36. Jisun A Bananda Mukkan

Bo dinna Jisun yagi ahanangna maranji Pitoron, Jakubon bar Jon anin ampra urungetinji. (hanangna mar Jon Jisun ado’ng atabbubdaetid a Jon tid.) aninji garbirnabin apsele bo langka baruban yirreji.

Ayingante ayam jisun garberrlin, amukkan uyungan ambrij puangle. Asindrin tana’ran ambrij paludam deli, kan ambrij ordar lingan ednegoi butijja abmele adraptie.

Ansaring Mojeson do Eliyon tungmadgijmar amangban abgijdamlinji. Kun amandranji ordar lingan bo sua mi’hnum abmang basuleji. Aninji Jisun akarahiddan apsele birrinji, iten asan gamlenden anin Jirusalem lingan baya karahidan deti.

Ayingante ayam Mojeson do Eliyon Jisun ampra arbirdaleji, Pitoron Jisun ado’ng gametid,” tidne adakunlaihen anlen apsele bangsa. Bar jaba anlen yagi tambu si’ngan asabjaba, aboi aman apsele, aboi Mojeson apsele, do aboi Eliyon apsele.” Bindo Pitoron anin itin gamte adgalamed.

Pitoron birnetid ayam, bar ta’rdam taruban anin amangban luble. Ansaring tarub lingan saring bo sarangan anamdangan deli. Anin gametid, “Kan ati tanimyim on-hen anin ado’ng hen tamyimtai. Anin amang lingan moi’hdatih. Anin abirnan amdangba.” Yagi hanangna maranji batongleji do labo lingan turkurdublinji.

Ansaring Jisun jabsile gametid,” abantongdong. Do dinaba.” Bar anin kuddub manengban melgijleji, bo mandra satta Jisun titti dakuli.

Jisun do bar yagi ahanangna maranji aninji latso birrinji. Jisun aninji ado’ng gametid, “Nami tidne itinti dele antati buti janang ettibintid. Hen baya kahidti bindo yarmengtih. Ante atiki, ambin mandranji ado’ng etile araptite.