29. Ir-Suyim Dagi A Boanta Akatabiran

Bo dinna, Pitoron Jisun ado’ng ualetin, “Hanghang mar, buhang hen bogad asanggemling hen pintun lumetin den dajingan tara hen anin ado’ng tadmadai? Gulji tara sidkoij po?” Jisun gametid, “Gulji tara satta tid, bindo yakurdi galji tarding gulji tara sikoija tadmada!” Kan sanle, anlen tordong ayam tadmabin deti gamle Jisun gametid. Ansaring Jisun kan a katabiran oblingle.

Jisun gametid, “Ruang rajaman bo rajan a boantanji ado’ng rirdan atiyetin ambrij. Bo boantan 200,000 mihnum abadileb ambrij ateng rirdali.”

“Bindo kun boantan abyarre ad’rabtied, ansaring rajan gametid, “Rirdan adulbin asan anin do a dukrin do a passijanji mangbahen tihba.”

“Kun boantan rajan amukkaban turdumle anin ado’ng limsenle gameted, ‘Abasuyimle hen abmele labyu omdih do hen, aman saring a panglen akuddub rirdan abyar tiytam.’ do rajan kun boantan ado’ng abasuyimle, do anin a kuddub rirdan omdale ayirbin asan anin tiyetid.”

Bindo anganti boantan, rajan a mukkaban saring dunglin yeretid anin bo biggarda boantan ado’ng rabanggetid ayinganti amandra anin saring unji anggai abadi rirdan pangetid. Kun boantan anin ado’ng abubmung hamle gametid, “Rirdalin, a panglen a tanka abyarih.”

Kun turdu boantan turdumjinglin gametid, ‘abasuyim gamle asuij ayam omdih, do arirdali nahen a kuddub hen aman ado’ng abyartam.’ Bindo osantan, rirdan inrang dulen sikkoija a turdu boantan ado’ng karoijo si’ng lingan pidetid.”

Bindo itinte deli, antate bigarda a-turdu boantanji gijan gijle museldayimgi deleji. Aninji rajan amang iyan iyle opungeleji.

“Rajan kun boantan ado’ng gudingle opungetid, ‘Aman duaih boanta! Aman donghen labyule agarbirrinan asan hen rirda nam kuddub tabmadlam. Aman janang kan ambrij turdu boantanam alumbin dakuli.’ Rajan boi boi barabli do duaih boantan ado’ng rirdan inrang abyarren sikoija karoij si’ng lingan pidetid.

Salettin Jisun gametid, “Bogad buhangnam alung ugarnam batti adtabmadlenden Ruang lingan uahen janang kuddub mandranji atimang lingan kan ambrij lumte.”