5. Hexxote Beetto

Tonnu diri gedensaanni Abiraaminna Soora marte Kana”aani iillitu. Hatte yanna geeshsha ila dinonsa. Kunnira Abiraami galte Soora, <<Maganu ila ho’linoe; anino geedhoomma daafira soqqamaancho’ya Aggaara kuneetina adhi; anera ooso iltoena>> yitu.

Kunnira Abiraami Aggaara adhi. Aggaara labbaa beetto iltu. Abiraami, <<Isimaeeli>> yee su’ma fushshisi. Ikkollana Soora Aggaara hinaassu; Isimaeelira tonaa sase diro ikkisita Maganu Abiraami,

<<Ani Wo’manka Dandeemmo Maganooti; ate ledo gondooro e”eemmo>> yiisi. Abiraami baattote aana gombisami. Maganuno Abiraami, <<Ati lowo gosa anna ikkatto; Kana”aani baatto ateranna sirchikkira iqqa asse eemmo’ne. Anino hegerera Maganonsa ikkeemmo; atino minekki nooha labbaaha baala barcimshiishi>> yiisi.

Maganu, <<Galtekki Soora labbaa beetto iltanno; isi hexxote beetto ikkanno. Su’mano, <Yisihaaqi> yite woshshattosi. Gondooro’ya isi ledo e”eemmo>> yii. Lowo gosa ikkanno. Isimaeelino lowo gosa ikkanno. Ikkollana gondoori’ya Yisihaaqi ledo ikkanno>> yii. Maganu Abiraami su’ma, <Abirihaami> yee soorrisi. Hatto yaa <<Lowo manni anna>> yaate. Abirihaami Soora su’mano, <Saara> yee soorrise. Hatto yaa <<Lowo manni ama>> yaate.

Hakko barranni Abirihaami minesi heedhanno labballo baala barcimishiishi. Diru gedensaanni Abirihaamira 100 diro ikkisita Saara 99 dirisenni Abirihaamira labbaa beetto iltusi. Maganu yiinonsante gede su’ma, <<Yisihaaqi>> yite fushshitusi.

Yisihaaqi wedellicha ikki yannara Maganu Abirihaami amma’na fonqolara yee, <<Mitticho beettokki haadhe anera kakkalo assite shiqishie>> yiisi. Xaano Abirihaami Maganoho hajajame beettosi kakkalote qixxeessi.

Abirihaaminna Yisihaaqi kakkalo shiqinshanniwa ha’ra hanaffu. Yisihaaqi annasi፣ <<Anna’ya, kakkalote ikkitanno haqqe kune no; ge’rechu hanniyya?>> yee xa’mi. Abirihaamino, <<Beetto’ya, kakkalote ge’recho Maganu qixxeessanno>> yee dawarinosi.

Kakkalo shiqinshanniwa iillituta Abirihaami beettosi Yisihaaqi usure kakkalote darga haawiisse wori. Abirihaami beettosi gorrara billawa haa’re gotti assi; Maganu, <<Aguri, beettu aana mitte gawajjono iillishshooti; waajjattoetanna mitticho beettokki mararte anera ho’loottoekkita afoommo>> yiisi.

Abirihaami mulesi citu giddo usurame noo ge’recho afi. Maganu Yisihaaqi darga kakkalote ikkanno ge’recho qixxeessino yaate. Abirihaamino hagiirrunni ge’recho kakkali.

Maganu Abirihaamira, <<Mittichu beettikki nafa gatikkinni noohere baala aattoera owaatoottona maassi’reemmohe gede coyi’roommo. Sirchikki gordu beeddahenni roore bati’ranno. Anera hajajamoottoe daafira baattote aana noo manni baalu atenni maassamanno.