19. Himanaano

Maganu Israeelootu dhagge baalate himanaano soyinonsa. Himanaano Maganu sokka macciishshitino. Hakkunni gedensaanni Maganu sokka mannaho kultino.

Akiaabi Israeelete moohi yannara, Eeliyaasi himanaanchoho. Akiaabi mannuBa”aali yinanniha kaphu magano magansi’ranno gede assino bushaati. Eeliyaasi Akiaabira, <<Ani coyi’rammo geeshsha Israeelete xeenu woy loju dihee’ranno>> yiisi. Akiaabi kunni coyira lowo geeshsha hanqi.

Shaasira hasi’ranno Akiaabiwiinni maaxamate halallitte gobbara noo xashshiwa ha’ranno gede Maganu Eeliyaasira kulisi. Hawarro soodo cea buddeenanna maala abbitusi. Akiaabinna olantosi Eeliyaasi hassu; ikkollana diaffinosi. Moolle lowo geeshsha batidhinohura xashshuno mooli.

Kunnira Eeliyaasi mitte olluu gobba kae ha’ri. Hatte gobbara hudetenni kainohunni mitte gunniteranna labbaahu beettisira sagale goofa rakke no. Ikkirono Eeliyaasi towattinosi; Maganuno bullee gambayichunni zayiteno maaqqetenni gooffannokki gede asse qawaaxxisinonsa. Hudete yanna baalate giddo sagale noonsa. Eeliyaasino hakkiicho lowo yanna keeshshino.

Sasu dirinna daratu gedensaanni xeena ganannota Eeliyaasi Israeelete gashshoote galagale hige Akiaabira kulanno gede Maganu kulisi. Akiaabi Eeliyaasinni xaadi yannara, <<Ati qarra kalaqattohu, dayittoni!>> yiisi. Eeliyaasi qole, <<Qarra kalaqattohu ateeti! Halaalaancho Magano Kaaliiqa agurootto; Ba”aali magansi’rootto. Hanni Israeelete gashshooti manna Qermeloosi Ilaali aana gamba assi>> yiisi.

450 Ba”aali himanaano ledo Israeelete gashshooti manni Qermeloosi Ilaala fuli. Eeliyaasi mannaho, <<Me”ewa kabbi facci yitinanni? Kaaliiqi Maganohoro Isira soqqamme! Ba”aali Maganohoro Ba”aalira soqqamme!>> yiinsa.

Hakkunni gedensaanni Eeliyaasi Ba”aali himanaanora, <<Mitto middicha gorritine kakkalote shiqishshe; giira kayinni giirtinoonte. Anino hatto asseemmo. giiratenni dawarannohu hakku halaalaancho Maganooti>> yiinsa. Kunnira Ba”aali qeesooti kakkalo qixxeessitino; giirano digiirtino.

Hakkunni gedensaanni Ba”aali himanaano, <<Ba”aali, ballo macciishshinke!>>yitanni huuccidhu. Barra wo’ma woxaratte huuccidhu; bisonsano billawunni murmudhitu.

Goofimarchoho Eeliyaasi Maganoho kakkalo qixxeessi. Maalano, haqqeno Kakkalote dargi baatto qooxeessi nafa co’o yee shamanno gede waa lame gambayicho wo’ma kakkalote aana dunanno gede mannaho kuli.

Hakkunni gedensaanni Eeliyaasi, <<Kaaliiqi, Abirihaami, Yisihaaqinna Yaiqoobi Magani, Ati Israeelete Magano ikkoottota anino soqqamaanchokki ikkoommota techo leellishi. Ati halaalaancho Magano ikkoottota kuni manni afanno gede dawarie>> yii.

Hakkawoyintenni giira gordunni dirrite maala, haqqe, kinna, ishinenna qooxeessaho noo waano ittu. Mannu konne coye lai yannara baattote aana uwe, <<Kaaliiqi Maganoho! Kaaliiqi Maganoho!>> yii.

Hakkunni gedensaanni, <<Ba”aali himanaano mittuno gattoonke!>> yii. Kunnira mannu Ba”aali himanaano amade haa’re ha’re shii.

Hakkunni gedensaanni Eeliyaasi Moote Akiaabira, <<Xeenu dayinona rakke higi>> yiisi. Hakkunni gedensaanni gordo kolishshi’ri; xeenano barada hanafi.Kaaliiqi moolle uurrisi. Isi halaalaancho Magano ikkinota buuxxu.

Eeliyaasi diri gedensaanni, Maganu himanaancho ikkanno gede Elsai yinanni mancho doori. Maganu Elsai widoonni qole lowo maalale loosi. Maalalete giddo mitte bushu taraawannohu gogu dhibbi mittu diinu olanto gaadaanni Ni”imaani yinannihu aana uwino. Isino Elsai duduwo macciishshe hursannosi woshshi’ri. Elsai Yordaanoosi Wayi giddo lamala hige lixe fulanno gede Ni”imaanira kulis.

Ni”imaanira umo gowwimma labbeennasi hanqe Elsai yiino gede di”ikkino. Gedensaanni kayinni hedosi soorre Yordaanoosi Wayi giddo lamala hige lixe fulino. Wayi giddonni fulanno woyite bisisi co’o yee soorramino. Maganu hursinosi.

Maganu wole haammata himanaano soyino. Baalunku mannu kaphu maganna magansi’rannota ittissanno gedenna wolootaho halaale coyi’rannonna mararanno gede kultino. Himanaano busha loosa agura hoogironna Maganoho hajajama giwiro, Maganu saote kiirannonsata kulte manna qorophisiissino.

Rooriidi yanna mannu Maganoho dihajajamino. Roore yanna himanaanote aana noonsa hedo bushate; mito mito woyite shitinonsa. Mitte yannara, himanaanchu Ermiyaasi moola wayi balera giddo tugge reyanno gede agurtino. Balete hundaho noo sabbi giddora eino. Ikkollana moote marare reyikkinni balete giddonni goshooshshe fushshitannosi gede soqqamaanosi hajaji.

Himanaano mannu giwinsaro nafa Maganoho hee’ransa diuurrissino. Cubbonsa ifaaxxa hoogguro Maganu hunannonsa gede kulte manna qorophisiissino. Qolteno Maganunnihu Buuramino Moote daannota uyino hexxo mannaho qaagiissitino.