46. पौलुस मसीह विश्वासी बन जासे

शाऊल नाव को एक आदमी होतो जेन यीशु पर विश्वास नहीं करी होतीस | जब ऊ जवान होतो , तब वन स्तिफनुस ला मारने वाला लोखहीन को कपड़ा ला देख-रेख करत होतो | बाद मा , वन विश्वासीहिन ला सताईस | वन यरुशलेम मा घर - घर जायसारि आदमी अखिन बायकाहिन ला दुई ला गिरफ्तार कर सारी जेलखानों मा डाकत होतो | तब महायाजक न शाऊल ला दमिश्क गाँव मा जान की परवानगी देईस | वन वहाँ का मसिहिहिन ला गिरफ्तार करण ला अखिन उनला वापिस यरुशलेम धरकर आवन लाईक शाऊल सीन कहिस |

अधिक शाऊल न दमिश्क जान की यात्रा ला सुरवात करिस | वन नगर मा जानको थोड़ों पयलेच , ओको आसपास बादर मालक एक उजाड़ो भएव , अखिन ऊ जागा पर पड़ गएव | शाऊल न कोई ला बोलता आयकिस , “ अ शाऊल ! अ शाऊल ! तू मोला कायला सताय रही से ? ” शाऊल न खबर लेईस , “ अ प्रभु तू कौन आस ? ”

जब शाऊल उठे त ऊ देख नहीं सिकत होतो | ओका संगी ओला दमिश्क मा धरसारी गया होता | शाऊल न तीन दिवस वरी काई खाईस नाहि ना काई पीईस नहि |

दमिश्क मा हनन्याह नाव को एक चेला होतो | परमेश्वर न ओको सीइन कहीस , “ वन घर मा जाय जहाँ शाऊल रुकेव से | आपरो हाथहिन ला ओको पर राख ताकि ऊ मंग डबल लक देख सीके | ” पर हनन्याह न कहीस , “ अ प्रभु , मीन आयकी सेव की येन आदमी न विश्वासीहिन ला कसो सताईस | ” परमेश्वर न ओला जवाब देईस , “ जाय ! मीन ओला यहूदीहिन मा अखिन दूसरों जातीहिन को लोखहीन मा मोरो नाव को बारे मा सांगन लाईक पसंद करलेइसेव | ऊ मोरो नाव लाईक बहुत दुःख ला झेले | ”

अधिक हनन्याह शाऊल को जवर गएव , आपरो हाथहिन ला ओको पर राखीस , अखिन कहीस , “ यीशु न , जो यहाँ आवन को तोरो मार्ग मा तोरो पर प्रकट भएव होतो , मोला तोरो जवर धाड़िसेस ताकि तू अदिक डबल लक देखन लगजों , अखिन पवित्र आत्मा तोला भर देए | ” वंधारच शाऊल मंग अदिक डबल लक देखन लगेव, अखिन हनन्याह न ओला बपतिस्मा देईस | तब शाऊल न खानो खाईस अखिन मंग अदिक डबल लक बलवंत भए गएव |

तब पासून , शाऊल न दमिश्क मा रव्हन वाला यहूदीहिन मा प्रचार करणो चालू कर देईस | वन कहीस , “ यीशुच परमेश्वर को टुरा आय ! ” यहूदी लोख अचम्भित होता , काहेकी शाऊल न त विश्वासीहिन ला मारन की कोसिस करी होतीस , पर आता ऊ यीशु पर विश्वास करसे | शाऊल न यहूदीहिन को संग वाद - विवाद करिस | वन देखाईस की यीशुच मसीह होतो |

बहुत दिवस को बाद मा , यहूदीहिन न शाऊल ला मार डाकन की योजना ला बनाईन | उन्न ओला मार डाकन लाईक गाँव को फाटक पर लोखहीन ला धाड़िस | की ओकी देखरेख करेती पर शाऊल न वन योजना को बारे मा आएक लेईस , अखिन ओको संगीहिन न बच सारी निकलन मा ओकी मदत करिन | एक रात मा ऊन ओला टोपली मा बसाए सारी गाँव को दीवाल लक ओला खालत्या उतार देईन | दमिश्क लक बच सारी निकलन को बाद मा शाऊल न यीशु को बारे मा प्रचार करणों सुरू राखीस |

शाऊल चेलाहीन सीन मिलन लाईक यरुशलेम गएव , पर वय ओको सीन डरत होता | तब बरनबास नाव को एक विश्वासी शाऊल ला चेलाहीन को जवर धरसारी लिजाईस | वन ऊनला सागीस की शाऊल न कसो निडर होयसारि दमिश्क मा प्रचार करिस होतीस | ओको बाद मा , चेलाहीन न शाऊल ला आमंत्रित कर लेईन |

काई विश्वासी जो यरुशलेम को सताव लक पराय गया होता वय दूर अंताकिया नगर मा चली गया होता अखिन यीशु को बारे मा प्रचार करत होता | अंताकिया मा रव्हने वाला लोख जादातर यहूदी नोव्हता , पर पहेली बार , उनको मालक बहुत सा लोख विश्वासी बन गया होता | बरनबास अखिन शाऊल येन नवीन विश्वासीहिन ला यीशु को बारे मा जादा सिखावन लाईक वहाँ गया अखिन कलिसिया ला मजबूत करिस | यीशु पर विश्वास करन वाला पहेली बार अंताकिया माच “ मसीही ” कव्हनो मा आया |

एक दिवस , अंताकिया का मसीही लोख उपास को संग प्रार्थना करत होता | पवित्र आत्मा न ओको सीन कहीस , “ मोरो लाईक बरनबास अखिन शाऊल ला वन काम ला करण लाईक अलग कर देव जोला करण लाईक मीन ओला बुलाईसेव | ” काहेकी अंताकिया की कलिसिया न बरनबास अखिन शाऊल को लाईक प्रार्थना करया अखिन ऊन को पर हाथहिन ला राखिन | तब ऊन्न उनला दूसरा बहुत सा जागाहिन पर यीशु को बारे मा शुभ शंदेस को प्रचार करण लाईक धाड देईन | बरनबास अखिन शाऊल न अलग-अलग जातीहिन को लोखहीन ला शिक्षा देईस , अखिन बहुत सा लोखहीन न यीशु मा विश्वास करिन |