48. Jisun Na Janibjib Messian

Anganti Kitungan ordaran Gabdile, Kuddub janaban rojol dakuli. Ordar lingan pintun ad,dakued. Adam do Aban boi boi artimyimleji, do aninji Kitungan adong janang Timyimleji. Tidti lingan bim biman ordi karahidan ad,dakued. Kan ambrij Ordaran adebin asan Kitungan itsumetin.

Sonuman ja’adan sanle kuttan adnang Insalon adong olangetin itin asan gamlenden anin insalon adong joldabin asan itsumetin. Seletin Insalon do Adam Kitungan assangimling pintun lumleji. Do aninji pintun alumlenji asan ordar lingan kuddub mandranji karahidan hangteji.

Itin asan gamlenden Adam do Aban pintun alumlenji asan bo surda kanalkalan deli. Aninji Kitungan assanggim marji deleji. Kun saring kuddub mandranji Pintun lumleji. Kuddub mandranji karukudan saring Kitungan assanggim marji. Do Kitungan do mandranji sanabyun ad-dakued. Bindo Kitungan sanabyun abmebin asan itsumetin.

Kitungan jibjibnetin do Aban a’on saring bo mandra Sonuman a’bob tudate, do sonuman mandran a’danunkurdi jingan ramte. Gamlabinden, Sonuman Messian adong kabhidte, bindo Kitungan anin adong abyar mengte. Do Messian Sonuman aranapti kuddub ayam asan pangle yirte. Bar ateng mihnum atiki, Kitungan Jisun na Messian gamle absuijetin.

Kitungan appaitaihen a’roblo daan saring Noa asing marji adong rabrab bin asan Anin Noa adong bo surda bungsangan assabjabin asan oblingetin. Butinti Kitungan amang dirrinji Anin kan ambrij aninji adong rabrabetin. Ednegoi na buti buti Pintun lumleji aninji Kitungan saring karahidan adebin tungna daku. Bindo buti buti Jisun amang dirtinji aninji adong a’rabrab bin asan Kitungan Jisun appaietin.

Bo sua mihnum ambrij, buyanji Kitungan adong taniy kanuban tiyle dakulinji. Kan ati gadlamte do mandranji pintu alumlenji asan aninji Kitungan saring panadradan adebin tungna dakuleji. Do kun kanuban batti apintunji tanabmadan ade’ed. Itinti ati buyanji lumle adraptiedji anti ati Jisun lumetin. Bar kuddub mandranji apintu pangbin asan anin daman bo marid kanubdagi tiydamnetin. Pintulenji asan itinti a’panadradan anlen a’hangbin dakuli anti ati anindaman jaetin. Kan asan, Jisun na Kuddub saring Bo Gugu Murda Buyan deli.

Kitungan Abram adong gametin, “Aman sanle ordar lingan kuddub teganji adong absitatai. “Jisun Abram a’udleng onan dakuli. Kitungan Abram sanle Kuddub teganji adong absitate, itin asan gamlenden buti buti Jisun amang dirtinji Kitungan aninji adong pintun saring rabrabte. Anganti kan amandranji Jisun amang dirtinji, Kitungan aninji adong Abram ategaji gamle jate.

Kitungan Abram adong a’onan Isakon Amangban Kub bin asan oblingetin. Bindo salitin kanuban apsele Kitungan Isakon apanardu bo murkundardan aninji adong tiyetinji. Anlen pintulenji asan kuddublen karahidan a’hangbin tungna daku! Bindo anlen apanardu Kitungan Jisun adong bo kanub dagi tiyetin. Antin asan anlen Jisun adong Kitungan a’murkundardan gamtabi.

Anganti Kitungan Misor lingan a’tanakud rulingan appaietin, anin kuddub Israelanji adong asing linganji tangboi murkundardan a’tuabbin asan oblingetin. Murkundardan itidja ir-marid dakubin tid. Ansaring aninji mihaman darani lingan jodleji. Anganti Kitungan kun darani lingan mihaman gijetin, anin a’murda onanji ir-kabhidlabi asinganji Elaile yirretin. Salitin Kitungan kan ati Anelai gametin.

Jisun bo Anelai abduran a’murkundardan ambrij. Anin pintun adlume, bar amanglingan ir-pansardin ad-dakue. Anelai abduaran ayam lingan anin adong tanuaban deli. Anganti buti buti Jisun amang dirtin, Jisun a’miham kun mandran a’pintu apsele tiyte. Kan ati Kitungan kun mandran alaninka elaile ayirten ambrij, itin asan gamlenden Kitungan anin adong ad-padrade.

Kitungan Isaraelanji ampra Sanibdei birnetin itin asan gamlenden Anin Anindaman apsele kun mandranji adong sedaetin. Bindo nami Kitungan kuddub mandranji apsele bo Tabme Sanibdei biran sabjaetin. Ayinganti a’ompuji kan Tabme Sanibdei biran jate, anin Kitunan amandraji ampra deti. Anin Jisun amang a’dirtinan asan anin kan ati lumte.

Mojeson bo tungmad gij maran dakuli do anin ranaptin batti Kitungan abirna oblingetin. Bindo kuddub tungmad gij maranji saring Jisun satta kuddub saring surda tungmad gij mar dakuli. Anin Kitungan na, anin alumetin do a’oblingetin a’kudduban ati Kitungan abara do abirnan na. Anti asan Kambolan oblingte Jisun na Kitungan abirnan.

Kitungan Daudo rajan ampra jibjibnetin do anin a’tegan saring bo mandra Raja dele kuddub ayam apsele Kitungan amandranji adong abhanate. Jisun na A’on Kitungan do Messian, bar anin na Daudon a’tega butinti kuddub ayam abhanate.

Daudon Israelanji a’raja dakuli, bindo Jisun ordaran a’raja! Anin bar okij yartai do ranoitadan do sanabyun batti a’rajaman kuddub ayaman apsele abhanate.