9. ፆኦሲ ሙሴ ፔ ማዾም ዔኤሌሢ

ዮሴፔ ሃይቄስካፓ ዒጊና ቢያ ዒዛኮ ጊብፄይዳ ዴዔኔ። ዔያቶንታ ዔያቶኮ ዜርፆንታ ሚርጌ ሌዔ ዒኢካ ናንጌኔ፤ ሚርጌ ናይያኣ ሾዔኔ፤ ዔያታ ዒስራዔኤሌ ዓሶዋ ጌይንቲ ዔኤሊንቴኔ።

ፄኤታና ፓይዲንታ ሌዔኮ ጊንፃ ዒስራዔኤሌ ዓሶኮ ፓይዳ ዺቢ ዺቢ ዓኣዼኔ። ጊብፄ ዓሳኣ ዮሴፔንታ ዒ ዔያቶ ማኣዳኒ ማዼ ባኮዋ ቢያ ዋሌኔ። ዒስራዔኤሌ ዓሳ ሚርጊ ሚርጊ ዓኣዼሢሮ ጊብፄ ዓሳ ዔያቶ ዒጊጬኔ። ዬያሮ ዬኖ ዎዶና ዓጮ ዎይሣ ካኣቲ (ፓኣሮኔ) ዒስራዔኤሌ ዓሶ ጊብፄ ዓሶኮ ዓይሌ ማሄኔ።

ጊብፄ ዓሳ ዒስራዔኤሌ ዓሶ ሹቺ ማኣሪ ማዣንዳጉዲ፥ ካታማ ቢያ ዔያታ ማዣንዳጉዲያኣ ዎልቃዼኔ። ዬይ ዴኤፆ ማዻ ናንጎ ዔያቶኮ ዋኣዮ ናንጊ ማሄኔ። ጋዓንቴ ፆኦሲ ዔያቶ ዓንጄኔ፥ ሚርጌ ናይያኣ ዔያቶኮ ዓኣያ ማዔኔ።

ዒማና ፓኣሮኔ ዒስራዔኤሌ ዓሶኮ ሚርጌ ናይ ዓኣሢ ዛጌኔ፤ ዬያሮ ዒዚ ዒስራዔኤሌ ዓሳ ዓቲንቄ ናይ ሾዓማና ዓባዬ ዎሮይዳ ኬኤሪ ኬኤሪ ዎዻንዳጉዲ ፔ ዴሮ ዓይሤኔ።

ዬኖ ዎዶና ፔቴ ዒስራዔኤሌ ዓሲስኬና ዓቲንቄ ናይ ሾዔኔ፤ ዒዞንታ ዓኒንታ ዔያታ ዳንዳዓማ ሄላንዳኣና ናዓሢ ዓኣቼኔ።

ዬያፓ ዑሣ ዔያታ ዓኣቻኒ ዳንዳዒባኣሢሮ ናዓሢ ሾዔ ዓሳ ዒዛ ዔኪ ዓባዬ ዎሮ ዓጮ ዴንዳዖ ኮታ ማላ ባኣዚ፥ ዋኣሢ ጌሉዋያ ኮሺ ዒኢካ ዓጋዖ ማጫሬ ባኣካ ጌሤኔ። ዒማና ናዓሢኮ ሚሻ ዒዛይዳ ማዺንታ ባኮ ዛጋኒ ሴካ ሃንጋ ሃንቲ ሃንቲ ሙራኔ።

ፓኣሮኔኮ ናይስኬና (ካኣቲ ናኣ) ዬኖ ዎሮ ኬዳዖ ኮታ ማላ ባኣዚ ዴንቂ፥ ጋራ ዓይጌ ዓኣቴያ ቡሊ ዛጌኔ። ዬኖኮ ጋራ ናይ ዓኣሢ ዴንቃዖ ፔ ናይ ማሂ ዔኬኔ። ካኣቲ ናኣ ዒማና ናዓሢ ዒዞም ዻንሥሢ ዲቻንዳጉዲ ፔቴ ዒስራዔኤሌ ላኣሊስኬኖም ሚኢሼ ጪጊ ዒንጌኔ። ዬና ላኣሌላ ናዓሢኮ ዒንዶታሢ ጋዓንቴ ዒዛ ዔሪባኣሴ። ናዓሢ ዲጪ፥ ጉኡጳዛ ላኣሌላ ፓኣሮኔ ናዎም ማሂ ዒንጌኔ፤ ሱንፆዋ ዒዛኮ ዔያታ “ሙሴ” ጌይ ጌሤኔ።

ሙሴ ዼኤፔስካፓ ፔቴ ኬሊ ጊብፄ ዓሲስኬይ ዒስራዔኤሌ ዓሲ ማዔ ዓይሌስኬያ ጳርቃንቴ ዛጋዖ ፔ ዒጊናሢ ማዔ ዒስራዔኤሌ ዓሢ ዓውሳኒ ኮዔኔ።

ዒማና ሙሴ ዖኦኒያ ዒዛ ዴንቁዋሴ ጌይ ጊብፄ ዓሢ ዎዺ ማኣሻላ ካኣሺ ዱኡኬኔ። ጋዓንቴ ዬያ ሙሴ ማዻሢ ፔቴ ዓሲ ዴንቄኔ።

ሙሴ ማዼ ባኮ ፓኣሮኔ ዋይዛዖ ዒዛ ዎዻኒ ኮዔኔ። ሙሴ ጋዓንቴ ፓኣሮኦኔኮ ዖሎ ዓሳ ዒዛ ዎዹዋጉዲ፥ ቶላኒ ዓሲ ናንጉዋ ዳውሌ ጊብፄ ዓጫፓ ቤቲ ዓኣዼኔ።

ጊብፄፓ ሃኪ ዴንዲ ዒ ዓኣ ቤዞይዳ ፔቴ ዓሲ ማኣሪ ጌሊ ማራይ ሄንቃያ ማዔኔ። ዬያ ዓሢኮ ዉዱሮ ናይስኬኖዋ ዔኪ ላምዖ ዓቲንቄ ናይ ሾዔኔ።

ፔቴ ኬሊ ሙሴ ማራቶ ሄንቂቤቃ ካዮ ታሚ ዓርቂ ዔኤታያ ዴንቄኔ፤ ጋዓንቴ ዬይ ታማ ካዮ ሙዑዋያኬ፤ ሙሴ ዬያ ኮሺ ዛጋኒ ካዮ ባንሢ ዶጬኔ። ዒ ዬያ ዔኤታ ታሞ ባንሢ ዑካኣና ፆኦሲኮ ዑኡሲ “ሙሴ፥ ኔኤኒ ፆኦሲም ዱማዼ ቤሲዳ ዔቂ ዓኣሢሮ ቶካፓ ዱርዞ ኔኤኮ ኬሴ” ጌዔኔ።

ፆኦሲ ሃሣ “ታ ዴሮኮ ሜቶ ታኣኒ ዛጌሢሮ ፓኣሮኔ ኮይላ ታ ኔና ዳካንዳኔ፤ ዒስራዔኤሌያ ኔኤኒ ዓይላታፓ ኬሳንዳኔ፤ ታኣኒ ዓብራሃሜም፥ ዪሳኣቄንታ ያይቆኦቤንታም ሃጊ ማዓንዳ ዎዛ ማሂ ዒንጌ ካኣናኔ ዓጮዋ ዔያቶ ታ ዻካልሳንዳኔ” ጌዔኔ።

ሙሴ ጋዓንቴ፥ “ዴራ፡ ‘ዖ ኔና ዳኬይ’ ጌይ ታና ዖኦጬቴ ታ ዎዚ ጋዓንዳይ?” ጌይ ፆኦሲ ኮይላ ዖኦጬኔ። ፆኦሲ ሙሴም፥ “ታኣኒ ዓኣያ፥ ሃሣ ናንጋሢኬ፤ ዬያሮ ‘ዓኣሢና ናንጋሢ’ ታና ዒንሢ ኮይላ ዳኬኔ ጌዔ” ጌኤኔ።

ሙሴ ዒጊጬሢሮ ፓኣሮኔ ኮራ ዓኣዻኒ ኮይባኣሴ። ዬያ ዒ ኮይባኣሢ “ጌኤሲ ጌስቲሢ ታ ዔሩዋሴ” ጌይ ማሌሢሮኬ። ፆኦሲ ጋዓንቴ ሙሴና ዎላ ዒዛኮ ጌርሲ ዓኣሮኔ ዒዛ ማኣዳኒ ዴንዶም ዳኬኔ። ፓኣሮኔኮ ዒኖ ፆኦሲ ፔኤሮ ዶዲሻንዳያ ማዔሢ ሙሴና ዓኣሮኔናም ላቲ ኬኤዜኔ።