18. Beehamino Gashshoote

Lowo diri gedensaanni Daawiti reyi; beettisi Selemooni Israeelete moohi. Maganu Selemoonira coyi’re roorse maricho hasi’rannoro xa’minosi. Selemooni hayyo huucci’rita, baattote aana lowo geeshsha hayyicha mancho assinosi. Selemooni lowo coye rose taashshanno jawa hayyicha ikkino. Maganuno lowo geeshsha dureessa assinosi.

Selemooni Yerusaalamete annisi Daawiti hedinohanna hasiisannore shiqishinoha Qullaawa Mine mini. Xa mannu Xaadu Dukkana agure Qullaawa Mine Magano magansi’ri; kakkalono shiqishisi. Maganu daye Qullaawa Mine leelli; hakkiicho mannisi ledo hee’rino.

Selemooni kayinni wole gobba meento adhino. Kiiro 1000 ikkanno meeno adhe Maganoho hajajo hunino! Hakko meenti giddo rooru gobbayidinni dayinoreeti; magannansa haa’re daye insa magansi’rino. Selemooni geedhi yannara hatte maganna magansi’rino.

Maganu Selemoonira hanqino; Selemooni ammanama hooginohura qorichaho isi reyihu gedensaanni Israeele lamu gashshootira beehantanno gede coyi’rino.

Selemooni reyihu gedensaanni beettisi Roobiaami moohino. Roobiaami hayyo diafi’rino. Israeelete manni gudisame moohisasira gamba yiino. Selemooni lowoha wolqate looso loosiisinonsatanna lowo giwire baatisiisinonsata xe’aabbinore Roobiaamira ku’litino.

Roobiaami balala dawaro qolanni, <<Anni’ya Selemooni wolqate looso loosiisino’ne gede assitine heddinoonni; ani kayinni hakkiinni saino looso Loosiiseemmo’ne; isinni roorse wolqatenni gashsheemmo’ne>> yii.

Tonne Israeelete ga’re Roobiaamira badhe wodhitu. Isira lame ga’re calla ammanante keeshshitino. Kuri lamenti ga’re Yihudu gashshoote ikkitu.

Roobiaamira badhe wodhitinori wole tonne ga’re Iyorbiaami yinanni mancho moote assidhe shoo’mitino. Gobbate aliyye ragaanni gashshoote uurrisidheenna, Israeelete gashshooteeti yinoonninsa.

Iyorbiaami Maganoho badhe wodhe mannu cubbo loosanno gede assino. Yihudu gashshootira noohuwa Qullaawu Minira ha’re Magano magansi’ra agure mannu magansi’ranno gede lame misilla seekkino.

Yihudunna Israeele mimmitoho diinna ikkite batinye higge olantino.

Haaru Israeelete gashshootinna mootoollansa baala bushuulleho. Tenne mootoolla giddo rooru, dargansa mookkara hasidhinori shitinoreeti.

Mootoolla baalanna rooru Israeelete gashshooti manni kaphu maganna magansi’rino. Kaphu maganna magansi’ransa roore yanna akkimallenniha siimu xaadooshshinna ooso kakkala ledo noote.

Yihudu mootoolla Daawiti sirchooti. Tenne mootoolla giddo mitu mitu garunni gashshitinorinna Magano magansidhinori no. Roore mootoolla kayinni bushuullehonna mancaootaho; kaphu maganna magansidhino. Mitu mitu qolte oosonsa nafa kaphu magannara kakkaltino. Rooru Yihudu mannino Maganoho badhe wodhe wole maganna magansi’rino.