31. Jisun Daan A’linka Hanetin

Jisun parjanji ganagan ati-etid atiki, anin hanangna maranji ado’ng bungsang lingan aganbin asan oblingetinji. Anin aninji akandungbanji asuij ayam adakunetid adnang Anin mi’httal ganingban bungsangan batti aninji ado’ng ayirbin asan oblingetinji. Bar hanangna maranji omdale yirreji, do Jisun parjanji ado’ng asi’ngbanji appaietid. Ante atiki, Jisun baruban garbirnabin asan yiretid. Anin titti atingsoijjan dakunetid, do anin tungar togalan sikoija garbirnetid.

Kun ayam lingan, hanangna maranji mi’htal padbin asan bungsangan uijleji, bindo ranggin anin amangbanji raddudam idaitid. Agante tungartogal deli, aninji tarangdi ganing lingan satta arduleji.

Kun ayam lingan, Jisun garbiran tabkudetid do hanangna maranji ado’ng rabangbin asan yiretid. Anin da’an alinkaling halin aninji abungsang ban yiretid.

Ansaring hanangna maranji anin ado’ng gijleji. Aninji ateng batongleji itin asan gamlenden aninji ogandileji kun ati kulman na. Jisun kun ati galametid do aninji batongteji, bar anin aninji ado’ng gudingetiji, “Abangtongdong. Kan ati henin na.”

Ansaring Jisun Pitoran ado’ng gametid, “Gamang, bogad kan ati aman, da’a lingan halin mangbanam yirbin asan anordin tiyh.” Jisun Pitoron ado’ng gametid, “Yerai!”

Bar, Pitoron bungsangan saring ladsolin da’an alingka lingan halin Jisun amangban ayirbin susunetid. Bindo asui sangai halinan atiki, Jisun amang saring amadan opsadetid do surda ranggin galambin asan anin a-tidana da’an gijgijetid.

Ansaring Pitoron batongli do da’a lingan tabubbin susu e-tid. Anin edanetid, “Gamang, rab rabih!” tabdong, Jisun amang ban yirre anin ado’ng kundule hametid. Ansaring Anin Pitoron ado’ng gametid, “Aman asuij dirnanam! Dong nam rabrabbin asan aman laningka hen itiban ad-dirned?”

Ansaring Pitoron do Jisun bungsang lingan ganleji, do ranggin abubmung kaddablin. Da’an sayuli. Hanangna maranji rubmangdale Jisun amang turdumleji. Anin ado’ng singkinrale gamleji, “Jardid, aman Kitungan a-onan na.”