2. Cubbu Kalqete Giddora Ei

Addaaminna galtesi Maganu seekkinonsawa haqqe noowa heedhu waro hagiirraammaho. Lamunku mulluwu no; ikkollana mllootu hee’ransa saalfattanno gede diassitinonsa. Hakkuno cubbu kalqete nookkihuraati. Insano haqqete giddo ha’rantanni Maganu ledo hasaabbanni heedhino.

Ikkollana xagaraamu hamashshi haqqete giddo no. Manchono, <<Maganu addinta haqqete giddo noo laalo baalanta ittinannikki gede yiino’neni?>> yiise.

Manchono, <<Maganu bushanna dancha egensiissanno haqqicho agurranna haqqe baalate laalo ita dandiineemmota kulinonke. <Tenne haqqicho laalo ittiniro woy kissiniro kayinni reyitinanni> yiinonke>> yitu.

Hamashshu qole, <<Kuni coyi dihalaaleho; direyitinannina tenne laalo ittiniro iIle’ne fa’nitannotanna danchanna busha affine Maganu gedeere ikkitinannita afinohuraati Maganu ittinoonte yiino’nehu>> yii.

Mancho haqqichote laalo itate dancha ikkitinota illete biiffinotanna egenno afi’rate halchishshannota ikkitinota la’e haadhe ittu. Ayiddaanniserano uyitu. Isino haqqichote laalo iti.

Hakkawoyintenni illensa fa’nitu. Mullootu nootano buuxxu; daro uddanote gede assite suffe xeeda diphate wo’naaltu.

Manchonna minaannise haqqete giddo ha’rantanni noota Maganu huuro macciishshite lamunku albisinni maaxantu. Maganuno Addaami woshshe <<Hiikko nootto>> yiisi. Addaamino, <<Haqqete giddo ha’rantanna huurokki macciishshe waajje maaxamoommo>> yee dawari.

Maganuno, <<Mullu noottota ayi kulihe? Ittooti yoommohe haqqicho laalo itittoni?>> yiisi. Addaamino, <<Tini ledo’ya heedhara oottoe mancho haqqichote laalo uyiteennae itoommo>> yii. Maganuno mancho <<Kuni assittari maati?>> yiise. Iseno, <<Hamashshu so’risiiseennae itoomma>> yitu.

Maganu hamashsho, <<Ati rumamoottoho; gagasikkinni ha’ratto; bushsha itatto; atinna mancho gibbotenni heedhinanni. Oosokkinna oososeno gibbotenni heedhanno. Manchote sirchi umokki cancananno; atino gindesi qasatto>> yii.

Maganu manchono, <<Ilatta yannara qarrakki batiseemmo; ayiddaannakki halchatta; isino atera aliidiha ikkanno>> yiise.

2. Maganu Addaamino, <<Ayiddaamakki yitinore macciishshite ittooti yee hajajoommohe haqqicho laalo itoottona atenni kainohunni baatto rumantanno. Lubbotenni nootto geeshsha daafurte itatto. Hakkunni gedensaanni reyatto; bushsha ikkoottohura galagalte bushsha higatto>> yiisi. Addaami ayiddaamasi lubbotenni noo baalira amate yee su’ma, <<Heewani>> yee fushshise. Hatto yaa lubbo uyitanno yaate. Maganu saadate goga seekke Addaaminna Heewani uddisiisinsa.

Maganu mannu danchanna busha bade afatenni ninke giddonni mittu gedeeha ikkino; kunni ka’a hiixate angasinni heeshshote haqqicho laalo tayise itannokki gede hegerano hee’rannokki gede Addaaminna Heewani biifado haqqe giddonni fushshinsa. Hakkunni gedensaanni heeshshote haqqichowa massitanno doogo agaranno gedenna tenne haqqicho laalono tayise itannokki gede wolqaataamma sokkaasine laalote haqqewa wori.