20. Krojjon Do Dayarnan

Israelanji arajaman do Judanji arajaman bagun arajamanji Kitungan asangimling pintun lumlaji. Kitungan Sinai baru lingan aninji ampra asabjaetin asanibday biran aninji admanedji. Kitungan anin atungmadgij maranji a’dong mandranji amang abkilkille ababyar ji’bin do bar okkij anin adong asinkindrabin asan appaietinji, bindo aninji amanibin asan assaleji.

Antatiki kan bagu disan a’dong asangem maranji asinling padradle radsumetin. Asariya bo bigarda disa boi boi ranabti dam dakuli. Assariyanji janang bigarda disan apsele ateng danuaihn dakuli. Aninji yeraiji do Israel desan kuddub radsumle sedlaji. Assariyanji yerre Israel lingan a daku ateng mandranji kabhidleji, itinte a kuddub janab aninji itsumleji pangle yeraji do ateng maneng desan soileji.

Assarianji a-kuddub abmanggod maranji rukulinji, biti maranji, do ayinganti a-mandraji janati janaban sabjateji. Aninji a’dong Assariya desaban urunglaji. Asui tungdamjadam satan Israellanji Israel desalingan dakuleji.

Atiki Assarianji biggarda desan a-mandraji a’dong urungle desalingan abdakunalaji. Kun biggard desa maranji bar okij gardan barsabjalaji. Butinti kun disalingan dakuliji Aninji Israelanji ampra sidrunglinji. Kun amandraji aonji Samaria gamle ganudingan delaji.

Israellanji Kitungan amang addernedanji do admaniedanji asan yan gamle panadradan hangleji kun ati Juda desan amanranji gijleji. Bindo delijanag aninji kundaijan do Kinaan disan akungdaijanji gankkillaji. Kitungan tungmadgij maranji adong appaietin, bindo aninji adnamdangeji.

Bosua mihnum atiki Assariyanji Israel a-kuddub desan radsumleji. Kitungan Babylon a raja, Nabukudanezzar, Juda disa abgegebin asan appaietin. Babilon bo ranabtidam a-desa dakuli. Juda desan a-raja Nabukudnezzar a boanta a debin do dile mihnum ateng tankan atiybin asan ordietin.

Bindo asui mihnum atiki, Juda desan araja Babilon asangimlingan dinetin. Bar, Babilonji yaryarlin Juda disan adong abgegelaji. Aninji Jerusalem gardan panglaji, Kitungan a-sarebasingan radsumlaji, Kitungan a’sareba singnlingan do garda lingan a’dakulin a’kuddub bittin pangle yeraiji.

Menede baran alumlenji Asan Juda desan a raja a’dong padradbin asan, Nabakudnazzar asanu maranji atimangan a’onanji a’dong tuablaji do anin a’dong abkadulaji. Kun atiki, aninji Judan araja a’dong pangle kabhidbin asan Babilon krajasinglingan dakkuleji.

Nabakudnizzar do asanu maranji Juda arajam lingan adakkulin kuddub mandranji a’dong Babilon urunglaji, Dajinganti banagi maranji satta adong kun disaling umrengle yirreji. Kani ayam lingan Kitungan a mandraji janib jib desan balamantaman omdaleji ati banondi darakunan ganaman deli.

Kitungan amandranji apintun apsele banondi darakunalingan pangle padradetin janang den aninji a’dong do a janib jiban biranji a karida-ed. Kitungan ditordong amandranji a lananka lingan gijgijle do tungmadgij maranji sanle aninji ampra bernetin. Anin jibjibnetin do, 70 mihnum a’tiki, aninji janibjib desaban bar okij yarrin raptiteji.

70 mihnum ambrij atiki, Cyrus, Perosia araja, Babilon disan abladnaetin. Bar, Babilon a dulna, Perosia ateng desan abhanaetin. Kan saring Israellanji Jiudi gamle ganudingan deli. Aninji saring ateng mandranji karahid sikoija Babilon lingan dakulinji. Ateng talaiba Jiudinji Juda disan ayimleji.

Parosianji boi boi ranbtidam dakuliji, bindo aninji abladnalenji amandraji alananka asuyiman dakuli. Parosia disalingan Cyrus raja a’delin asui mihnum a tiki, anin kuddub mandranji a’dong gametin do bute bute Parosia desan saring Juda desaban ayarnabin aidsumte ambin yeire arabtite. Anin Kitungan a sarebasing abar gutulbin asan tankan janang tiyetin! Bar, 70 mihnum banondi darakunban atiki, asui ompu Jiuda maranji Juda lingan Jerusalem gardban yerrinji.

Anganti mandranji Jerusalem lingan arduleji, aninji sarebasingan bargutuleji do gardan ayar yar manegan kintalan sabjaleji. Parosianji kun sikoija abhanaleji, bindo bar okij Jiudinji janibjib disanligan dakulinji do sarebasingligan Kitungan adong saninkindraleji.