27. Danchu Samaarichi Dhagge

Mitto barra mittu seeru fullahi Ayihudichu Yesuusa fonqolara kae daye, <<Rosiisaancho, hegere heeshsho ragi’rate ma asso?>> yiisi. Yesuusi qole, Yesuusi qole, <<Maganu Seeri giddo mayine borreessinoonni?>> yii.

Seeru fullahi, <<Maganu Seeri, <Mooticha Maganokki wo’mu wodanikkinni, wo’ma lubbokkinni, wo’ma wolqakkinni, wo’ma hedokkinni baxi. Jaalakkino umikki gede Assite baxi> yaanno>> yii. Yesuusi qole, <<Yoottori garaho! Atino konne coye assi; heeshsho afi’rattona>> yiisi.

Seeru fullahi kayinni keeraancho ikkinota buuxi’rara hasi’re, <<Jaali’ya ayiti?>> yee xa’mi.

Yesuusi seeru fullahira dhaggeessanni, <<Mittu Ayihudichi Yerusaalametenni kae Iyyarko ha’ri.

Manchu ha’ranni hee’reenna addifulootu dagge si’usi. Noosire baala adhit ganatenni shite dalaginoha agurte hadhino.

Hakkunni gedensaanni hakkawoyintenni mittu Ayihudichu qeesichi doogo hajamanni hakkaanni hige saino. Kuni amma’note sooreessi gannoonni mancholae shawwu yee sae ha’rino. Kaa’lo hasi’re noo mancho afanni hee’re agure doogosi ha’rino.

Hakkunni gedensaanni lowo geeshshano keeshshikkinni, mittu Lewaawichu kae dayi. (Lewaawootu Ayihudete giddonni Qullaawa Mine qeesoota kaa’late doorantino ga’reeti.) Lewaawichuno mulqi’noonnihanna gannoonni mancho afanni hee’re shawwu yee wole doogo hige ha’rino.

Hattenne doogo hige ha’rinohu mittu Samaarichaho. (Samaarootu wole gobba ledo adhantino Ayihudootaati. Kunnira Ayihudootu insa ledo dibaxantanno.) Ikkollana Samaarichu gannoonni Ayihudicha afi yannara lowo geeshsha mararinosi. Kunnira shiqqi yee kaa’le madano usurinosi.

Hakkunni gedensaanni Samaarichu mancho duhe harrichisi aana wore wosinu galannowa masse towatinosi.

Soodita Samaarichu doogosi hajama hasi’rino. Wosinu mini annira shiima woxe ee, <Towatisi; kawiinni sa’e fushshatto woxi hee’riro higeemmo woyite baateemmohena> yiino>> yiisi.

Hakkunni gedensaanni Yessusi seeru fullahira, <<Tennera mayaatto? mulqi’noonnihuranna gannoonni sasunku giddo jaalu hiikkoonneeti?>> yee xa’misi. Isino, <<Mararisi manchooti>> yee dawari. Yesuusino, <<Atino hadhe hatto assi>> yee kulisi.