22. Jon A’karukudan

Aparmangtan, Kitungan tungmadgij maranji a’dong oblingetedji do aninji amandranji amangban oblingetiji. Ansaring 400 ringring mihnum dakuli do Kitungan mandranji adong itija birna adnoblingged. Kitungan Pisirdian adong Jikoriya gamle bo buya mar amang appaiyetin. Jikoriyan do a insalon Elisabeth, Kitungan a’dong gankileji. Aninji ateng taledbaleji, do anin pasijan ad’kuded.

Pisirdian Jikoriyan a’dong gameten, “si’ing boinam bo ongger onan kudte. Aman anin ahiman Jon gamle dakua. Kitungan Marid Jangardan bati anin adong barij abmete, do Jon Mesian hangeteji gamle mandranji a’dong osbate!” Jikoriyan jalangle gametin, “insalo hen do hen anlen talaibagod ayam adnang pasijan a hangtai! Kan ati jardi oblingtih gamle hen yangam galamai?”

Pisirdian Jikoriyan adong jalangle gametin, kan a bangsa anobling mangbanam a panglanbin asan Kitungan amang saring anappaiyan delihn. Itinasan gamlenden aman birna hen ad dirne, anti asan aman pasijan karukud inrang deen sikoija birnan birrin adraptie. Atabdung, Jikoriyan birrin adraptied. Ansaring Pisidian Jikoriyan amang saring yereitin. Kan atiki Jikoriyan si’ingan dayarnetin do a si’ing boijan pananguronan deli.

Aganti Elisabeth tudru angai a panguron dakuli, kuni na a Pisirdia Elisabeth akulam mar amang abgijnetin, butinti ahiman Meri dakuli. Anin bo poilang boi dakuli do anin Josepo gamle bo mandran bati sidrungan debin asan panimingan deli. Pisirdian gametin, “Aman pananguronan dele bo onger onan kudte. Anin ahiman Jisu gamle tiyhima. Anin kuddub saring lananka Kitungan a mihtub onan do anin odaran abhanate.”

Merin abyarbirre gametin, “ kan ati yangam deti, hen nam sikoija dangardi daku?” Pisirdian padlabireti, “Marid jangardan mangling nam yeirtai, do Kitungan a ranapti manglingnam yeirtai. Bar kun apasijan Mariddam deti, do anin Kitungan a onan deti.” Pisirdian a birna Merin dernetin.

Kun ati adelin atabdong, Elisabeth a si’ngban Meri yeretin. Anganti Meri anin adong limetin, Elisabeth alung kanpunglingan pasijan irjangetin. Kitungan Amang linganji alumeten apsele aninji boi boi moihdaleji. Elisabeth Meri asi’ngban yagi anggai sikoija dakulinan atiki, Merin asi’ingban dayarnetin.

Kan atiki, Elisabeth bo ongger onan kude-tin. Pisirdian abahentinji ambrij Jikoriyan do Elisabeth pasijan adong Jon gamle tihyumleji. Atiki Kitungan Jikoriyan adong bar okij birnabin apsele ranabtin tietin. Jikoriyan gametin, “Kitungan ganugun de’eti, itin asan gamlenden anin amadranji adong sayambin asan ayimetin! Aman, onhen na, aman Kuddub saring lanangka Kitungan atungmadgijmar dete. Aman mandranji adong yan gamle aninji apintunji saring tanadmadan hangteji anti ati oblinga!”