3. Roblo daan

Ateng ayam atiki, Mandranji ordarlingan ganirsaijan deliji. Aninji irmanani do duih delaji. ordaranlingan danuihan barihlin asan kitungan kuddub mandranji adong roblo dan bati absi-ed bin asan ogaletin.

Kitungan Noah apsele boi boi moihdali. Itin asan gamlenden anin duih maranji amangligan bo dirnamaran dakuli. Kitungan Noah ado’ng gametin hen surda roblodan abmetai. Antin asan, aman surda bungsangan sabja.

Kitungan Noah ado’ng gametin, aman bungsangan sabjah manan, janlarin 140 santi, lanra-angan 23 santi, do landrankan 13.5 santi. Noah arran batte engda bugsangan yagi tarding, manan sannara singan, kidkin do merdo singan sabjaetin. Do kun roblodaan saring arrabrabin asan kun engda bungsanlingan Noah asing maranji, do ordaran akkuddub jontunji dakuetin.

Noan Kitugan abernan dernetin. Anin do anin ayagi danggarda o’nanji ampara Kitungan abanihan ambrid engda bungsangan sabjaleji. Itin asan gamlenden engda bungsangan surdadam kan ati asabjabin asan ateng mihnum dingleji. Bar Noan mandranji ado’ng abkilkille roblodan yeirtai, Kitungan amang dayeraiba gamle gametin, bindo mandranji abirnan addirnedji.

Kitungan Noan asi’ng maranji adong baihetin, anindaman do jontunji apsele ateng ganaga oskaiya. Anganti kudduban anoiskayan deli, Kitungan Noan ado’ng gametin, aman, insalonam, yagi dangada o namji, do ansalonji ampra tamji mandra bungsangligan ganbin a roiyong dakuli.

Kitungan kuddub jontun do ontiddanji saring bo onggeran do bo insalon adong roblo da-an ayamlingan rabrabbin asan Noan amangban apaietin. Kanubanji a kubbin asan Kitungan kuddub jontunji saring galji ongeran do galji insalon apaietin. Anganti kuddubanji bungsanlingan ganlejli, Kitungan anin daman sanagan ingadetin.

Ansaring ganuran susule, irkabdablinbi bakudi dina do bakudi todgal tarubli. Odarlingan da’an baridli, do ordaran akudub janabanji, lingka barunji janangden da’an batte tabubli.

Bungsanglingan amandranji do jontunji saddan sadle asar janonglingan adakulin a kuddub puradanji kahidleji. Do bungsangan daalingan engdalin do allungan adakulin akuddub puradan daan saring ranabraban hangleji.

Taruban kaddablinan atiki, monloi angai sikoija bungsangan daalingan engdalin, do kun ayamlingan daan ahadli. Kun saring bo dina bungsangan diy diy barun alingkaling dakuli, bindo kun ayaman sikoija ordaran daan batte barid dakuli. Anab yagi angai atiki barunji janang ganidtan deli.

Bakudi dinna atiki Noan daan ahadlin ati agalambin asan aboi ontiddan manan kakan appaietin. Kakan asar janongan ahangbin asan kodikotan engdalin, bindo anin asar janongan adhanged.

Antiatiki Noan a boi ontidan manan paruan adong appaietin. Bindo anin janag asar janongan adhanggeddan asan, anin Noan amangban yarnaitin. Bo palli atiki bar okij paruan appaietin, do anin jiton neeban akandar atoolingan hamle yaraitin! Do daan ahandli do aranji bar okij marangleji.

Noan bo palli omdean omdile anab yagi tara paruan adong appaietin. Kan ayam, anin darruinan ahanglen asan bar okij dayare adayaraitin. Do daan a hadli.

Anab bagu anggai atiki, Kitungan Noan adong gametin, “nami aman do sing marnamji do kuddub jontunji bungsangan saring dunglin araptite. Do ateng oonanji do udlengonanji dean dele ordarlingan ganirsijan deba.” Bar Noan do asiing maranji bungsangan saring dunglinaiji.

Noan bungsangan saring dungnaitin atiki, anin sanoi kanub arangan sabjaan sabjale tangboi tangboi jontunji sanoi kanuban apsele handrameted. Bar Kitungan sanoi kanublingan moihli do Noan asing maranji ado’ng absitaetin.

Kitungan gametin, “hen jibjibtinai do angaja mandran airsi baran apsele ordaran adnagaih, mandran asanna dinan saring pintun batte bariddam, dele janagden hen ordaran roblodan batte anabsiedai.

Ansaring kitungan ajanibjib arabmaddan ambri ab’mang ilingbongan gabdiletin. Anganti anganti ruanglingan ilingbongan gidtati, Kitungan itinti jibjibnetin antiati mandranji do anindaman ayimte.