47. फिलिप्पी मा पौलुस अखिन सीलास

जब शाऊल न पुरो रोमी साम्राज्य मा यात्रा करिस त वन आपरो रोमी नाव “ पौलुस ” को उपयोग करणों सुरू कर देईस | एक दिवस , पौलुस अखिन ओको संगी सीलास फिलिप्पी नगर मा यीशु को बारे मा शुभ संदेश सांगन लाईक गया | वय गाँव को बाहेर नदी को किनारो पर एक जागा पर गया जहाँ लोख प्रार्थना करण लाईक जमा होता | वहाँ वय लुदिया नाव को एक बायको सीन मिलया जो एक व्यापारी करत होती | वा परमेश्वर सीन प्रेम करत होती अखिन ओकी आराधना करत होती |

परमेश्वर न लुदिया ला यीशु को बारे मा संदेश पर विश्वास करन लाईक तैयार करिस | पौलुस अखिन सीलास न ओला अखिन ओको परिवार ला बपतिस्मा देईस | वन पौलुस अखिन सीलास ला आपरो घर रुकन लाईक बुलाईस , येकोलाईक वय वहाँ रुक गया |

पौलुस अखिन सीलास लोखहीन सीन अक्सर वन जागा पर भेटत होता जहाँ यहूदी लोख अक्सर प्रार्थना करत होता | हर दिवस जब वय वहाँ जात होता त एक दासी टुरी जाय दुष्टात्मा लक जकड़ी होती उनको मंग मंग जात होती | येन दुष्टात्मा को लक वा लोखहीन को भविष्य सागत होती , येकोलाईक वा भविष्य सागन वाली को जसो आपरो स्वामी ला बहुत पैसा कमाके देत होती |

ऊनको जान को समय मा वा दासी टुरी चिल्लावत होती , “ ये आदमी परम प्रधान परमेश्वर का सेवक सेत | ये तुमला उद्धार को मार्ग साग राया सेती ! ” वा हर दिवस असो करत होती जोकोलक पौलुस नाराज भए गएव |

आखरी मा , एक दिवस जब वन दासी टुरी न चिल्लावनों सुरू करिस , त पौलुस न ओको कर घूम सारी ओको अंदर मा को दुष्टात्मा सीन कहीस , “ यीशु को नाव लक येकों मालक निकल जाए | ” वंधावरच वन दुष्टात्मा न ओला छोड़ देईस |

वन दासी टुरी का स्वामी बहुत गुस्सा भय गया | ऊनला मालूम भए गएव की बगेर वन दुष्टात्मा को वा दासी टुरी लोखहीन ला भविष्य नहीं सांग सिकत होती | येकों अर्थ होतो की लोख आता ओको स्वामीहिन ला पैसा नहीं देयेती की ऊ उनला भविष्य सांगे की उनको संग का होए |

येकोलाईक वन दासी टुरी को स्वामी पौलुस अखिन सीलास ला रोमी अधिकारीहिन को जवर लिजाईन | उन्न पौलुस अखिन सीलास ला पिटिन , अखिन मंग अदिक ऊनला जेलखानों मा डाक देईन |

ऊन पौलुस अखिन सीलास ला जेलखानों को असो भाग मा राखिन जहाँ पर सब लक जादा सिपाही होता | यहाँ वरी की ऊन उनको पायहिन ला लकड़ी को मोठों टुकड़ा मा जोड़ देईन | पर पौलुस अखिन सीलास अरधो रात को समय मा , परमेश्वर की स्तुति का गीत गावत होता |

एकदम लक , एक भयानक भूकम्प भएव ! जेलखानों का पूरा दरवाजा खुल गया , अखिन पुरो कैदीहिन की हथ्कडी खुल सारी खालत्या पढ़ गई |

तब दरोगा उठ गएव | वन देखीस की जेलखानों का दरवाजा खुला होता | वन सोचिस की सपाई कैदी बच सारी पराय गया होता | ऊ घबराय गएव की ऊनको पराय जान को वजह लक रोमी अधिकारी ओला मार डाकेती , येकोलाईक ऊ खुद ला मार डाकन लाईक तैयार भए गएव ! पर पौलुस ओला देख सारी चिल्लाएव , “ रुक जाय ! खुद ला नुकसान नोको करूस | आमी सबजन यहा सेजन | ”

वन दरोगा न काँप सारी पौलुस अखिन सीलास को जवर आय सारी खबर लेईस , “ उद्धार ला प्राप्त करन लाईक मी का करू ? ” पौलूस न जवाब देईस, “प्रभु यीशु पर विश्वास कर , त तू अखिन तोरो परिवार को उद्धार होए जाए | ” तब ऊ दरोगा पौलुस अखिन सीलास ला आपरो घर लिजाईस अखिन उनको घावहिन ला धोईस | पौलुस न ओको घर का पुरो लोखहीन ला यीशु को बारे मा शुभ संदेश ला सुनाईस |

दरोगा अखिन ओको पुरो परिवार न यीशु पर विश्वास करिस , येकोलाईक पौलुस अखिन सीलास न ऊनला बपतिस्मा देईन | तब दरोगा न पौलुस अखिन सीलास ला जेवन ला देईस , अखिन वय एक संग आनन्दित भया |

दूसरों दिवस नगर का गुरुहीन न पौलुस अखिन सीलास ला जेलखानों मालक आजाद कर देईन अखिन फिलिप्पी लक चली जान लाईक कहिन | पौलुस अखिन सीलास लुदिया अखिन काई दूसरा संगीहिन सीन मिल्या अखिन ओको बाद मा गाँव लक निकल गया | यीशु को बारे मा शुभ संदेश बगरत गएव , अखिन कलिसिया बढत गई |

पौलुस अखिन दूसरा मसीही गुरुहीन न बहुत सारा गाँवहिन की यात्रा करिन | ऊन लोखहीन ला यीशु को बारे मा शुभ संदेश सूनाईन | ऊन कलिसियाहिन का विश्वासीहिन ला उत्साहित करन लाईक अखिन शिक्षा देन लाईक कई पत्रहिन ला लिखिन | येकों मालक काई पत्र बाइबल की पुस्तक बन गई |