1. Kalaqama

Kunninni aanchine Maganu baalunka coye hanafinoha ikkinota buunxeemmo. Kunnira Maganu kalqenna giddose noore baala leyu barrinni kalaqino. Maganu baatto kalaqihu gedensaanni baatto tunsotenna mullichote; giddose xaara mitturino dikalaqamino. Ikkollana Maganu Ayyaani wayi aana millisanni no.

Hakkunni gedensaanni <<Xawaabba ikko>> yeenna xawaabba ikki. Maganu Xawaabbu dancha ikkinota lae <<Barra>> yee woshshi. Maganu barra tunsichuwiinni bade <<Hashsha>> yee woshshi. Maganu umi barra xawaabba kalaqino.

Layinki barra Maganu baattote iimaanni nooha fano darga kalaqino. Kunnira Maganu waa fanu dargiwiinni badi.

Sayikki barra Maganu wayi moola uullawiinni baxxanno gede assi. Maganu moola uulla <<Baatto>> waa qole <<Baara>> yee woshshi. Maganuno kalaqino coyi dancha ikkinota lai.

Hakkunni gedensaanni Maganu baatto baalanti haqqenna mu’ro fushshito yii. Yiino gedeno ikki. Maganuno kalaqinori dancha ikkinota lai.

Shoolki barra Maganu arrishsho, agananna beeddahe kalaqi. Maganu barrunna hashshu wogganna dirra baxxitanno gede assi. Maganu kalaqinori dancha ikkinota lai.

Ontikki barra Maganu wayi giddo hee’ranno kalaqamanna cea baala kalaqi. Maganu hakkuno dancha ikkinota lai; kalaqaminoreno maassi’ri.

Leyikki barra Maganu <<Baattote aana baalunku dani kalaqami hee’rona>> yii. Maganu yiino gede ikki. Mite mite loosi’nanni saadaati, godowunni ha’rannoreeti, mitu qole dubbu moyichooti. Maganu hakkuno dancha ikkinota lai.

Maganu, <<Manna daninkenninna suudinkenni kalanqo; baatto baalanna saada baala gashshona>> yii.

Kunnira Maganu bushsha haa’re manna asse seekke heeshshote foole worisi. Su’masino Addaami yini. Maganu Addaami hee’rannowa haqqe kaase shuqunanno gede hakkiicho worisi.

Kaashshu mereero lame addi addi haqqe kaasi. Heeshshote haqqichonna danchanna busha leelliishshannoti egennote haqqeno no. Maganu Addaamira haqqete giddo noota danchanna busha afissannota egennote haqqicho agurranna haqqe baalate laalo ita dandaannota kulinosi. Ikkollana danchanna busha leellishshanno haqqicho itiro kayinni reyannotano kulinosi.

Maganu mannu callisi hee’ra dancha ikkitinokkita coyi’ri. Saadate giddonni mittuno Addaami kaa’laancho ikka didandiino.

Maganu Addaami aana lowo goxicho tugi. Goxe hee’reenna midashshisinni mitto miqicho haa’re meyata seekke Addaamiwa haa’re abbino.

Addaami ise lae kae, <<Tini ane labbanno; labbaahuwiinni fultinona meyate yinosena>> yii. Kunnira mannu annasinna amasi aguranno. Galtesi ledo mitto ikkanno.

Maganu labbaahanna meyata danisinni kalaqino. Qoleno maassi’rinonsa; <<Ille ilamme oosote oosono heedho’ne, baattono wo’me>> yiinonsa. Maganu loosino coyi lowo geeshsha dancha ikkinota lai. Baalunkurinni hagiidhi. Kuni coyi baalu leyu barrinni ikkino.

Lamalki barra Maganu kalaqate looso loose gude fooliishshi’rino. Kunnira lamalki barra maassi’re qullaawa assi. Hatto assinohu lamalki barra loosu baalunkunni fooliishshi’rino daafiraati. Maganu gordonna baatto giddose noo kalaqamano kalaqinohu kunni garinniiti.