35. Asuyim Ua-an Akata biran

Bo dinna, Jisun a birnan amdangbin asan arukkulinan amandraji ado’ng anin hanghangetid. Kan a mandraji panuleb gar gar maranji do biggarda maranji butinti Mojeson anosoij ardilenji amandraji janang dakuleji.

Gardi maranjii ambrij kan amandraji ampra Jisun abirnetid ati dajingante dannegod maranji gijleji. Bar anin saridsid baran lumte gamle Aninji daman bir-dalinji. Jisun aninji abirnanji amdangetid, bar ante asan aninji ado’ng kan abirnan oblingetinji.

“Bo ayaman bo mandra bagu a-ongger onan dakuli. A sanna onan A-uanggon ado’ng gametid, ‘u’ang, tanubling hen abitti hen namihen Sanai saij!’ Bar ante saring abittin bagun adanggarda onanji ado’ng bantile tie-tinji.”

“Tabdong asanna onan kudduban abittin rukkule anin sangai disaban yiretid do alebunji pintu bara lingan karsue-tid.”

“Ante Atiki, uanti adisa lingan sanna danggarda onan dakuli titti bo surda kantaran deli do gaganan ahibin asan asi’lingan lebun ad-dakued. Ante asan anin bo baran sajeitid bindo anin ad-hangedan asan, kanbunanji gupae-tid. Anin ateng duleidan do danuka lingan dakuli ante asan anin kanbunanji ajumlenji aganaga jumbin asan itsumetid.”

“Atanakud lingan, Sanna danggarda onan anin daman gametid, ‘hen itin lumtai? Kuddub Uangohen abuantanji la’a pasirgi ganagan hangteji, do hen tidne ganagan ad-hangai. Hen Uangohen amang ban dayartin do hen aboantan adebin asan anin ado’ng oblingtai.”

Ante saring sanna danggarda onan a-uangon asi’ngban dayaretid. Angante anin sangai dakuli janang, auangon anin ado’ng gijle anin apsele ateng asuyumdali. A-uan amangban irnetid do anin ado’ng kundule hamle kurkurtametid.”

“Danggardan a-uan ado’ng gametid, ‘uang, heni Kitungan amang lingan do mangling nam hen pintun lumlai. Hen danggarda Onam a-debin tungnatid.”

“Bindo auangon bo boantan ado’ng gametid, ‘loyirra do bangsa sindrin pangle onhen abjijiba! A ondersi lingan engsin abtolba do anin ajing lingan panduiyan ab-ratudba. Bangsa bugi tangan pangle tuabba do bujilin amoi’hnaba, itin asan gamlenden onhen kahidli badi-e, bindo nami anin yarmengli! Anin Si’edli badi-e, bindo nami anlen anin ado’ng hanglebi!”

“Bar mandranji moi’hlinji. Ateng ayam atiki, asurda onan baralin kutaban saring si’ngban yarnaitid. Anin kininan tongsengan amdangle rubmangdale gametid do kan tidne itin deti.”

“A-uban si’ngan ayernaitid asan kan amanoi’h jumdaran deti gamle Angante asurda danggarda onan galametid, anin ateng barabli do anin si’ngan alung ad-ganed. A uangon bayiran dunglin do aninji ampra moi’hnabin asan anin ado’ng garmadle yirai gamle oblingetid, bindo anin assali.”

“A surda onan a uangon ado’ng gametid, ‘dijne mi’hnuman dirnan batti aman apsele hen baralinai! Angaja hen do’ng nam er-ardi, do nami sikoija gardi henji ampra manoi’h jumdaran jumbin apsele do’nghen bo sanna kimmeddan soij ad-tiylih. Bindo kan onam kuddub lebunam ersi bara lingan karsule absi’hidetid. Angante anin si’ngan yarnaitid, aman bangsa bugi tangan tuable manoi’h jumdaran lumle!”

“Auango jalangle gametid, ‘E onhen, aman tordong ayam hen ampra dakulam, do itinti akuddub janaban hen ati ante ati aman ati. Bindo kan a manoi’h jumdaran anlen apsele hadab daku itin asan gamlenden ubanam kahidli, bindo nami anin ameng. Anin si’edli badi, bindo nami anin ado’ng alen hanglabi!’”