39. Yesus Diadeli

Pas tu tenga dalu. Yesus digawak ole prajoret-prajoret ke ruma imam besak ontok ditanyo-tanyoi. Petros meloki jao di belakang. Pas Yesus digawak ke jero ruma, Petros nunggu di jabo tros ngangetke badannyo di parak api unggun.

Di jero ruma tu, pemempen-pemempen Yahudi gawak banyak saksi palsu ontok ngadeli Yesus. Tapi, omongan dio wong ni katek yang samo. Laju pemempen-pemempen Yahudi dak pacak ngeboktike amen Yesus besala. Yesus dak ngomong apo-apo.

Akernyo, imam besak tu masati Yesus tros ngomong cak ni, ujinyo, “Enjoktaukela samo kami, iyo nian apo Kau ni Almasih, Anak Tuhan yang Edop?”

Uji Yesus, “Yo, tros kau bakal jingok Aku dodok samo Allah tros dateng dari surgo.” Sakeng maranyo imam besak tu sampe-sampe dio ngoyakke bajunyo, pekeknyo, “Kito dak boto saksi lagi! Kamu la denger dewek apo yang Dio omongi amen Dio tu iola Anak Allah. Jadi apo kepotosan kamu?”

Uji sloro pemempen Yahudi tu, “Dio pantes dihokom mati!” Laju dio wong tu notop mato-Nyo, ngeludai Dio, ngeboki Dio, jugo ngino Dio.

Sementaro tu pas Petros nunggu di jabo ruma, ado babu betino nyingok Petros, ujinyo, “Kau jugo besamo-samo Yesus!” Petros nyangkalnyo. Abes tu, betino laen ngomong cak itu jugo, Petros nyangkal lagi. Akernyo, banyak wong ngomong, “Kami tau kau besamo-samo Yesus karno kau beduo ni beasal dari Galilea.”

Petros besumpa, ujinyo, “Kironyo Allah ngotok aku amen aku kenal Wong tu!” Pas tu ayam bekokok, tros Yesus nole nyingoki Petros.

Petros metu tros nangis sede nian. Sementaro, tu Yudas, pengianat tu, nyingok amen pemempen-pemempen Yahudi la ngenjok hokoman mati ke Yesus. Dio jadi sede nian tros pegi ontok bunu diri.

Besoknyo pagi-pagi nian, pemempen-pemempen Yahudi tu gawak Yesus ke Gubernur Romawi, Pilatus. Dio wong ngarep supayo Pilatus ngenjok hokoman mati ontok Yesus. Pilatus nanyo ke Yesus, ujinyo, “Iyo nian apo Kau ni Rajo wong Yahudi?”

Uji Yesus, “Kau la ngomongke cak tu, tapi kerajaan Aku bukan kerajaan duniawi. Amen kerajaan Aku dari dunio, babu-babu Aku bakal bejuang ontok Aku. Tapi Aku dateng ke bumi ontok ngenjoktauke kebeneran pasal Allah. Sloro wong yang cinto dengen kebeneran ngedengerke Aku.” Uji Pilatus, “Apo dio kebeneran?”

Abes ngomong samo Yesus, Pilatus pegi ke keromonan wong tu, ujinyo, “Aku dak nemuke kesalahan di wong ni.” Tapi sloro wong samo pemempen-pemempen Yahudi jeret, uji dio wong, “Salebke Dio!” Uji Pilatus, “Dio dak besala.” Tapi dio wong mala jeret lebe keras. Tros uji Pilatus ontok ketigo kalinyo, “Dio dak besala!”

Pilatus ni takot bakal tejadi kerusuan, jadi dio stojo bae ngongkon pasokannyo supayo nyalebke Yesus. Tentaro-tentaro Romawi nyamboki Yesus, makekke Dio juba kerajaan samo mahkota yang tebuat dari duri. Tros dio wong jugo ngino Yesus, uji dio wong, “Jingok, inila rajo wong Yahudi!”