25. Sheexaanu Yesuusa Jifisi

Yesuusa cuuame ka”anni hee’reennanni Qullaawu Ayyaani halallitte gabba haa’re ha’risi. Hakkiicho shoyilloo barranna shoyilloo hashsha qatumi. Hakkunni Gedensaanni Sheexaanu daye cubbo loosiisa hede Yesuusa jifisi.

Sheexaanu, <<Maganu Beetto ikkoottoro, itatto gede hanni tenne kinna sagale assi>> yee Yesuusa jifisi.

Yesuusi, << <Mannaho hee’rate sagale calla ikkitukkinni, Maganu afiinni fulannohu Maganu qaalino hasiisannonsa> yine borreessinoonni!>> yee dawarisi.

Hakkunni gedensaanni Sheexaanu Yesuusa Qullaawu Maxaafi birxe fushshe, <<Ati Maganu Beettootiro, atenee kawiinni eela qolte tugi; <Lekkakki kinchu ganannokki gede qolaanchunni haadhahera Maganu sokkaasine hajajannohe> yine borreessinoonnina>> yii.

Yesuusi kayinni Sheexaaneho Maganu qaale qummi asse qolisi. <<Maganu qaali manna, <Mooticha Maganokki jiffooti> yee hajajanno>> yii.

Hakkunni gedensaanni Sheexaanu baattote gashshuwanna ayirrinyensa baala leellishe, <<Anera ubbe kumbuulittoero konne baala eemmohe>> yii.

Yesuusi, <<Ati Sheexaane, kai kawiinni! Maganu qaali manna, <Mootichu Maganikkira kumbuuli. Iso calla magansi’ri> yee hajajanno>> yii.

Yesuusi Sheexaanu jifonni diqeelamino; kunnira Sheexaanu yannate geeshsha Isiwiinni agure ha’rino. Hakkunni gedensaanni sokkaasine dagge soqqantinosi