24. Jon Jisun Adong Tabbubdate

Jikariya do Elisabet aonan, Jon, surdali do bo tungmadgij mar deli. Anin ringring darakunalingan basuetin, kandringan adangda do surda papparan jumetin, sisibongdan ausalan saring asanabjan asindrin jijinetin.

Jon abirna amdangbin asan ateng mandranji ringring darakunaban dunglin yiraiji. Anin hanagan tiyle, gametin, “Abyarj’inaba, itin asan gamlenden Kitungan Arajaman tuiali!”

Angati mandranji Jon abirna amdangleji, ateng mandranji aninji apintunji saring abyarj’ilinji, do Jon aninji adong tabbubdaetin. Ateng murda danne maranji janang Jon adong agijbin asan yiraiji, bindo aninji adnabyar j’ineji orde apintunji adnabpingbaeji.

Jon murda danne maranji adong gametin, “ambin bison batti barij adakun aj’adanji! Abyarj’inaba do anabhanabin bandaba. Uanti araji j’on adj’oe Kitungan kun akuddub aranji raibabte, do anin kun akudduban to’gilingan sidte.” Tumadgij maranji abiran Jon badrijle, “ gijba, anappai mar-hen mukkaba-nam Hen appaitai, butinti tanggornam oskaite.”

Dajinganti murda danne maranji anin bogad paring Messian gamle Jon adong ualleji. Jon abyar birre gametinji, “ Hen Messian ted, bindo hen atiki Anin yirtai. Anin bo surda ganugudam do anin atalabjing lingan apanduian janang aurbin asan hen ir-tungnadam.”

Anti adinna atiki, Jisun tabbubdan ahangbin asan Jon amangban yiraitin. Anganti Jon Jisun adong gijetin, anin gametin, “ gijba! Titti Kitungan amurkundarda butinti ordaran apintu pangle yirte.”

Jon Jisun adong gametin, “Hen dongnam atabbubdabin asan ir-tungnadam. Aman ma’ih donghen atabbubdabin asan tungna daku.” Bindo Jisun gametin, “aman donghen atabbubdabin detina, itin asan gamlenden kan alanuman sakkai daku.” Bar Jisun pintun adlumed deli janangden Jon anin adong tabbubdaetin.

Jisun tabbubdan dean dele dunglinaihen adnang, Kitungan ajanggarda bo paruan ambrij riangan saring latsolin anin akaparda lingan duihlin. Antin ayamlingan, Kitungan ruangan saring birretin. Anin gametin, “Kani ati ongger On-Hen na. Hen anin adong ateng timyimtai, do anin asan Heni ateng moihintinai.”

Kitungan Jon adong gametin, “Aman atabbubdalen amandra alaningka Marid Janggardan latsotinai. Kun amandra na Kitungan a-Onan.” Aboi Kitungan satta daku. Bindo anganti Jon Jisun adong tabbubdaetin, anin Ua-Kitungan abirna amdangetin, A-On Kitungan Jisu adong gijetin, do anin Marid Janggardan adong janang gijetin.