19. Nabi-nabi

Slamo sejaranyo Israel, Allah ngongkon nabi-nabi ke dio wong. Nabi-nabi tu denger pesen dari Allah abes tu nyampeke pesen Allah tu ke rakyat.

Pas Ahab jadi rajo Israel ado sikok nabi yang benamo Elias. Ahab ni wong jahat yang ngedorong wong-wong Israel ontok nyemba dewa yang benamo Baal. Uji nabi Elias ke Ahab, “Dak bakal ado ujan apo embun di Israel sampe aku ngongkonnyo.” Pasal tu beken Ahab jadi mara.

Abes tu Allah ngongkon Elias pegi ke padang goron parak sungi ontok singitan dari Ahab yang nak ngebununyo. Tiap pagi jugo tiap malem, borong-borong gawakke dio roti samo dageng. Ahab samo pasokannyo nyari Elias, tapi dio wong dak pacak nemukenyo. Kekerengan tu jadi para nian sampe-sampe sungi jadi kereng.

Laju Elias pegi ke negaro tetanggo. Di situ ado sikok jando samo anaknyo ni yang amper bae keabesan makanan karno bencano tu. Tapi dio wong ngoros Elias, tros Allah beken wada tepong samo botol minyak dio wong dak perna kosong. Dio wong ngedapetke makanan tu slamo bencano kelaperan tu. Elias tinggal di sano lumayan lamo.

Pas la tigo setenga taon, Allah ngongkon Elias supayo balek lagi ke Israel tros ngomong ke Ahab amen Allah bakal noronke ujan lagi. Pas Ahab nyingok Elias, dio ngomong cak ini, “Na, ini dio! Kau nila biang keroknyo!” Uji Elias, “Kaula biang keroknyo! Kau la ninggalke Allah, Tuhan yang bener, jugo nyemba Baal. Gawakla galo wong Israel ke Gonong Karmel.”

Sloro wong Israel, temasok jugo 450 ikok nabi Baal, dateng ke Gonong Karmel. Uji Elias ke wong-wong tu, “Berapo lamo kamu bakal teros beruba pekeran? Amen Allah tu iola Tuhan, sembala Dio! Amen Baal tu Tuhan, sembala dio!”

Tros Elias ni ngomong ke nabi-nabinyo Baal, “Sembelela sikok sapi lanang ontok jadi kurban, tapi dak usa dulu ngedopke apinyo. Aku bakal ngelakuke pasal yang samo. Tuhan yang ngejawab dengen api iola Tuhan yang sejati.” Laju nabi-nabi Baal nyiapke kurban tapi dak ngedopke api.

Abes tu nabi-nabi Baal bedoa ke Baal, ujinyo, “Dengerla kami, ya Baal!” La searian dio wong bedoa samo mekek sampe-sampe dio wong ngelukoi dirinyo makek ladeng, tapi Baal dak ngejawab.

Pas sorenyo, Elias nyiapke kurban ontok Allah. Laju dio ngongkon wong Israel nuangke duo blas gentong besak banyu di pocok kurban tu, sampe dageng, kayu, jugo tana di sekitar meja pesembahan tu basa nian.

Abes tu Elias bedoa, “Ya Allah, Tuhan Ibrahim, Ishak, samo Yakob, tonjokkela ke kami ari ni amen Kaula Tuhan Israel jugo amen aku ni babu Kau. Jawabla aku supayo wong-wong ni tau, amen Kaula Tuhan yang bener.”

Tibo-tibo, api nyampak dari langet tros ngebakar abes dageng, kayu, batu, tana, jugo banyu yang ado di sekitar meja pesembahan Elias. Pas wong-wong nyingok tu, dio wong tesongkor ke tana tros ngomong cak ini, “Allah iola Tuhan! Allah iola Tuhan.”

Abes tu Elias ngomong cak ini, “Jangan biarke nabi-nabi Baal tu ngelarike diri!” Jadi wong-wong nangkep nabi-nabi Baal tu tros gawak dio wong dari sano tros ngebunu dio wong.

Laju Elias ngomong ke Rajo Ahab, ujinyo, “Langsongla balek ke kota, soalnyo ujan bakal toron.” Dak lamo dari tu langet jadi gelep tros ujan besak toron. Allah la nyelesaike kekerengan tros ngebuktike amen Diola Tuhan sikok-sikoknyo.

Abes masanyo nabi Elias, Allah mele Ilyasa jadi nabi-Nyo. Allah ngelakuke banyak keajaeban liwat Ilyasa. Sala sikok keajaeban ni tejadi ke Naaman. Dio ni iola komandan tentaro moso Israel. Dio tau amen dio ni saket kolet para. Dio ni la ngedenger pasal Ilyasa, laju dio pegi tros mintak Ilyasa ontok nyembukenyo. Ilyasa ngongkon dio nyelemke dirinyo tojo kali di Sungi Yordan.

Awalnyo Naaman ni mara tros dak galak ngelakukenyo karno prento tu dak masok akal. Tapi akernyo dio beruba pekeran tros nyelemke dirinyo ke Sungi Yordan sebanyak tojo kali. Pas dio moncol dari dalem banyu ontok yang teaker kalinyo, penyaket koletnyo bener-bener sembu! Allah la nyembuke dio!

Allah ngongkon banyak nabi laen. Dio wong galo ngongkon wong-wong ontok brenti nyemba berhalo tros mulai bebuat adel samo bebelaskase. Nabi-nabi ngingetke wong-wong pasal duso dio wong. Amen dio wong dak bebalek dari duso-dusonyo jugo mulai noroti prento Allah, laju Allah bakal ngokom dio wong.

Sereng nian, wong-wong tu idak norot samo Allah. Dio wong sereng nganiayo nabi, kadang-kadang sampe ngebunu nabi-nabi tu. Perna sekali, nabi Yeremia dimasokke ke jero somor kereng, tros ditinggalke di sano supayo dio mati. Dio tenggelem ke jero lumpur yang ado di dasar somor tu, tapi rajo kasean samo dio tros ngongkon babu-babunyo ontok narek dio metu dari somor tu sebelom dio mati.

Nabi-nabi teros-terosan ngomongi pasal Allah, mugola banyak wong yang ngebenci dio wong. Dio wong ngingetke amen wong-wong tu dak betobat, Allah bakal ngancori wong-wong tu. Tros nabi-nabi tu jugo ngingetke ke wong-wong pasal janji Allah, amen Almasih bakal dateng.