38. Yesus Dihianati

Tiap taon, wong Yahudi ngerayoke Ari Rayo Paska. Ini iola perayoan ontok nginget kejadian cakmano Allah nyelametke lelohor wong Israel dari pebudakan di Mesir beabad-abad yang lalu. Kiro-kiro tigo taon abes petamo kalinyo Yesus bekotba samo ngajar di depan umum, Yesus ngenjoktauke mored-mored-Nyo amen Dio nak ngerayoke Paska taon ni samo dio wong di Yerusalem, jugo amen Dio bakal dibunu di sano.

Sala sikok mored Yesus benamo Yudas. Dio ni tugasnyo ngorosi duetnyo dio wong, tapi dio ni mato duetan tros sereng malengi duet tu. Pas Yesus samo mored-mored-Nyo la sampe di Yerusalem, Yudas pegi ke tempat pemempen-pemempen Yahudi. Tros dio nawarke ontok nyerake Yesus ke dio wong amen dio wong ngenjok duet. Dio tau amen pemempen-pemempen Yahudi tu dak trimo amen Yesus tu iola Almasih tros berencano nak ngebunu Dio.

Pemempen-pemempen Yahudi, yang dipempen ole imam besak, bayar ke Yudas tigo polo kepeng perak ontok ngianati Yesus. Kejadian ini samo pecak apo yang la dinubuatke nabi-nabi. Yudas stojo, diambeknyo duet tu, tros pegi. Dio mulai nyari kesempetan ontok bantu dio wong ningkep Yesus.

Di Yerusalem, Yesus ngerayoke Ari Rayo Paska samo mored-mored-Nyo. Pas makan makanan Paska, Yesus ngambek roti sambel dibela-belainyo. Uji-Nyo, “Ambekla, tros makanla, ini badan Aku, yang la Aku enjokke ontok kamu. Lakuke ini ontok nginget Aku.” Dengen caro ini, Yesus ngomong amen badan-Nyo bakal dikurbanke ontok dio wong.

Abes tu Dio ngambek cangker, uji-Nyo, “Minumla ini. Ini ni dara Aku dari Pejanjian Baru yang dituangke ontok pengamponan duso. Lakuke ni ontok nginget Aku setiap kali kamu minum tu.”

Uji Yesus ke mored-mored-Nyo, “Sala sikok dari kamu bakal ngianati Aku.” Mored-mored tu tekejot. Dio wong betanyo-tanyo siapo yang bakal cak itu. Uji Yesus, “Wong yang Aku enjok sepotong rotinila yang bakal ngianati Aku.” Abes tu Dio ngenjok roti tu ke Yudas.

Abes Yudas ngambek roti tu, dio kerasokan Ebles. Yudas pegi ontok ngebantu pemempen-pemempen Yahudi ningkep Yesus. Waktu tu ari la malem.

Abes makan, Yesus samo mored-mored-Nyo bejalan ke Boket Jaitun. Uji Yesus, “Malem ini kamu bakal ninggalke Aku dewekan. Ado tetoles, ‘Aku bakal ngebok Pengoros domba tu, tros domba-domba tu bakal tepencar-pencar.’”

Uji Petros, “Mugola amen wong laen ninggalke Kau, aku dak bakal!” Laju, uji Yesus ke Petros, “Ebles nak ngedapetke kamu galo, tapi aku la bedoa ontok kau, Petros, supayo iman kau dak bakal lontor. Mugola cak tu, malem ni, sebelom ayam bekokok, kau bakal nyangkal ngenal Aku sebanyak tigo kali.”

Uji Petros lagi, “Mala amen aku haros mati, aku dak bakal perna nyangkal Kau!” Sloro mored-mored yang laen jugo ngomong cak itu.

Tros Yesus pegi samo mored-mored-Nyo ke sikok tempat namonyo Getsemani. Yesus ngongkon mored-mored-Nyo bedoa supayo dio wong dak masok ke pencuboan. Abes tu Yesus pegi ontok bedoa dewekan.

Yesus bedoa tigo kali, “Ubak, amen pacak, tolong nian jangan Kau biarke Aku minum cangker pendritoan ni. Tapi amen dak katek caro laen ontok ngapos duso-duso manusio, biarla kendak Kau bae yang tejadi.” Yesus bingsal nian, tros kringet-Nyo pecak tetesan dara. Laju Allah ngotos sikok malekat ontok nguatke Dio.

Abes tiap kali bedoa, Yesus balek ke mored-mored-Nyo, tapi dio wong lagi tedok. Pas Dio balek ontok ketigo kalinyo, Yesus ngomong cak ni, uji-Nyo, “Bangon! Dio yang ngianati Aku la ado di sini.”

Yudas dateng besamo pemempen-pemempen Yahudi, tentaro, jugo segrombolan wong. Dio wong gawak pedang samo pentongan. Yudas dateng ke Yesus, ujinyo, “Salam, guru,” tros nyium Yesus. Ini ni iola tando ontok pemempen-pemempen Yahudi supayo tau siapo yang haros ditingkep. Tros uji Yesus, “Yudas, apo kau ni ngianati Aku makek ciuman?”

Pas prajoret-prajoret ningkep Yesus, Petros metuke pedangnyo tros motong kopeng babu imam besak tu. Uji Yesus, “Masokke pedang tu! Aku pacak mintak Ubak Aku ngeremke pasokan malekat ontok ngebela Aku. Tapi Aku haros norot samo Ubak Aku.” Abes tu Yesus nyemboke kopeng wong tu. Pas Yesus ditingkep, sloro mored ngelarike diri.