18. Panalang Rajaman

Daudon rajan bakurdi mihnun disan abhanaetin. Atiki anin kahidli, ansaring a-onan Solomon Israel alananka abhanabin asan susunetin. Kitungan Soloman a’dong opingle gametin hen saring aman itin Sanaisai do hen aman apsele iten lumai. Solomon Kitungan adong opungle hen ordarlingan kuddub mandranji saring ganalamar abmeih. Kan ati Kitungan boi boi moihdali, bar anin Solomon adong ordarlingan kuddub saring ganalam mar abme’tin. Solomon ateng janab hangnetin do kuddub rajanji saring anin ganalam anabhanamar dakuli. Kitungan anin a-dong biti mar janang abmetin.

Jerusalam lingan, Solomon Kitungan asarebasingan gutuletin ayinganti ati a-uan, Daudon ogaletin do kuddub janaban rukule oskaietin. Mandranji anti saring Kitungan a’dong gankillaji do tombu singlingan kanuban irkublabi Kitungan a’sareba singlingan kanub kuban kubleji. Kitungan sareba singlingan yeraitin do Kitungan amandranji ampra dakuetin.

Bindo Soloman bigarda disan ainsalonji a’dong boi boi timyemetin. Anin ateng do boajar insalon dakule Kitungan adong admanied! Kan insalonji bigarda bigarda disan saring yiraiji do aninjidaman akitungan panglaiji do kun akitungji adong gankille dakkuleji. Solomon atalaibalin ayamlingan, anin janang insalonji akitunganji gangkiletin.

Kan a-kuddub asan Kitungan Solomon alananka boi boi barabli. Kitungan anin adong paddradbin asan arajaman bagu panalangan abme’tin. Kan a kuddub Soloman a-kahidten atiki anin lumte.

Solomon akkahidlin atiki, adangarda onan Rehobiyam Raja deli. Israel disalingan kuddub mandranji aboi dele anin adong raja gamle jaleji. Aninji Rehoboam amangban gamleji do Solomon ateng lagin baran baihnlentin do ateng panu abjijilentin. Aninji Rehobiyam adong asui baran baihnlen gamle opingleji.

Bindo Rehobiyam keka dagi aninji adong jalangle gametin. Anin gametin, “ambin agamte do Uahen, Solomon, ateng baran baihnbintin. Bindo anin saring hen a’ur lagin baran baitabin, do hen anin saring boi boi lagin do danuka baran baitabin.”

Anganti ayam anin agadlametin a’birnan mandranji amdangleji, dajinganti mandranji anin asanggimlingan dilinji. Galji teganji anin adong omdaleji; bagu Teganji satta anin ampra dakulinji. Kani bagu teganji aninji daman Judan arajam gamdamlinji.

Bar galji teganji aninji apsele Jerobam adong raja abmeleji. Kani ateganji kun a-disaba rarei sadyung amaneng dakuli. Aninji aninjidaman Israel arajaman gamle tiyhimleji.

Salitin Jerobam Kitungan asangimling yirre do mandranji adong ab-irsietin. Anin amandranji apsele saninkindra lumbin asan bagu kungdaijan sabjale. Nami Juda disan Jerusalem lingan Kitungan aserebasing lingan sinkindrabin apsele adyerreji.

Juda disan do Israel desan arsangimleji do aninjidaman ditordong sanulinji.

Tabme Israel disalingan, kuddub rajanji duain do irmarid dakuleji. Israelanji saring butinti aninji raja danne ahangbin asan itsumleji aninji titti adakulinji ateng rajanji adong kabhidleji.

Israel disalingan kuddub rajanji do kuddub mandranji kungdaijan adong sinpurreji. anganti aninji kan ambrij lumleji, aninji ditordong jundardi boijanji ampra dakulinji bar aninji a’onanji adong kungdaijan amangban kubleji.

Juda disan arajanji Daudon ategaji dakuli. Dajinganti arajaji bangsa do roitad dakuliji bar aninji ranoitaddagi disan abhanaleji do aninji Kitungan adong sinkindraleji. Bindo Juda disalingan ateng duain rajanji dakuleji. Aninji danuaihan bati abhanaleji, do kungdaijan adong sinpurrleji. Ednegoi dajingti rajanji dakuleji do aninji adiba o’nanji adong kungdaijanji amangban kubleji. Ateng Juda disalingan amandranji Kitungan asanggimle dilinji do bigarda bigarda kungdaijanji sinpurlaji.