49. Haaro Maganu Gondooro

Mittu sokkaasinchi Maariyaami yinanni seemo Maganu Beetto iltanno gede Kulinose. Kunnira ise seemo heedhe labbaa beetto ilte su’ma Yesuusa yite fushshitinosi. Kunnira Yesuusi Maganoho qoleno mannaho.

Yesuusi Magano ikkinota leellishate lowo maalale loosino. Wayi aanaanni ha’rino; dambala gabbi assino; lowo dhiwamaasine hursino; durriisa fushshino; reyitinore kayisino; ontu buddeenchinna lamu qulxu’michi 5000 roorino mannira ikke gatanno gede assino.

Qoleno Yesuusi jawa rosiisaanchooti; Maganu Beetto ikkasinni roorretenni coyi’rino. Umo’ne baxxinanninte gede wole mannano baxxe yee rosiisino.

Qoleno jajja’nenna wolere baala baxxinanninte gede Maganono baxxe yaanni rosiisino.

Yesuusi Maganu gashshooti kalqete noo coyi baalunkunni roore ayirradoho yiino. Ayirano lowo geeshsha hasiisanno coyi Maganu gashshootira miila ikkate.

Maganu gashshoote eate cubbuwiinni gata hasiissanno.

Yesuusi mitu mitu manni Iso adhe gatannota, wolootu kayinni adhitannosikkita rosiisino. Mitu mitu manni dancha baatto gedeeha ikkinota kulino. Hattoo manni Yesuusiha Dancha Duduwo adhe gatanno. Wolu manni kayinni Maganu qaali wixi eannokkitenna mitto gumano laaltannokki baatto kinnaame doogote gamita labbanno. Hattoo manni Yesuusi daafira coyi’nanni sokka adhannokkihonna gordu gashshoote eannokkiho.

Yesuusi Maganu cubbaataamma baxannota rosiisino. Cubbonsa aguransaranna Oososi assi’ransara hasi’ranno.

Yesuusi qole Maganu cubbo giwannota kulinonke. Addaaminna Heewani cubbo Loossu yannara, cubbu sirchonsa baala gawajjino. Kunninni kainohunni baattote aana noo manni baalunku cubbo loosanno; Maganuwiinnino badanno. Kunnira baalunku manni Maganu baarigaara ikkino.

Ikkollana Iso ammaninohu baalu hegere heeshsho afi’ranno gede ikkinnina ba”annokki gede Maganu mitticho Beettosi ee kalqe mulla kae gatisino.

Cubbi’nenni kainohunni sao noo’ne daafira reyo maltino’nereeti. Maganuno ki’nera hanqa hasiissinosi. Ikkollana hanqosi ki’ne aana duna agure Yesuusi aana facci asse agurino. Yesuusi masiqalu aana reyi yannara, ki’ne qoricha adhino.

Yesuusi horonta cubbo diloosino; ikkollana ki’ne cubbonna kalqete nooha mannu baalu cubbo hunara qorichishamanna guuta kakkalo ikke reya doodhino. Yesuusi umose kakkalino daafira, Maganu aye cubbono, jaddote cubbi nafa gatikkinni aguranno.

Danchu loosi gatisa’nera didandaanno. Maganu ledo xaadu hee’renno’ne gede assa hasiissanno’nehu wolu coyi mittuno dino. Yesuusa callu cubbo’ne hayishsha’nera dandaanno. Yesuusi Maganu Beetto ikkinota, ki’ne darga masiqalu aana reyinotanna Maganu reyotenni kayisinosita ammana calla hasiissanno’ne.

Maganu Yesuusa ammantinorenna Mootichansa assite adhitannore baala gatisanno. Dureeyye ikkito buxane, labbaaha ikko meyata, geercho ikko beetto, woy hiikkono heedhe badooshshu dino. Maganu ki’ne ledo gamba yiino xaadi hee’rannosi gede baxanno’ne; Yesuusa ammantinarano hasi’ranno.

Yesuusa ammantinanninna cuuntinanni gede hasi’ranno. Yesuusi Buuramino Moote, mitticho Maganu Beetto ikkinota ammantinannini? Cubbaataamma ikka’nenna Maganu qorichishoomme’nero gara ikkinota ammantinanni? Yesuusi cubbo’ne hoolate masiqalu aana reyasi ammantinanni?

Yesuusanna Isi ki’nera loosino looso ammantiniro, ki’ne kiristaanaho! Maganu Sheexaanunna tunsichu gashshootinni fushshe’ne Maganunnihu xawaabbu

gashshooti giddo worino’ne. Maganu kunni albaanni hadhinoonnita akkalanna cubbaataame doogo hoole haaronna keeraancho ikkitino doogo uyino’ne.

Ki’ne kiristaanaho; Yesuusi loosino loosinni kainohunni Maganu cubbo’ne agurino’ne. Xa Maganu baarigaarre’ne agure muli fiixa asse kiiranno’ne.

Maganu fiixanna Mootichu Yesuusi soqqamaasine ikkitiniro, Yesuusi rosiisino’ne coyira hajajantinanni. Kiristaana ikkitinirono, xaano cubbo loosa fonqoltanna’ne heedhinoonni. Ikkollana Maganu ammanaminoha ikkino daafira, cubbo’ne ifaaxxitiniro agureemmo’ne yaanno. Cubbo gibbinanni wolqa aanno’ne.

Maganu huuccidhinanni gede, qaalesi buuxxinanni gede, wolu kiristaani ledo mitteenni magansidhinanni gede, assino’nerono wolootaho kultinanni gede hasi’ranno. Kuni coyi baalunku Isi ledo jawaatu fiixoomi hee’ranno’ne gede kaa’lanno’ne.