48. Yesuusi Hexxo Uyinoonni Moote Buuraminoho

Maganu kalqe kalaqi waro baalunku coyi guutaho. Cubbu dino. Addaaminna Heewani mimitonsa baxa nno; Maganono baxanno. Dhibbu woy reyo dino. Maganu kalqe hattoota ikkitara hasi’rino.

Sheexaanu gannatete Heewani so’risiisate hamashshu widoonni coyi’rino. Hakkunni gedensaanni isenna Addaami Maganu aana cubbo loosino. Insa cubbo loosansanni baattote aana noo manni baalu dhiwamanno, reyanno.

Addaaminna Heewani cubbo loosansanni kainohunni hakkinni baasino coyi ikkino. Insano Maganu baarigaarra ikkitino. Kunninni kainohunni hatte yannanni kayise mannu baalu cubbu akatinni ilamannoha ikkino. Qoleno Maganu baarigaara ikkino. Maganunna mannu mereero noo xaadi cubbunni murami. Maganoho kayinni hakkonne xaado galagalche qolate hedo noosi.

Heewani sirchi giddonni mittu Sheexaanu umo cancanannota, Sheexaanuno Iso madiissanno gede Maganu balaxe coyi’rino. Hatto yaa Sheexaanu Buuramino Moote shaanno; Maganu kayinni galagalche kayisannosi yaate. Hakkunni Gedensaanni Buuramino Moote Sheexaanu wolqa hegere hegerera cancanino. Lowo diri gedensaanni Maganu Buuramino Moote Yesuusa ikkinota xawisino.

Maganu baatto baala baote wayinni huni yannara, Iso ammantinore gatisate markaawe qixxeessino. Hakko garinni mannu baalu cubbunni goofannokki gede Maganu Iso ammantinore baala gatisate Yesuusa uyi.

Lowo dirrara qeesootu cubbinsara malino qoricha leellishate mannu daafira wo’manka woyite Maganoho kakkalo shiqishshino. Ikkollana hatti kakkalo cubbonsa hoola didandiitino. Jawiidihu Qeesootu Qari Yesuusaati. Wolu qeesootinni baxxino garinni umosi baattote aana noo manni baalu cubbo hoola dandiitanno kakkalo asse shiqishino. Yesuusi mannu baalu loosino cubbi qoricha adhino daafira, guuta Qara Qeesichaati.

Maganu Abirihaamira, <<Baattote aana noo gosa baala atenni maassantanno>> yee kulinosi. Yesuusi Abirihaami ilamaati. Isi widoonni gosa baala maassantino; kaimuno Yesuusa ammaninohu mittu mittunku cubbunni gatino; hattonni Abirihaamita ayyaanaame ila ikkanno.

Beettosi Yisihaaqi kakkalanno gede Maganu Abirihaamira kulisi yannra, Maganu beettisi Yisihaaqi darga kakkalote ge’recho shiqishino. Inike baalunku cubbinkenni reyo maltinonkereeti! Maganu kayinni kakkalo ikke ninke darga reyara Maganu wilii’licho ikkinoha Yesuusa uyinonke.

Maganu Gibitsete goofimarchu qoomama soyi yannara muso afi’rinokki wilii’licho gorridhanno gedenna mundee waalchinsara gafotenna guwanete wixidhanno gede Israeelete maate baalate kulloonni. Maganu mundee la”anno woyite hattenne minna agure sae boyirraadda ooso shiikkinni gatisino. Tenne dhagge Agure Sa”ate yinoonni.

Yesuusi Agure Sa”ate wilii’lichoonkeeti. Isi guutahonna cubbu noosikkiho. Agure Sa”ate Ayyaanira shinoonnisi. Ayino Yesuusa ammananno woyite Yesuusi mundee hakko manchira cubbu baatooshsheeti; Maganu hanqino hakko manchi aaninni sa”anno.

Maganu dooramino manni Israeelennihu ledo gondooro eino. Xa kayinni Maganu mannu baalunkura ikkannoha Haaro Gondooro uyino. Kunni Haaru Gondoorinni kainohunni gosa baalate ilama ikkino manni baalu Yesuusa ammane Maganu manni fiixa ikka dandaanno.

Muse Maganu qaale lallawino himanaancho jawaho. Yesuusi kayinni wo’munkura aliidi himanaanchooti. Isi Maganoho; kunnira isi assinohunna assino coyi baalu Maganu loosootinna qaaleeti. Kunniraati Yesuusa Maganu Qaaleeti yinannihu.

Sirchisi giddonni mittu moote ikke Maganu manna hegerera gshshanno gede Maganu moote Daawitira hexxo uyinosi. Yesuusi Maganu Beettonna Buuramino Moote ikkino daafira, hegerera gashsha dandaannohu hakkonne Daawiti sirchooti.

Daawiti Israeelete mooteeti; Yesuusi kayinni kalaqamu baalu mooteeti! Galagale daye halaalunninna keerunni hegerera gashshanno.