23. Jisun A,karukudan

Marin bo roitad mar Josepo gamle ahim mar bati janijin deli. Anganti anin Marin apanguron do kun apasijan aonantid gamle galametin. Yanti gamle, anin Marin adong gananroidagi irabmelabi, anin butijja ir-gadlamlabi Marin adong alung ji’n lingan aomdabin asan ogandietin. Bindo anin inrang lumen abmang, Pisirdian anin aganumtelingan iyan iyle anin adong opinggetin.

Pisirdian gametin, “Josepo, Marin adong ansalonam gamle ajabin asan batongdongamti. Akanpunglingan adakun apasij Marid Janggardan saring pananguronan deli. Anin bo ongger onan kudte. Anin ahiman Jisu gamle tihba (agaramgaman “Yahweh ablute’), itin asan gamlenden anin amandranji adong apintunji saring rabrabte.”

Bar Josepon Marin adong sidrungle insalo hen gamle asingbadaman urungetin, bindo Marin inrang kudden sikkoija anin merin bati addimaded.

Anganti Marin kukkudonan ayaman tuyali, anin do Josepon Bethliam gardaban yirreji. Aninji yirbin ati dakuli itin asan gamlenden Roman disan adanne mar Israellingan mandranji adisambin itsumetin. Aninji kuddubanji ajujunji adakulinanji adisaling ayirbin asan itsumleji. Daudon Bethliamlingan karukkud deli, do Marin do Josepon bagunji ajuaju anin dakuli.

Marin do Josepon Bethliamban yirreji, bindo tittilingan dajingti jontunji adarkku sadle aninji apsele darakunan adakued. Kun titti jontun adarakkuling Marin pasijan kudetin. Anin pasijan adong arabludludan adakueddan asan tarihda bungsanglingan abludludetin. Aninji pasijan adong Jisu gamle tiyhumleji.

Kun atogal, dajinganti gupamed maranji basenglingan mandamedan turdaleji. Abubmungdagi, bo Pisirdian tanaaran bati amangbanji gijtali, do aninji boi boi batongleji. Pisirdian gametin, “bantongdagi adedong, itin asan gamlenden hen ambin apsele bangsa anoblingbiran panglai. Mesian, gamangan, Bethliam lingan karukkud deli.”

“Maba Yirba do pasijan adong isaijba, do ambin pasijan sindrin bati ayanum do bungsang lingan anabludlud ahangte.” Abubmungdagi, rianglingan Pisirdianji barij ganijtan deli. Aninji Kitungan adong sinleji. Aninji gamleji, “kudduban aganugun ruang Kitungan ati. Ordarlingan anin amandranji amanglingan sanabyun deeti!”

Ansaring Pisirdianji yirreji. Gupamed maranji kimmeddan umdale pasijan adong agijbin asan yirreji. Aninji uanti amaneng Jisun dakuli umeng arduleji do Pisirdian aoplinggetinji ambrij pasijan bungsanglingan anabludlud gijleji. Aninji boi boi moihdaleji. Ansaring gupamed maranji garupa janonglingan kimmedanji amangban yarrenji. Aninji amdanglenji do agijleji akudduban asan Kitungan adong sinkinraleji.

Darungyung disan dajinganti mandranji dakuliji. Aninji tuituijan sannileji do aninji boi boi banudimar dakuliji. Aninji tabmedage ruanglingan tuituijan gijleji. Aninji gamleji kani tuituijan agaramgaman manan bo tabme jiodinji araja karukkudan deli. Bar aninji adisanji saring handagoddan bati pasijan adong agijbin asan gabriji’linji. Sanggai hanagodlinanji atiki, aninji Bethliamlingan uanti Jisun do ayangan auan dakulinji titti ardulaiji.

Anganti kan amandranji Jisun adong ayangan ampra gijleji, aninji anin adong turdumjinglin limle sinpurleji. Aninji Jisun adong janatidam tanihtiyan tiyleji. Ansaring aninji asingdamanji yarrinji.