19. Tungmadgij Maranji

Israelanji amang Kitungan ditordong tungmadgij maranji adong apaiyetin. Tungmadgij maranji Kitungan abirna amdangle mandranji adong oblingleji.

Aaab Israellanji arajamling raja adakulin adnang Eliyon bo tungmadgijmar dakuli. Ahab bo ir-bangsa mar dakuli. Anin mandranji adong baal gamle bo kitungan adong asinkinrabin erretin guijetin. Seletin Eliyon Ahab rajan adong gametin do Kitungan mandranji adong panadradan tiyte. Anin adong oblingle gametin, “anganti sikoija hen kan tidnelingan tarubeti gamle adgamai kun ayam sikoija adtarube orde adgasirae.” Kan asan Ahab rajan barabli do Eliyon adong atuabbin asan eretin gujeitin.

Bar Kitungan Eliyon adong gametin Ahab rajan amang saring yirre ringring darakunaban isona. Bar Eliyon kun abirnan sanle Kitungan absuijetin aringring darakunalingan sonaban yirretin. Dile tagaldan do oruban ontiedan rotipon do jelun pangetin. Kan ayaman lingan, Ahab do asanu maranji Eliyon adong saijleji bindo ani ad-hangedji.

Itin asan Gamlenden titti taruban addakued, asui ayam atiki dungdamnadan ahadli. Bar Eliyon kun titti saring tuiyadaman bo bigarda disan yirretin. Kun agardalingan bo banagidam juarboijan do a’onan dakulinji. Aninji tanartuman adakuedan asan aganaganji ahidbin ati dakuliji. Bindo deli janang, insalon Eliyon ganagan atiyetin asan Kitungan insalon do aonan apsele ganagan tietin. Anin abanrai daradkulingan do miyolan addarkudlingan angaja adnahided. Kantaran ayamlingan aninji ganagan hangleji. Eliyon yagi mihnum sikkoija titti dakunetin.

Yagi mihnum tuddru angai atiki, Kitungan bar Eliyon adong oblinggetin bar okij hen taruban ab’mehtai. Kitungan Eliyon adong Israel disaban yarna do Ahab rajan bati i-arbira. Seletin Eliyon Ahab amang yiretin. Anganti Ahab anin adong gijetin, anin gametin, “Aman tedne tananga, aman kanalkalan asabjamar!” Eliyon abyarbirre gametin, “kan aman na kanalkalan asabjamar! Aman Yahaweh Kitungan adong omdale. Anin roitad Kitungan, bindo aman baal kungdaijan adong gankilte. Namihen aman kuddub Israel maranji a’dong Carmel baruban urungbin deti.

Bar kuddub Israellanji Carmel baruban yeraiji. Ayingante amandraji baal a-bernan aoblingtai gamleji aninji janang titti yirraiji. Kani a-kuddub baal sonuman a tungmadgij maranji dakuli. Aninji 450 delaji. Eliyon mandranji adong gametin, “ Amben dajing ayam sikkoija monnabin a-bandate? Bogad Yahweh Kitungan den, anin a’dong gankilba! Bindo bogad Baal Kitungan den, anin adong gankilba!”

Ansaring Eliyon baal a-tungmadgij maranji a’dong gametin, “Onggertangan tuaba, a-jelun bantiba, atiki sanoy kanublingan jelun pidba, bindo tetti lingan to’gin a-soidong. Kun ambrij hen janang tiki lumtai, do hen bigarda sanoy kanub aranglingan jelun pidtai. Ansaring bogad Kitungan kun sanoy kanuban arangalingan to’gin appayaitin den, ambin a-galamte do anin na sakkai Kitungan.” Bar baal a tungmadgij maranji kanub arangan sabjaleji bindo aninji to’gin adsoyedji.

Ansaring baal atungmadgij marji baal a’dong gudinglaji, “Ganudinglen amdangaa, baal!” Bo Dinnasing sikkoija aninji gudingleji do uai sarangle guleji do kundin bati aninji daman gaddamlinji do podam linji, bindo Baal adjalangedji, anin to’gin adnapayaited.

Baal atungmadgij marji dinna sikkoija Baal amangban garbirlinji. Aninji tanakud lingan garbiran kaddablinji. Ansaring Eliyon biggarda aranga lingan biggarda tangliyan a-jelu kanub arangalingan Kitungan apsele dakkuetin. Antatiki, jelun, angalan, do kanub arangaban yaryar manengan asoldan janag adadatin sikkoija mihgal godiya daan arubin asan mandranji adong baihentin.

Ansaring Eliya garbernetin, “Yahweh, Abraam, Issako do Jakubo a-Kitungan aman Israelanji a-Kitung do hen boantanam gamle nami adinna absuilen. Kitungan ganarbirhen amdanga do kan a-kuddub mandranji aman na roitad Kitungan gamle galamteji.”

Tabdong, ruangan saring to’hgin galuli. Anten a-to’gin bati jelun, angalan, arenganji, labon do kanub arangan ayaryar maneng adakulin a-kuddub daanji janag juntuli. Anganti mandranji kan ati gijleji, aninji labo lingan lamboteilin gamleji, “Yahweh na Kitungan! Yahweh na Kitungan!”

Ansaring Eliyon gametin, “baal atungmadgij maranji aboi janang ardur dongetiji!” Bar baal atungmadgij maranji adong hamle sangai urongan urongle aninji adong tuableji.

Bar Eliyon Ahab rajan adong gametin, “singbanam umengle yarna, itin asan gamlenden taruban yeirtai.” Tabdong abubmung lungadli do surda ganuran gurre. Ganuran Kitungan kaddabetin. Kani ati janang bati ganijtan deti do anin na jardid Kitungan.

Angantin Eliyon abaran tabkudetin, Kitungan anin apsele bo tungmadgij mar Elisayon adong seda-etin. Elisayon sanle Kitungan ateng rubmangdagi baran lumetin. Naman amanglingan janag bo rubmangda baran deli. Anin aboi sanumaranji adane mar dakuli, bindo anin muta rogaman hamle. Naman Elisayon abirn amdangle, anin Elisayon amang yiretin do anin adong ualle gametin hen ab-bangsahin. Elisayon Naman adong gametin aman Jordan aloba yira do alo daa lingan gulji tra itabbubna.

Naman brabli. Anin kan ati lumbin asan asali itin asan gamlenden kan ati anin kekadagi appardietin. Bindo tiki anin amonan bandaetin. Anin Jordan Alolingan yiretin do anin daman gulji tra daa lingan tabbubnetin. Anganti anin daa lingan saring atanakud ayamlingan dungnaitin, Kitungan anin adong absamangetin.

Kitungan biggarda tunmadgij maranji adong janang Isaraelanji amangban appayetin. Aninji kuddub mandranji a dong kungdai puranji a-omdabin asan oblingleji, kan ati sadle mandranji aninjidaman ampra ranoitadan do asuiyiman bati dakunetiji. Tungmadgij maranji mandranji adong abkilkille gamleji kungdai puran omdale Kitungan adong sandungba. Bogad mandranji kan ati adlumlenjiden, Kitungan aninji adong irsimarji gamle bitsarate, do aninji adong kanalkalan abmete.

Dajinganti ayam, mandranji Kitungan abirnan admaniedji. Aninji tungmadgij maranji a’dong adgankileji do bute bute a’dong janang tuableji. Bodinna, Jeremiyon tungmadgijmar akabhidbin asan ahaddaa kadsilingan pidleji. Anin kadsi a-kaddulingan tabubli. Bindo rajan asuyim dale do Jeremiyon inrang-kahidden abmang abuantanji adong kadasi lingan saring a-tabbin asan bahetinji.

Mandranji Tungmadgij maranji a’dong asangemleji janangden Kitungan a-birna aninji upingleji. Aninji mandranji adong abkilkile opinleji do bogad aninji adnabyar ji’linanjiden Kitungan aninji adong absi’dte. Kitungan Mesian adong appaitai gamle ajibjibnetin ati janang Aninji mandranji adong abayimleji.