21. Kitungan Messian Apsele Jibjibnetin

Anganti Kitungan odaran gabdiletin, anin janang galametin do anin ateng mihnum atiki ordarlingan Messian appaite. Kan ati lumtai gamle Anin Adam do Aban a’dong jib jible oppungetinji. Anin gametin do jaadan abab arabrdibin asan Aban a kanpungligan saring karudkudan deti. Jardina Aban a’dong a joldabin asan sanuman jaadan ilneten. Kitungan gabrijienetin do Messian duaihn suman aranaptin kuddub abladnate.

Kitungan Abram a’dong jib jible gameten do anin sanle ordaran a kuddub jatinji anab sitan hangtaji. Ateng mihnum atiki Messian appaile Kitungan janibjib biran abojoraite. Messian odarlingan kuddub jatinji a’pintunji saring rabrabte.

Kitungan Mojeson adong jib jible gametin do ateng mihnum atiki Mojeson ambrij bo tungmadgij maran appaite. Kan atungmadgij maran Messian na. Kan ambrij Kitungan Messih a’dong appaibin asan jibjibnetin.

Kitungan Daudon rajan a’dong jibjible gametin do aboi teganam saring Messiah yeirtai. Anin na rajan do Kitungan amandranji abhanate.

Kitungan Jirimiyo tungmadgijmar adong gametin do anin bo dinna bo tabme sanibdeibiran ganabrite. Tabme sanibdeibiran Kitungan Sinai barulingan Israelanji ampra asabjaetin asanideibiran ambrij adee. Anganti anin tabme sanibdeibiran mandraji ampra gabrite, aninji anin a’dong bangsale galamteji. Dile mandranji anin a’dong timyimteji do anin anosoijanji maniteji. Kitungan gametin kan a’kuddub anosoibiranji a’ugarlinganji idolltenji ambrij. Aninji a’mandranji detiji, do Kitungan a’pintunji tabmate. Messian na mandranji ampra tabme sanibdeibiran sabjate.

Kitungan a’tungmadgij maranji janang gamleji do Messian na bo tungmadgijmar, bo buyamar do bo rajan. Bo tungmadgij maran Kitungan a’birna amdangle kuddub mandranji a’timang lingan Kitungan a’birna a’pingbale gadlamte. Ayinganti Kitungan Messian appaitai gamle jibjibnetin anin na bo tungna tungmadgijmar. Kuni na, Messian Kitungan a’biranan sakai amdangte, anin sakai gamle ganludte, do anin kuddub mandraji a’dong sakai gamle hanghangte.

Israellanji a’buyanji mandranji apsele Kitungan a’dong kanuban tiyle dakuleji. Kan akuddub kanubanji mandraji Kitungan apanaddradan saring ranab raban hangbin asan lumleji. Buyanji janang mandranji apsele Kitungan amang garbirlinji. Yanti gamle janang, Messian anindaman marid kanubdagi Kitungan amang kubdamtin do anin bo marid buyan deti. Anin pintun adlume, do anganti anin anindaman kanubdagi tihdamtin, pintun asan itija kanuban sanaisaidagi addee.

Rajanji do murda maranji mandranji adong abhanaleji, do aninji tangboi ayamlingan ardodleji. Daudo rajan Israellanji a’dong satta abhanaetin. Bindo Messian, Daudon audlengon, kuddub ordaran abhanate, do anin tordong ayam asan abhanate. Anin ditordong ranoitadan bati abhanate do sakkai biran gabrite.

Kitungan a tungmadgij maranji Messian apsele ateng birnan oblingleji. Arabsui biran, Molakin gameten do Messian ayirtahen abmang bo tungmadgij mar yertai. Ante atungmadgijmar boi boi Sanaid saidam. Atiki Jisayo tungamadgijmar idoletin do bo poilang bojan sanle Messian karudkudan deti. Do Mika tungmadgijmar gameten do Messian Bethliam gardalingan karudkudan deti.

Jisaya tungmadgid mar gameten do Messiah galili gorjanglingan dakuten. Messian danukalingan adaku maranji a’dong babyete. Krojosing lingan adakun amanraji a’dong abumrengte. Messian bimbim maranji a’dong absamangte do ayinganti a mandraji adnamdangeji, adgijeji, adbirneji orde adhaneji kuddubanji absamangte.

Jisayo tungmadgijmar janang gameten do Messian a’dong mandranji asanggimteji do ajabin asan asateji. Bigarda tungmadgij maranji gamleji do atudumaran na anin a’dong asanggimlingan tanagte. Jikoriyo tungmadgijmar gametin do kun a turdumar bokudigalji rupa leban jale kan a bara lumte. Atiki janang dajinganti tungamadgij maranji gamleji do mandranji Messian a’dong tuabteji, do aninji asindrin arruiteji.

Tungmadgij maranji Messian yan gamle karahindan hante kun ati janang oblingleji. Jisayon tungmadgij biran oblingetin Messian a’dong bijolteji, gabroiteji do tidteji. Anin iteja danusa baran adlume dele janangden, Aninji anin a’dong poteji, do anin boi boi anasudan bati karahidan deti.

Tungmadgij maranji janang gamleji do Messian pintun adlume. Anin marid dakuti. Bindo pintu maranji asan Kitungagn anin adong kanabhid panadradan tihyte. Anganti anin kahindti, mandranji Kitungan ampra sanabyu lingan dakutinji. Kanti asan, Messian akahidbin deti gamle, Kitungan anogalan dakuli.

Tungmadgij maranji janang gamleji do Kitungan Messian adong karahiddan saring abdite. Kanati absuite do Kitungan tabme sanibdeibiran asanabja asan Jisun akarhidan do amandrengna Kitungan aganabri birlingan dakuli, yanti gamle anin asanggimle pintun alumlenji amandranji adong rabrabte.

Kitungan tungmadgij maranji amangaban ateng Messian abirna abgijetin, bindo kun tungmadgij maranji adakulinji ayam Messian addayaraited. 400 saring ateng mihnum atiki atanakud tungmadgij biran anoblingan deli, kun ayamlingan, Kitungan Messian a’dong Odarban appaiyaitin.