20. Pembuangan samo Baleknyo Wong Israel

Bangso Israel samo Bangso Yehuda ni samo-samo la beduso ke Allah. Dio wong ngelanggar pejanjian yang la Allah beken samo dio wong di Gonong Sinai. Allah ngotos nabi-nabi-Nyo ontok ngingetke dio wong supayo betobat samo nyemba Allah lagi, cuman dio wong ni nekak.

Jadi Allah ngokom keduo bangso tu dengen caro ditalakkenyo bae dio wong diancorke. Bangso Israel diancori ole Kekaisaran Asyur, bangso yang kuat jugo kejem. Banyak wong Israel yang dibunu ole wong-wong Asyur. Sloro yang berego diambek dio wong, tros dio wong jugo bakar banyak tempat di negaro tu.

Wong-wong Asyur ngompolke sloro pemempen, wong kayo, samo wong yang ado kepacakan tros sloro wong Israel yang tepele tu di gawak ke Asyur. Cuman wong-wong Israel yang mesken nian tetep tinggal di Israel.

Abes tu wong Asyur gawak wong-wong aseng ontok tinggal di Israel. Wong-wong aseng tu ngebangun lagi kota-kota yang la diancorke tros ngaweni wong Israel yang mase ado di sano. Ketoronan dio wong disebot wong Samaria.

Wong-wong di kerajaan Yehuda nyingok cakmano Allah la ngokom kerajaan Israel karno dak pecayo samo noroti-Nyo. Tapi dio wong mase bae nyemba berhalo samo dewa-dewa wong Kanaan. Allah ngotos nabi-nabi-Nyo ontok ngingetke dio wong, tapi dio wong mase bae nekak.

Kiro-kiro 100 taon abes Israel diancori wong Asyur, Allah ngerem Nebukadnezar, Rajo Babel, ontok nyerang negri Yehuda. Karno Babel ni kerajaan yang kuat, laju rajo Yehuda ni stojo jadi jajahannyo Nebukadnezar dengen caro bayar banyak upeti tiap taonnyo.

Tapi dak lamo abes tu, wong Yehuda ni brontak ke Babel. Jadi, wong-wong ni Babel dateng lagi tros nyerang dio wong. Wong Babel ngerebot kota Yerusalem, ngancori Ruma Allah, tros ngambek sloro barang yang berego dari kota tu jugo dari Ruma Allah tu.

Karno rajo Yehuda brontak, laju Rajo Nebukadnezar ngebunu sloro anak rajo Yehuda di depan matonyo. Abes tu rajo Yehuda tu dibuatnyo buto, tros dio wong masokke rajo Yehuda ke penjaro sampe mati di Babel.

Nebukadnezar samo pasokannyo gawak amper sloro wong Yehuda ke Babel, tapi disisokenyo wong-wong yang mesken nian di Yehuda ontok nanem kebon. Masa di mano umat Allah dipakso ninggalke Tana Pejanjian ni disebot Pembuangan.

Mugola Allah ngokom umat-Nyo karno duso dio wong dengen caro gawak dio wong ke Pembuangan, Dio dak ngelupoke umat-Nyo samo janji-Nyo. Allah teros ngawasi umat-Nyo jugo ngomong samo dio wong liwat nabi-nabi-Nyo. Dio bejanji amen abes tojo polo taon, dio wong bakal balek ke Tana Pejanjian lagi.

Kiro-kiro tojo polo taon abes tu, Koresh, rajo Persia, ngalake Babel. Jadi Kerajaan Persia gantike Kerajaan Babel. Wong-wong Israel mak ini ari disebot wong Yahudi, tros sebagean besak dari dio wong la tinggal di Babel seomor edop. Cuman beberapo wong Yahudi yang tuo nian bae yang mase inget samo tana Yehuda.

Bangso Persia tu kuat tapi baek ke wong-wong yang dikalakenyo. Dak lamo abes Koresh mulai bekuaso, dio ngeboleke wong Yahudi yang nak balek ke Tana Yehuda. Mala dio ngenjok wong Yahudi duet ontok ngebangun lagi Ruma Allah! Pas la tojo polo taon di pengasengan, akernyo sekelompok kecik wong-wong Yahudi balek ke Yerusalem.

Pas dio wong nyampe, dio wong ngebangun lagi Baet Allah, tros beken tembok disekeleleng kota Yerusalem tu. Dio wong mase diprento ole wong laen, tapi dio wong la tinggal di Tana Pejanjian lagi jugo beibada di Ruma Allah.