48. यीशुच वादा करेव वालो मसीह आए

जब परमेश्वर न संसार ला बनाईस त सब काई साजरों होतो | कोणतोच पाप नोव्हतों | आदम अखिन हव्वा एक दूसरों सीन प्रेम करत होता , अखिन वय परमेश्वर सीन प्रेम करत होता | कोईच बीमारी या मृत्यु नोव्हती | परमेश्वर असोच संसार ला पसन्द करत होतो |

शैतान न सरप को माध्यम लक बगीचा मा हव्वा सीन बात करिस , काहेकी ऊ ओला धोखा देनला चाव्हत होतो | तब हव्वा अखिन आदम न परमेश्वर को विरुद्ध पाप करिन | काहेकी ऊन्न पाप करिन होतीन येकोलाईक जागा मा रव्हन वाला पूरा जन मरसेती |

काहेकी आदम अखिन हव्वा न पाप करिन होतीन , येकोलाईक काई अखिन बुरों भएव | वय परमेश्वर का दुशमन बन गया | जोकों परिणाम – स्वरूप , तब पासून हर एक जन न पाप करी से | हर एक जन पैदाईसीच परमेश्वर को दुशमन से | परमेश्वर अखिन लोखहीन को बीच मा शान्ति नोव्हती | पर परमेश्वर शान्ति स्थापित करन ला चाव्हत होतो |

परमेश्वर न वादा करिस की हव्वा को एक खानदान शैतान को डोसकी ला कुचले | वन यव भी कही होतीस की शैतान ओको एडी ला चाबे | दूसरों शब्द मा , शैतान मसीह ला मार डाके , पर परमेश्वर ओला मंग अदिक फिर लक जीतो कर देहे | येकों बाद मा , मसीह शैतान को ताकत ला हमेशा को लाईक खत्म कर देहे | कई साल को बाद मा , परमेश्वर न प्रकट करिस की ऊ मसीह यीशु आए |

परमेश्वर न वन पुर लक आपरो परिवार ला बचाईस जेला ऊ आनेवालों होतो | नूह सीन एक डोगा बनावन लाईक कहिस की ऊ येन तरीका लक परमेश्वर न वन लोखहिन ला बचाईस जो ओको पर विश्वास करत होता | येन तरीका लक , वय सब का सब परमेश्वर को लक मार डाकन को योग्य होता काहेकी ऊन पाप करिन होतीन | पर परमेश्वर न वन सब जन ला बचावन लाईक यीशु ला धाड़िस जो ओको पर विश्वास करसेत |

कईयो साल वरी , याजक परमेश्वर को लाईक बलिदान चढ़ाव्त रया | यव दर्शाव से की लोखहिन न पाप करिन , अखिन यव की वय परमेश्वर सीन ऊनला दंडित करन को योग्य सेत | पर वय बलिदान उनको पापईन ला माप्फ़ नहीं कर सिक्या | यीशु सब लक मोठो महायाजक से | वन ऊ करिस जे कोई याजक नहीं कर सकत होतो | वन ऊ एकमात्र बलिदान होन लाईक खुद ला देईस जो हर कोई को पापहिन ला मिटाय सिकत होतो | वन स्वीकार करिस की परमेश्वर वन सब जन को पापहिन को लाईक ओला दंडित करे | येन तरीका लक , यीशु सिद्ध महायाजक होतो|

परमेश्वर न अब्राहम सीन कहीस , “ मी तोरो लक संसार का पुरो कुलहिन ला आशीष देऊ | ” यीशु येनच अब्राहम को खानदान मालक होतो | परमेश्वर अब्राहम को वजह लक पुरो कुलहिन ला आशीष देसे , काहेकी जो यीशु पर विश्वास करसेती परमेश्वर वन सब जन ला पाप मा लक बचावसे | जब ये लोख यीशु पर विश्वास करसेती , त परमेश्वर ऊनला अब्राहम को खानदान मानसे |

परमेश्वर न अब्राहम सीन कहीस की ऊ आपरो खुद को बेटा ला , ओको लाईक बलिदान करदेए | पर मंग अदिक डबल लक परमेश्वर न इसहाक को बदला मा बाली करन लाईक एक मेमना ला देईस | आमी सब जन आपरो पापहिन लाईक मर जान को लाएक होता ! पर परमेश्वर न आमरो जागा पर मरण लाईक यीशु ला बलिदान को रूप मा देईस | येनच वजह लक आमी यीशु ला परमेश्वर को मेमना कसेजन |

जब परमेश्वर न मिस्र पर आखरी माहामारी ला धाड़िस त वन हर एक इस्राएली परिवार सीन कहीस की वय एक मेमना की बलि करेती | वन मेमना मा काई दोष नहीं रहे पायचे | तब आपरो दरवाजो को चौखट को ओरत्या अखिन आजू - बाजू मा ओको खून ला लगावनों होतो | जब परमेश्वर न वन खून ला देखीस त ऊ उनको घर लक सामने चली गएव अखिन उनको पहेलो टुरा ला नहीं मारिस | जब यव भएव त परमेश्वर न येला फसह को पर्व कहीस |

यीशु फसह को पर्व को एक मेमना को जसो से | वन कभी पाप नहीं करिस , येकोलाईक ओको मा काई गलत नोव्हतों | ऊ फसह को पर्व को समय मा मरेव | जब कोई यीशु पर विश्वास करसे , तब यीशु को खून वन आदमी को पापहिन की कीमत चुकावत होतो | यव असो से जसो की परमेश्वर वन आदमी को जवर लक सामुर चली गएव , काहेकी ऊ ओला दण्ड नहीं देत होतो |

परमेश्वर न इस्राएली लोखहिन को संग एक वायदा करिस , काहेकी वय असा लोख होता जोला परमेश्वर न आपरो हों लाईक पसन्द करी होतीस | पर आता परमेश्वर न एक असो वादा करीसेस जो की सबजन लाईक से | अगर कोईच जात को भी जन येन वायदा ला स्वीकार कर सिकसे, त ऊ परमेश्वर को लोखहिन मा मिल जासे | ऊ असो येकोलाईक करसे काहेकी ऊ यीशु पर विश्वास करसेत |

मूसा एक असो भविष्यद्वक्ता होतो जेन परमेश्वर को वचन ला मोठों सामर्थ लक प्रचार करी होतीस | पर यीशु पुरो भविष्यद्वक्ताहिन मालक सबसिन मोठों से | ऊ परमेश्वर से , येकोलाईक जो काईच वन करिस अखिन कहीस ऊ परमेश्वर को कार्य अखिन वचन होतो | येकोलाईक पवित्र - शास्त्र यीशु ला परमेश्वर को वचन कसे |

परमेश्वर न राजा दाऊद सीन वादा करी होतीस की राजा को रूप मा ओको एक वंशज परमेश्वर को लोखहिन पर हमेशा को लाईक राज्य करे | यीशु परमेश्वर को टुरा अखिन मसीह आय , येकोलाईक ऊ राजा दाऊद को वंशज से जो हमेशा को लाईक राज्य कर सिकसे |

दाऊद त इस्राएल को राजा होतो , पर यीशु पुरो संसार को राजा होतो ! ऊ मंग अदिक डबल लक आए अखिन हमेशा को लाईक न्याय अखिन शान्ति लक आपरो राज्य पर अधिक करे |