30. Jisun Ajar Ajar Mandranji Ado’ng Rujumetid

Jisun ahanangna maranji ado’ng ateng biggarda biggarda gorjangbanji a hanghangbin do a oblingbin asan appayetid. Anganti ayam aninji Jisun amang dayarraji, Aninji itinti lumlaji kun ati anin ado’ng gadlamlaji. Atiki Jisun aninji ado’ng ganingan adam ring ring darakunaban asuij ayam lulunabin asan gudingentinji. Bar, aninji bungsang lingan ganle mijtal ganingan yirreji.

Bindo tidti a’dakulinji a kuddub mandranji Jisun do a hanangna maranji bungsang lingan a yerbin asan angtirlenji ati gijleji. Kuni a mandranji mijtal ganingban Jisun a rabangbin asan maneng ganing lingan halin yerraji. Bar anganti ayam Jisun do a hanagna maranji ardulaiji, ababmang ateng onla maranji aninji ado’ng omdileji.

Kun parjan insolan do passijanji ado’ng ir-mailebi monloi ajar saring awr mandra dakuleji. Jisun kun mandranji a lanangkaling boi boi asuyimdali. Jisun ado’ng kani amandranji ir-gupa mar lingan a murkundardanji ambrij. Atiki anin aniji ado’ng hanangan tiyetid kun tidti a dakulinji bimbim maranji ado’ng absamangeted.

Orublin adnang, hanangna maranji Jisun ado’ng opungleji, “Ayaman dingle do kan atuya lingan gardan agassa. Mandranji ado’ng omdrengaji yante gamle aninji yerre asuij ganaga hille raptiteji.”

Bindo Jisun a hanangna maranji ado’ng gametid, “Ambin aninji ado’ng eti janang ganagan tiyba.” Aninji jalangle gamleji, “Yan gamle anlen kan ati alumai? Mangbalen monloi rutipun do bagu sanna ayon satta daku.”

Jisun a hanang maranji kuddub parjanji ado’ng a gablingan tang bakurdi galji mandra dardi gamle jaitan abgob gobbin asan baihetidji.

Atiki Jisun monloi rutipun do bagu ayon pangle, Ruangban manggile do kun a ganaga apsele Kitungan ado’ng sinetid.

Salettin Jisun kun rutipun do ayon pijpijetid. Anin mandranji ado’ng bantile tiybin asan a hanangna maranji ado’ng tiyetinji. Hanangna maranji mandranji ado’ng tiyle dakulinji, do kun ati adnahided! Kuddub mandranji be’e be’e jumlaji.

Anti atiki, hanagna maranji a laggulin a janumjum hidaleji. Kanti ati mijgal turdud lingan barij deli! Kuddub ganagan monloi rutipun do bagu sanna ayon batti gadilli.