27. Bangsa Samaria Maran akatabiran

Bo dinna, Jiudinji anosaij lingan bo ganalam maran Jisun amangban yiraitid. Jisun a hanang biran ardod gamle kuddub mandraji ado’ng agalambin asan Itsumetid. Bar Anin gametid, “Hanghangmar, “Ir-ahid mandrengnan ahangbin asan hen itin alumbin deti?” Jisun jalangle gametid, “Kitungan anosaij kanbol lingan itin anidan daku?”

Kun mandran gametid, “Gamang Kitungnam ado’ng barij ranabtin, do barij puradan, do barij monanam batti timyimma. Do engale aman timyimdamtin etile toi toi sing mar nam ado’ng timyima.” Jisun abyar bireitid, “Aman sakkai! Bogad aman kanate lumlenden, aman Ir-ahid mandrengnan hangte.”

Bindo kun anosaij ganalam maran anin amandrengnan ati sakkai gamle mandranji ado’ng absuibin asan itsumetid. Bar anin Jisun ado’ng ualletid, “Etiden toi toi sing mar-hen butin?”

Jisun anosai ganalam maran ado’ng bo kata biran batti abyarbirretid. Bo Jiudi maran Jirusalem saring Jiriko a tangorlingan hanagodlingan yeiretid.”

“Bindo dajinganti Jumbwr maranji anin ado’ng gijle hamleji. Anin amanglingan a dakulin a kuddub janaban ruileji do anin ado’ng ab’rahid tidlaji. Ansaring aninji omdale yeireji.”

“Anti atabdong, kun a tangorlingan bo Jiudi buya maran sanaitid. Kun buya maran gijetid do tangor lingan bo mandra alulud dakuli. Anganti anin ado’ng gijetid, tangoran bigard maneng mordengle yeiretid. Anin kun mandran ado’ng adgijgijed.”

“Asui ayam atiki, kun atangorlingan bo Lebi mar sanle yeiraitid. (Lebi maranji Jiudinji saring bo tegan butinti sareba si’nglingan buyanji ado’ng sayamteji.) kun Lebi maran janang bigarda manengan sansanlin yeiretid. Anin janang anin ado’ng adgijgijed.”

“Bo bigarda mar janang kun tagoran sanle yeiretid anin Samaria saring dakuli. (Samarianji do Jiudinji amanglingan arasangiman dakuli) Samaria maran kun mandran ado’ng gijetid. Anin gijetid do anin bo Jiudi mar dakuli, deli janang den anin ado’ng gijan gijle boi boi asuyimdali. Bar anin amang ban iyan iyle a panaran sindrin batti jile do bolode-tid.”

“Ansaring kun Samaria maran a’pekud lingan abgob goble urungetid. Anin ado’ng tangorban bo si’ngban sikoija urungetid. Tittid anin ado’ng sanagalan deli.”

“Anab biyo, Samaria maran bar okij ayirbin dakuli. Anin regam si’nglingan abhana mar ado’ng lebun tiyetid. Anin anin ado’ng gametid, ‘kan a mandra ado’ng sagala. Kan alebu saring bogad aman ateng karsulenden, anganti hen yartinai kun ayam hen dongnam bar okkij lebun tiytam.”

Ansaring Jisun kun anosaij ganalam maran ado’ng ualetid, “Itinti aman ogalte? kan yagi mandranji saring butin kun jumbwr maranji a tidlenji amandra a toi toi si’ng mar deti?” Anin abyar birretid, “Butinti anin ado’ng asuyimdali.” Jisun anin ado’ng gametid, “Aman yira do kun ambrij e-luma.”