21. Maganu Buuramino Moote Hexxo Uyi

Umonni, Maganu Buuramino Moote soyate hirqino. Umiti Buuramino Moote hexxo Addaamiwanna Heewaniwa daggino. Maganu hamashshu umo cancanannohu Heewani sirchi ilamanno gede hexxo uyino. Heewani dogino hamashshi Sheexaaneho. Uyinoonni hexxo Buuramino Moote Sheexaane horonta qeelanno yaate.

Isi widoonni kalqete gosa baala maasso afidhanno gede Maganu Abirihaamira hexxo uyinosi. Tini maasso albillitte Buuramino Moote daanno waro wo’mitanno. Isi kalaqete noo gosa baala gattanno gede assanno.

Albillittete Muse gedeeha wole himanaancho kayisanno gede Maganu hexxo uyinosi. Tini wole Buuramino Moote daafira uyinoonni hexxooti.

Sirchisi giddonni mittu Maganu mannira moote ikke hegere geeshsha gashshanno gede Maganu moote Daawitira hexxo uyinosi. Kuni Buuramino Moote Daawiti sirchi giddonni mittoho yaate.

Maganu haaro gondooro aanno gede himanaanchu Ermiyaasi widoonni qole uyino. Kuni gondoori Maganu Siina Israeelete ledo ei gedee gondooro kayinni di”ikkino. Haaru gondoorira Maganu seerasi mannu wodanira borreessanno; mannu Magano umisinni egennanno; mannasi ikkanno; Maganu cubbonsa aguranno. Buuramino Moote haaro gondooro hanafanno.

Maganu himanaano Buuramino Moote himanaanchoho, qeesichaho qoleno mootete yitino. Himanaanchu Maganu qaale macciishshe hakkunni gedensaannni Maganu qaale mannaho lallawe kulanno. Maganu soyanno gede hexxo uyinohu Buuramino Moote guuta himanaanchooti.

Israeelootu qeesooti cubbinsa daafira iillannonsa qorichira mannu su’minni Maganoho kakkalo shiqishshino. Qolteno mannu daafira Magano huuccitino. Buuramino Moote wo’ma kakkalo asse umosi Maganoho shiqishate, guuta Qeesootu Qara ikkanno.

Moote gashshootisira moohannohonna mannaho yoo yaanno manchooti. Buuramino Moote kayinni Qara ikkasinni Daawiti barcimi ayirrinyunnihura ofalle guuta Moote ikkanno. Kalqe baalate hegere gegerera gashshanno. Wo’manka woyite taashshe halaalunni gashshanno.

Maganu himanaano Buuramino Moote daafira wole lowo coye himantino. Himanaanchu Mikiyaasi Buuramino Moote daara albaanni mittu jawu himanaanchi daannota himanino. Buuramino Moote mitte seemo widoonni ilamannota Himanaanchu Isayaasi himanino. Himanaanchu Mikiyaasi Buuramino Moote Beetelihemete Katamira ilamannota kulino.

Himanaanchu Isayaasi Buuramino Moote Galiilaho hee’ranno; wodana hiiqqantinore jawaachishanno; qafadantinorira wolapho, usurantinorira tidhama lallawanno. Buuramino Moote qole dhiwantinore, macciweeltinore, illiweeltinore, danqitinore woy laanshaabbinore hursannota himanino.

Himanaanchu Isayaasi qole beebbatenni allagginsannisitanna gimbannisita himanino. Wole himanaano Buuramino Moote shitannosiri imaanasi hixunni beeqqitannotanna jaalu badhe wodhannosita balaxxe himantino. Himanaanchu Zakkariyaasi Buuramino Mootera badhe wodhanno jaalira sajjoo birra baattannosita himanino.

Kuni himanaanchi Buuramino Moote reyanno garano kulino. Isayaasi manni Buuramino Moote malxifattannosita, ajiiffattannositanna gantannosita himanino. Mitte so’ro loosinokkiha ikkirono, qassannosi; lowo xissonninna lowo shettonni reyanno.

Himanaano Buuramino Moote cubbu noosikki fayyaaleessa ikkinota coyidhino. Wolu manni cubbi qoricha adhate yee reyino. Isi reya Maganunna mannu mereeo keere kalaqqanno. Kunnira Buuramino Moote manii’ra Maganu yiino garaati.

Buuramino Moote reyannotanna Maganu qole reyotenni kayisannosita himanaano balaxxe himantino. Maganu Buuramino Moote reyonna kao widoonni qole cubbaataamma gatisata hedosi wonshe Haaro Gondooro hanafanno.

Maganu himanaanote Buuramino Moote daafira lowo coye xawisinonsa; ikkollana Buuramino Moote hatte himanaano yannara didayino. Gedeniidi himana himannihu 400 diri gedensaanni, yinoonni yannara, Maganu Buuramino Moote tenne gobba soyi.