jesus ahanangna maranji adong bo kata biran batti oblingetin. Anin gametin, “Bo mandra a kuttalingan bo bangsa baiyan guetin. Anin adimadnetin ayam lingan, assanggim maranji yirre kung jannong lingan gamo saran guleji, do ansaring anin sangai yirretin.”

“Anganti baiyan padabli, mandran a buantaji gamleji, ‘Gamang, aman jannong lingan bangsa baiyan gulle. Bar yan gamle titti lingan gamo sara dungle?’ Mandran abyar biretin, ‘assangim marhenji kun ati gulleji. Bo assangim marhen kan ati lumetin.’”

“Buantanji Gamangan adong abyar birre gamleji, ‘Anlen kun gamo saran pille asidai po?’ Gamangan gametin, ‘Ijja. Bogad ambin kun ati alumlen den, gommo aneeb janang a piete. Gadgadan sikoija ambin omdiba. Ansaring gamo saran bo maneng rukulle jiba do yanti gamle ambin soile araptite. Bindo gommon ati darakuban pangaiba.’”

Hanangna maranji kata biran a garamgam adganludedji, bar aninji Jisun adong bangsale abganludbin asan oppingleji. Jisun gametin, “Bo Mandra butinti bangsa jabmolan guetin Messian absuite. Do jannongan ordaran absuite. Bangsa baiyan Kitungan a rajaman absuite.”

“Gamo saran sonuman amandraji absuite, ir-bara maranji. Mandran assanggim mar, butinti gamo saran guetin, kan ati sonuman absuite. Gadgaddan ordaran atanakudan absuite, do gadgad maranji Kitungan Apisirdianji absuite.”

“Anganti ordaran tanakudan deti, Pisirdanji duihn suman a kuddub mandranji adong rukkuteji. Pisirdianji aninjij adong taggin to’ogi sing lingan sidteji. Titti kun amandraji barantongih dagi kanal kalan batti edanan do ramdaji deteji. Bindo butinti amandraji roitad, Jesus adong sandungleji, aninji Ua Kitungan arajam lingan uyungan ambrij tarteji.

Jisun kan janang ati gametin do ordaran atakutin abmang anin dayartai. Anin yanti gamle yiretin ati goi dayartai. Manan, anin d’ong dagi, bar ruangan saring tarubratam lingan yirtai. anganti Jisun yirtai,kuddub Jisun asanadung maranji kahidleji janangden aninji ditinji do aninji Jisun ampra rianglingan maitinji.

Ansaring Jisun asanandung maranji buti buti namintan sikkoija ameng daku aninji adong ruangban anurungan deti do buti buti karahidan saring yarmengle dilinji aninji ampra iyte maineji. Aninji tidti Jisun ampra iyte deeji.kan atiki,Jisun amandranji ampra dakuten.anganti aninji aboijna dakutinji tardayam sanabyun detiji.

Jisun amangling adirrinan akuddub amandraji adong ranub baban atiybin asan jibjibnetid.aninji tarda ayam kitungan ampra kuddub janaban abhanateji. Aninji amang lingan sakkaij sanbyun deti.

Bindo butinti Jisun amanglin addirne aninji adong kitungan bitsarate.aninji adong kinnaraibn appaite. Tidti aninji edatinji do ramdajitinji, bar tarda ayam kanalkalan hangteji togin er-kahid labi aninji adong jumtudle dakuten,budbudanji aninji adong ajumbin akaddabneji.

Anganti Kitungan dayartai,anin abotakud sanuman arajaman absiete.Sonuman adong kinnaraiban appaite.Sanuman tidti tarda ayam juamtudti,kitungan asundungbin apanardu osantan duaih suman asandungten amadranji janang jumtudteji.

Itin asan gamlenden Adam do Aban Kitungan adong admaniedji do ordar lingan pintun panglaiji, Kitungan kan rabrdile absi’dbin asan gabri ji’netin. Bindo bo dinna Kitungan tabme riangan do tabme ordaran rojol ati sabjate.

Jisun do a mandranji tabme ordar lingan dakutinji, bar anin kudduban alaninka ati abhanate. Anin kuddub mandranji amadaa godgodte. Butidja kanal kalan do danukan okij adgijeji. Aninji adnedaneji. Aninji ab bimaji ordi adkahideji. Bar titti itidja irbangsan ad dakue. Jisun anin arajaman ranoitadan bati do sanabyun batti abhanate. Anin amandranji ampra kuddub ayam asan dakuten.